أنا مش قادرة أ fit in في أي مكان/ مجتمع / ناس. أنا عارفة دا من زمان ومكانش مزعج بالنسبة لي لكن معرفش ليه دلوقتي بالتحديد دا واجعني ومضايقني.
دايمًا على بالي بيت الأبنودي "عارفه يا مرتي الراجل في الغربه يشبه إيه ؟ عود دره وحداني .. في غيط كمون " أنا طول الوقت في غربة معرفش هتنتهي إمتى، ومعرفش إيه المكان اللي انا بنتمي له فعلاً فلما أروحه أبطل أحس بالغربة! حاسة الغربة جوا عقلي أنا جوا قلبي أو دماغي.. مش عارفة!!
أنا متفهمة إني شخص انطوائي، وإنه طبيعي ما أحسش براحة كبيرة وسط الناس، بس أنا إحساسي دلوقتي إني طفل بيراقب الناس من ورا إزاز وهي بتضحك وبتلعب وبتعيش وهو محبوس جوا أوضة. هو معاهم في نفس المكان، بس مش معاهم! هو مش جزء من دا.. مش جزء من الحياة.
متفهمة بردو إن دا كافيني شر حاجات كتير. متفهمة إن القرب من الناس له ضريبة أنا ما بقدرش عليها. بس أنا دلوقتي مرهقة وتعبانة وحاسة إني "بطولي" أزيد من اللازم! قلقانة أكتر من اللازم، وخفيفة أكتر من اللازم!
