د.أحمد خالد توفيق كتب على لسان رفعت إسماعيل إن "أبشع مسخ يمكن للمرء أن يلقاه ، هو نفسه !" وأنا كنت مصدقة دا. كنت مصدقاه جدًا، لحد ما قابلت نفسي!
أنا عارفة إني مش بعيدة عنها، بقابلها كتير على الورق، بس امبارح قابلتها لحم ودم!
كذا مرة قابلت نفسي في نصوص معينة. أو في حاجات ناس حكيتها عن كتاب معينين، بس نسبة التشابه ما كانتش بتبقى للدرجة دي. امبارح قابلت شاعرة بحبها. بشوف نفسي كتير في نصوصها. أغيب أغيب وارجع الاقيها قالت ببساطة كلام جوا جوا قلبي مش عارفة أبلوره.
اتقالت لي الكلمة دي كتير "كتبتي اللي جوانا يا سارة" بس مكنتش اعرف معناها اوي. ماكنتش بعيشه.
في وسط المقابلة خطرت في بالي فكرة إنه "أنا حاسة / أتمنى إني قاعدة مع نفسي لما اكبر شوية، لما اعدي المرحلة دي" لقيتها في نفس اللحظة دي بتقولي "أنا حاسة إني قاعدة مع نفسي وأنا أصغر شوية"! أنا دمعت.
طمنتني إن اللي بعدي بيه مفهوم. إن الربكة منطقية. وإن الوجع هيروح، هيتنسي، وإني شوية وقت وهبقى أحسن.
بقالي تقريبا 10 ساعات ما بعملش غير إني بقرأ في مدونتها. ومخضوضة بقى من كم التشابه. كم الكلام اللي جوايا، إزاي الحاجات اللي مرينا بيها مش واحدة لأ.. بس سابت فينا نفس الأثر؟
أتمنى لها تكون أجمل وأجمل، وتبقى بخير دايمًا وتاخد كل الخير اللي تستحقه من الدنيا. وأتمنى لنفسي إني أكون مبسوطة أوي قريب. أنا مبسوطة دلوقتي عشان قابلت نفسي وما طلعتش مسخ، لما بصيت لي من برة فيها لقيتني جميلة. كانت فرصة سعيدة.
