2023-09-18
2023-09-10
أليس في بلاد العجائب 2
2023-09-04
بقالي فترة واخدة بالي إني بحب بشكل غير عادي الفيديوهات اللي القطط فيها بتروح تنام في حضن أصحابها شبه دي
بتفرج على الفيديو دا وبحبه عدد لا نهائي من المرات 🥹 https://t.co/ZvMix5jb0s
— سارة درويش 🌻 (@sarabentdarwish) August 28, 2023
وبعدين اكتشفت اني بحب اللحظة دي اوي لما القطط تعملها. اكتشفت ان قطط كتير بتعمل دا بالطريقة العفوية نفسها. مكنتش مركزة اوي أنا بتأثر بالحكاية دي ليه. بعدين دلوقتي فجأة اكتشفت إن أكتر حاجة بتأسرني هو قد إيه القطة بتدخل في حضن صاحبها بانسيابية وثقة وبساطة وسلاسة تحسس بالانتماء والأمان. هي عارفة إن ليها مكان هنا. هي عارفة إزاي تدخل بالظبط زي قطعة بازل بتستقر مكانها. هي قادرة رغم انها مختلفة تماما عنه ت fit in وتحس بانتماء كأنها جزء منه رغم انها مختلفة عنه. صاحبها في اللحظة دي. وهنا بتكلم عن نفسي. بحس إن حاجة نقصاني رجعتلي واستقرت مكانها. قبل ما تيجي ما كنتش حاسة بحاجة ناقصة. بس لما جات حسيت إن في حاجة بقت في مكانها. معرفش إزاي. بس ببقى أسعد. وببتسم مهما كنت غرقانة في النوم.
اكتشفت إني بحب اللحظة دي عشان بحب الانتماء دا. وبتمنى أحسه.
حاسة دا توماتش كلام هنا. بس انا بتفائل بهنا بحس كل حاجة بتترتب وتتحل بعد ما افضي دماغي هنا.
انا خايفة اكون مبعرفش افرق بين الفرصة والريسك. انا فاهمة ان كل فرصة بتنطوي على مخاطرة ما. بس في حاجات هي فرصة فعلا. تبعتها اقل من مميزاتها بكتير. وفي حاجات هي اقرب للمغامرة وحاجات هي خطر نسبة نجاحه قليلة جدا. انا حاسة اني مبعرفش في الوقت المناسب احسبها. انا اصلا مبحبش احسب.
اتفرجت تاني على فيلم فورست جامب. اول فيلم اشوفه لتوم هانكس. وخلاني أحبه جدا. واتسحل بالعالم بتاعه. اكتشفت اني ناسياه تماما كنت كأني بشوفه لأول مرة. زي حاجات كتير وقعت من ذاكرتي السنين اللي فاتت دي. المهم اني شفت نفسي في سذاجة / بساطة فورست جامب جدا. فكرة إنه بيصدق اللي الناس بيقولوه بجد مهما كان مبالغ فيه.
انا لسة بصدق. وبتصرف بصدق والاتنين بيتعبوني. المشكلة التالتة ان بقى عندي حدس قوي بينبهني ان في حاجة غلط فببقى متعذبة بين تصديقي للناس وبين إحساسي اللي بينبهني ان في حاجة غلط بس مش محدد إيه هي بالظبط.
انا منهكة اوي من دا كله. من التعقيدات واللخبطة والحاجات اللي مش زي ما تبدو والكلام اللي الناس بتقوله وما تعنيهوش. انا طول الوقت تخيلي عن الناس لما تنضج وتكبر إنها بتبقى شجاعة وتبطل تعمل ألاعيب وتحور. اتفاجئت لما حد بلجأ له عشان يساعدني اكتر في إني أكون أشجع بينصحني بحاجة فيها تلاعب او خدعة. حسيت اني متلخبطة حسيت ان دا مش صح. فقالي اني بدور على عالم مثالي اوي. هو صح. بس انا مش عارفة تاني ا fit in كل دا
انا دلوقتي حاسة إحساس فورست عايزة اجري وابعد عن كل حاجة.. اجري وما اوصلش لأي مكان عايزة أجري بس.