2008-09-23

عمرك شميت ريحة كئيبة ؟؟

أغلب الناس الذكريات في دماغها مرتبطة بالصورة ..

بصورة معينة يعنى .. لكن انا العكس ..

أنا ذكرياتي مرتبطة بالريحة اوى وبالصوت ..

علشان كده ممكن أو في عز فرحتى اسمع صوت معين اكتئب ..

او اشم ريحة معينة - مش شرط تكون ريحة وحشة - اكتئب والعكس بيحصل ممكن صوت يفرحنى أوي ويطلعنى من حالة اكتئاب ..

يعني مثلاً بحس براحة غريبة أوى وانا بسمع برنامج ( بريد الاسلام ) اللي بيجي ع اذاعة القرآن الكريم

لأنه دايماً بيفكرني بأيام المدرسة لما كنت ببقى بلبس وبحضر شنتطى الصبح

ويبقى شغال وبفتكر دايماً لما كان القط بيقعد يلعب معايا ويعاكسنى وانا بحضر الشنطة ويخطف مني حاجاتى

و يقعد يجري ورا رباط الشوز علشان بيتحرك

و ياخد منى قلم او استيكة ويقعد يلعب بيهم واقعد انا بقى محتاسة جنبه بس مبسوطة اوووى

وريحة المطرة ساعة العصاري بردو بترفع معنوياتى اووووى ..

لما تكون الدنيا مغمية كده ياااااااه متعة .. انا ع فكرة من الناس اللي بتكره الشمس اوووووى ..

بعنى بكره جداً اشوف ضوء الشمس كده .. بحب الدنيا تبقى مغيمة كأنها ساعة المغربية أو تبقى ليل ..

فتخيلوا بقى الدنيا مغيمة كده والبرد بيلسع لسعة خفيفة كده وانا قاعدة اتفرج ع المطرة او قاعدة اشرب شاي واقرا في البلكونة والمطرة شغالة ..

متـــــــــــعة بجد ..

لأن الجو دا بيفكرني بأيام حلوة أوي وانا صغيرة ..

ايام اجازة نص السنة وقاعدة اقرا مجلة ماجد في البلكونة وبشرب حاجة سخنة

من الاصوات بردو اللي بتفكرني بذكريات حلوة ..

صوت ابتهالات الفجر اللي هي بتيجي في اذاعة القرآن بعد الفجر دي ..

يااااااااااه بعشقها بجد ..

يي بحب أوي اسمعها لأنها بتفكرني بزماااااااااااان لما كنا نسافر آخر ايام في رمضان كده ساعة الفجرية علشان نحضر العيد مع العيلة .. فتخيلوا بقى انا مش بحس بفرحة العيد لو ما سمعتهاش !!

اما بقى الحاجات اللي بتجيبلى اكتئاب فكتير اوى ..

صوت مثلاً برنامج (( براعم الايمان )) اللى بيجي ع اذاعة القرآن الكريم

ساعة الضهرية رغم انه مش برنامج وحش ولا حاجة

بس بحس بكآبة منقطعة النظير لما بسمعه - مهما كنت مبسوطة - ومش عارفة ايه السبب ؟!!

وكمان لو شميت ريحة صابونة تواليت مع ريحة سجاير .. بحس ان في مصيبة هتحصل ولو شميت ريحة ورق بيتحرق .. تخيلوا بقى نفسيتى ايام حرق قش الرز !!

ولما بسمع صوت دقات الساعة لأن دايماً لما بيكون في نكد والكل ساكت ..

ولا في حد مات والكل ساكت او قلقانين كلنا وخايفين ومستنين مصيبة

وساكتين مش بسمع الا صوت دقات الساعة فارتبطت في عقلي بالنكد والزعل

فلما بسمعها بكتئب وبخاف اووووووووووووووى

انا عارفة اني طولت عليكم بس الموضوع مش مجرد فضفضة وبس ..

الحكاية وما فيها انى عايزاكوا تركزوا شوية كده في اللى حواليكوا وتاخدوا

بالكم من الحاجات اللي بتأثر في نفسيتكم بالسلب او بالايجاب علشان تقدروا

تسعدوا نفسكوا او تتجنبوا الحاجات اللي بتضايقكم زيادة

يعني أنا مثلاً عارفة اني بنبسط أوي لما اسمع ابتهالات الفجر لما بلاقي نفسي

مكتئبة بحاول اظبط نفسيتى واسمع الابتهالات ولما اكون عارفة انى قلقانة

ومتوترة المفروض اتجنب الحاجات اللي بتزود توتري زي مثلاً صوت دقات

الساعة او ريحة الصابونة مع السجاير او برنامج براعم الايمان ..

وبكده نقدر نستغل نقاط ضعفنا ونحولها لنقاط قوة

2008-09-21

سالمة يا سلامة الدراسة رجعت بالسلامة



.. اخيراااااااااااااااااااً رجعت الدراسة من تانى


.. انا كنت خلاص قربت انتحر من الخنقة في البيت




.. اخيراااااااااا هرجع اشوف اصحابي تانى


.. ونتناكف ونهزر ونتريأ ع بعض




اخيرا هرجع لذل المواصلااااااات .. و للمشى جوا الكلية لحد ما رجليني يوجعونى




ياااااااااه ماحدش يتخيل الكلية وحشتنى ازاى .. والله حتى الحيطان بتاعتها وحشتنى




المدرجات .. السلالم .. عمو الفراش اللى بيخلينى اتسلل للأوفست واشرب ماية من غير ما الحاجة الفراشة العصبية تشوفنى




وحتى الامن بتاع البوابة اللى كل ما اجي داخلة بكارنيه الجورنال (( لأنى ضيعت كل كارنيهاتي )) يهزأنى ويقولى ما ينفعش وبعدين يقولى بس هدخلك دى اخر مرة






دا غير المحاضرات نفسها و العيال كلها بتضحك عليا لأنى ما يحلاليش اسمع المحاضرة الا وانا بلعب سنيك .. الغريب انى بناقش الدكتور وببقى مركزة معاه وببقى قاعدة فى اول بنش ..




بس بينى وبينكم لما بلعب بلياردو ع الموبايل ببقى مش مركزة مع المحاضرة




وصاحبتي ياعينى بتبقى قاعدة حاطة ايدها ع قلبها لحسن اخسر وتنرفز ويبان عليا زي كل مرة هههههههههه




ولا الدكاترة اللى كلهم الحمد لله عرفونى ولو حتى بالشكل .. بس دايماً بيشوفونى بتمشى انا وانتيمتى .. او بتلامض .. او باكل مصاصة




والمكتبة وااااااااااااو ع المكتبة .. امينة المكتبة اللى هتموت وتعرف اما انا اعلام باجي عندها ليييه ؟




وهتموت تعرف مين الشعراء اللى اساميهم غريبة دول اللى باجي اسألها عن كتب ليهم




وهتموت تعرف ليه كل ما امسك كتاب الجنوبي اقعد اعيط ..




ولما انا اساسا بعيط منه بمسكه لييييييييه ؟؟



ولا ام جيجي .. ام جيجي اللى عمري في حياتي ما روحت يوم عندها واشتريت حاجة غير



(( واحد بيتزا وواحد شيبسى بالشطة وشيتوس بالشطة .. وهو مافيش شيبسى بالخل ؟؟؟؟؟؟ ))



وكل مرة تقولي مافيش وبردو بسألها



هههههههههههههههههههه



........ وسواقين الميكروباصات .. و



عاااااااااااااااااااااااااااااااااااااااااااالم كامل في الطريق للكلية وجوا الكلية وفى المدرج






وحشتنى كل الحاجات دى اوووووووووووووى يارب تبقى سنة كويسة يارب لأنى فعلاً متحمسة

_______________________


دي الصورة اليتيمة اللى لقيتها ع النت للكلية بتاعتى هع هع من مظاهرة

2008-09-10

تعالوا بينا نشتغل بعضينا

كنت قاعدة اقرا كده ومشغلة الراديو جنبي ومش مركزة فيه


وبعدين اذ فجأةً في اعلان خرم وداني وفوقني كده

بس فوقني بصدمة .. زي ما تكون صحيت واحد من النوم بماية ساقعة

ام هند بقى الاعلان بيقول ايه ؟!!

" تعالوا بينا ننصر نبينا

(( لحد دلوقتي حلو الكلام .. ننصر نبينا ازاى بقى ؟!! ))

اتصل الآن على 09005565 وحمل احدث الرنات والنغمات الاسلامية

سام يوووووسف يا مصطفى يا امام المرسلين

حمادة هلال .. محمد نبينا

الخ .. الخ .. الخ "


انا اذبهليت شوية كده وبعدين فوقت على كلمة واحدة

(( حسبي الله ونعم الوكيل ))

ننصر نبينا بالمعصية ؟؟!! كلنا عارفين ان الاغانى حرام

آه للأسف بسمعها بس عارفة انها حرام وبطلب من ربنا يتوب عليا

لكن اللى هم بيعملوه دا بجد ما يتوصفش بحاجة اقل من كلمة (( وقاحة )) .. اسوأ استغلال للدين

اسوأ استغلال لمكانة الدين عند المصريين

واسوأ استغلال لاحداث محاولة الغرب للاساءة للرسول الكريم - عليه افضل الصلاة والسلام -

اكييييييييييييد فى ناس كتير هتتصل وهي متخيلة انها كده عملت اللى عليها و 100 فل وعشرة

ليه بقى يوجعوا قلبهم ويقاطعوا المنتجات الدنماركية

ماهم خلاص نصروا النبي بالنوبايل

بالاخ سام والاخ حمادة

ودمتم

بجد مش عارفة اقول ايه يعنى استهبلوا و 0900 بقت في كل حاجة .. اتصلوا اعرفوا

وصفة مطبخ اتصلوا اعرفوا حظكم النهاردة اتصلوا اعرفوا مواعيد الصلاة

وسكتنا وقولنا ماااااااااااااشى

عبيط وبيستعبط لكن كده ؟؟

دا كده استهبال رسمي ..

هقول ايه حسبي الله ونعم الوكيل

كلمة اخيرة

نبينا ربنا هو اللى ناصره وبينصره دايماً ومش المعصية هى اللى هتنصر نبينا وتزود عنه




2008-09-08

اهو امثالك هم اللى جايبنا لورا


" اهو اللى زيك هم اللي جايبنا لورا "
جملة بنسمع شخص تفكيره متحرر بيقولها لشخص متزمت
ومتزمت بيقولها لمتحرر
وملحد بيقولها لمتدين ومتدين بيقولها لملحد ..
ومثقف بيقولها لواحد مش بيهتم بالثقافة
واللى مش مهتم بالثقافة شايف المثقف بني آدم فاضى وامثاله هم اللي جايبنا لورا
و .......... الخ
وفى الحقيقة بقى ان اول الناس اللى جايبنا ورا
هو البني آدم اللي بيفكر كده وبيقول كده ..
لأنه ببساطة بكده انسان رجعى لأنه بيعمل بالكلمة دى حاجتين :
الاولانية : انه مش بيحترم تفكير وآراء الناس المخالفة لرأيه
ودى سمة من سمات الشعوب المتخلفة
وسمة من سمات الحكومات الديكتاتورية
اللى هى سبب اساسى ورئيسى لتخلف الشعوب

التانية : انه بيتجاهل كل اسباب التخلف وبيحصرها فى سبب واحد بس
(( انسان ليه سلوك معين او تفكير معين ))
وبيتجاهل الاهمال وبيتجاهل الظروف الطبيعية
وبيتجاهل العادات الخاطئة وبيتجاهل انه هو نفسه مقصر فى حاجات كتير
وبيفكر بس في ان الانسان دا هو السبب الوحيد فى اننا بنرجع لورا
البني آدم اللي بيفكر كده بينسى دايماً ان اهم اسباب التقدم
هى اننا نتعامل كمنظومة متكاملة ..
كأننا بالظبط دايرة
لو في خلل فى اولها عمر ما اخرها هيكون مظبوط والعكس
واللى بيفكر كده بينسى انه المفروض قبل ما ينتقد اللى قدامه
يبص لنفسه الاول ويصلح من عيوبه ومشاكله ويعمل اللى عليه
علشان على الاقل يتمتع بمصداقية
قدام الطرف التانى اللى هو بينصحه
ربنا يهدى الجميع يارب
_________________________
ع فكرة يا جماعة .. تم افتتاح مدونة هتجوووووز .. هتجووووووز
http://lolololy.blogspot.com
وهو اسم مؤقت لحد 4 ايام وهتبقى أخيراً اتجوزت
اتمنى تتابعوها لأنها فيها نفس روح بنوتة لاسعة
لكن تخصصها اجتماعى اوى
او بمعنى ادق مشروع لحياة سعيدة فيها احترام متبادل
وفيها بردو مشاكل وفيها كل حاجة واقعية ..

2008-09-05

جائنا البيان التالي ..

جائنا التاج التالى

دا

من احلى دودو

بس مش حليته هنا حليته فى شاي بلبن

واللى هحط فيها بعد كده الحاجات الـ Funny

فياريت تنورونى هناك


آه صحيح نسيت اقولكم انى نجحت :)

آه والله بكل بساطة كده نجحت

الخبر دا مخلل اساساً فى ناس تعرفه من الفيس بوك وناس ما تعرفهوش

بس حسيت انى عايزة اقوله دلوقتى

نجحت من زمان كده بس ماكنتش بدخل المدونة قد كده فما قلتش


2008-09-01

ها .. هتصوم ولا زى كل سنة ؟!!






فى رمضان كل ما حد يقابلك يقولك بهزار


" هااااااااا هتصوم بقى ولا زى كل سنة "


عايزين الحق ؟ انا كنت بدأت اتخنق من الجملة دى


وبستسخف اللى بيقولها


بس حسيت انى عايزة اقولك دلوقتى


" هتصوم ولا زى كل سنة ؟!! "


ممكن تكون انسان زى الفل وصيامك كل سنة 100 فل وعشرة


بتتقى ربنا بجد و بتحافظ على صيامك


انت بقى تبقى تماااااااااام وياريتك تصوم كل سنة زى كده


كلامى بقى للناس اللى زى حلاتى


ايوة الاعتراف بالحق فضيلة ، انا كل سنة بحس ان صيامى مش نافع ببصلة


انا بفضل محافظة على صيامى اول يوم


تانى يوم


تالت يوم


رابع يوم ببدأ انسى اننا فى رمضان


غصب عنى ابقى بهزر مع اصحابى ونتريق على واحدة


او نجيب فى سيرة واحدة


او اكون فى البيت وانسى نفسى فى الكلام مع اختى


فى المواصلات اشوف حد يعمل اى حاجة اتريق او اعلق


وهووووووووب هى غلطة واحدة وابدأ احس ان صيامى ضاع


واستهبل بقى باقى الشهر


ارجع تانى اتفرج على تليفزيون


واسمع اغانى


وابقى زى اللى ربنا قال عليهم


مش بينوبنى من صومى الا الجوع والعطش


بجد نفسى السنة دى اصوم غير كل سنة


اصوم بجد


اصوم وانا صاينة لسانى واصون عينى وودانى


يعنى نفسى حواسى كلها توجب معايا كده وتصوم


يلا انا قولت الكلمتين اللى فى نفسى


وكمان عايزة اقولكم انى اخيراً خرجت من البيات الصيفى وهرجع تانى اشتغل فى المدونة


كل سنة وانتوا طبيبن


وصوموا بقى مش زى كل سنة ها


ههههههههههههه


بالمناسبة بقى


ايه رأيكم فى النيولوك بتاع المدونة ؟؟


افتكروا كويس انكم صايمين يعنى قولوا الحق