2009-02-18

هي نمكي دي كلمة عيب ؟؟

أول مرة سمعت فيها الكلمة دي مش فاكرة كانت فين بالظبط لكن فاكرة كويس أوي أن الطريقة اللي كانوا
بيقولولها بيه حسستني انها كلمة عيب ، أو ع الاقل شتيمة
بعدين في ليلة من ذات الليالي سمعت ممثل باين في الراديو بيقول على نفسه نمكي ..
قولت يالهوى دا صريح أوي بيشتم نفسه على الملأ كده ؟!!

بعدين اتغاظت بقى لأن دي كانت تاني مرة اسمعها فقولت لأ بقى لو ما عرفتش معناها هطق من الغيظ
فقولت اسأل ماما .. روحت اسأل ماما وأنا في وسط هدومي بقى وانا متوقعة ماما هتهزأني علشان بنطق
الألفاظ دي .. واستعديت بقى للدفاع عن نفسي واني والله يا ماما اول مرة انطقها وكده
فلاقيت ماما بتضحك لما قولتلها " احم .. ماما هي نمكي دي كلمة عيب ؟؟ " انا استغربت ان ماما بتضحك واني
لسة ما اتهزأتش لحد دلوقتي فقالتلي بقى ان معناها حد " بيحبكها أوي في الشغل ولازم يعمله على سنجة عشرة "

ساعتها اتحرق دمي .. بقى اللى بيشتغل كويس وضميره صاحي الناس تتكلم عنه كأنه عامل جريمة
والكل يتهرب من الشغل معاه ؟!!

بدل ما كل واحد يتمنى يبقى زيه ويشتغل بضمير ويتعلم منه ؟؟

لأ والانيل من كده انه هو نفسه معتبر ان دا عيب فيه وبيتمنى يتخلص منه
او ع الاقل حاجة بيتكسف منها ؟!!

يعني حتى لو في حد طالع عنده ضمير نعمة كده من عند ربنا مع اول تعامل مع بني آدمين بيبصوا البصة دي للي عنده ضمير
هيبطل على طول مش شرط يكون مقتنع بس ع الاقل هيقول يعنى انا بتعب نفسى وبشتغل بضمير
وبحرق في دمي واعصابي وفي الاخر ابقى كائن مكروه والناس تتهرب مني !!طب وعلى ايه ما انا اريح واستريح وخلاص بقى

وفي الآخر نرجع نقول " ياااااااااااه الدنيا دي بقت وحشة أوي مابقاش في حد عنده ضمير يا أخي !! "

هناك 14 تعليقًا:

  1. اول زيارة

    واول تعليق

    يعنى انفراااااااااااااد

    انا اول مرة اسمع برضو عن كلمة نمكى دى
    بس اهو القاموس بدأ يزداد وتمت الاضافة للقاموس اللغوى بتاعنا

    البوست حلو والمدونة كلها ماشاء الله جميلة
    تحياتى بكل ود

    ردحذف
  2. أنا بيتقالي الكلمة دي كتير :)
    بس الحمد لله اني عارف معناها وكويس اني عرفتيني ان في حد ميعرفش معناها عشان ملا تتقالي قدام حد ابقي اوضح للناس ليفتكروني مش مظبوط ولا حاجة

    ردحذف
  3. والله هى بلدنا إلىمشيا بالعكس فى كل حاجة
    يلا بقى ربنا يستر علينا
    دمتى بكل الود سمو الأميرة

    ردحذف
  4. سمسم ههههههههههه طب خلي بالك اول تعليق بيدفع خمسة جنيه ههههههههههه
    لأ بجد منورني اوي وفرحاااااااانة ان في حد ماكنش يعرف معناها يعنى انا قاموسي مش وحش اوي هههههههههه

    ردحذف
  5. تامر دياب : هههههههههههههه اه والله انا لو كنت ماعرفش معناها وحد قالها على حد قدامي ممكن ما اكلموش ههههههههه منورني

    ردحذف
  6. محمد غاليا : اه الله ماشية بالعكس

    بتفكرني بجزء من اغنية قضية رأي عام

    نقول ع العتمة نور ونقول ع الضلمة فجر

    منور داااااااايما يا محمد وسعيدة بيك

    ردحذف
  7. الطائر الحزين : انا استااااااااذة طلسقة وكروتة في شغل البيت لكن شغل اي حاجة برة او اي حد يطلب مني حاجة لازم اعمله حلو .. بس تصدق الكروتة اريح هههههههه

    ردحذف
  8. على فكره لقب عائلتى النمكى :)

    ردحذف
  9. على فكره لقب عائلتى النمكى :)

    ردحذف

  10. كنت بعمل بحث جوجل على (نمكي) و جايلك طازة من جوجل , اصل انا نمكي و حبيت اعرف اذا كان الناس بيشوفوا الحاجة دي عيب في الانسان او لأ , للأسف الناس بتشوفها عيب ..بس هناك فرق .. بين واحد بيعمل من الحبة قبة و واحد عنده بجد قضية فعلية و تستاهل الدقة و الاجتهاد .. تحياتي لك ايتها البنوتة التي لا اعرف لها مكان او زمان او شكل او ..

    ردحذف

  11. كنت بعمل بحث جوجل على (نمكي) و جايلك طازة من جوجل , اصل انا نمكي و حبيت اعرف اذا كان الناس بيشوفوا الحاجة دي عيب في الانسان او لأ , للأسف الناس بتشوفها عيب ..بس هناك فرق .. بين واحد بيعمل من الحبة قبة و واحد عنده بجد قضية فعلية و تستاهل الدقة و الاجتهاد .. تحياتي لك ايتها البنوتة التي لا اعرف لها مكان او زمان او شكل او ..

    ردحذف
  12. وانا برده اصلي نمكي وافتخر

    ردحذف

Say something...