لعلمك

لعلمك

إقرأ لي

دخلوا بكليك شمال :D

Blog Archive

السبت، أكتوبر 31، 2009

postheadericon فجأة كده ؟!!!


(1)







كانت قطة صغيرة .. من يوم ما اتولدت مامتها بالنسبة لها الحصن والأمان

كل يوم بتنام في حضنها وبتلعب معاها ولو نسمة هوا حاولت تيجي جنبها كانت مامتها تقف لها

اتعودت انها لما تجوع تجري على مامتها


ولو خافت تستخبى في حضنها

فجأة .. راحت تترمي في حضنها ضربتها وطردتها


كانت مستغربة والحيرة في عينيها تقتل


امبارح كنت نايمة في حضنك .. النهاردة هنام فين ؟؟


و ازاي انتي اللي تضربيني وانتي اللي كنتي بتحميني ؟؟


شوفت المشهد دا كتير أوي بحكم اني بربي قطط من صغري

ودايماً بتعذب من اللحظة دي

اللحظة اللي القطة الأم قررت خلاص ان بنتها كبرت ومالهاش مكان جنبها


اللحظة اللي القطة الصغيرة بتبقى الحيرة هتقتلها

ومش عارفة هي عملت ايه غلط تستاهل عليه ان مامتها تعمل فيها كده

فجأة كده .. بتلاقي نفسها كبيرة وهي من جواها لسة صغيرة


 


 (2)



وهي صغيرة .. أبوها هرب وساب الحمل كله على مامتها




راح شاف حياته وسابهم في وش التيار 

وكانت دنيتها كلها هي امها .. فجأة .. مامتها ماتت ولقت نفسها لوحدها

واتنقلت من بيت خالها لخالتها لخالها وهكذا .. كل شوية حد يبهدلها

كانت حاسة بخوف وانها دايماً مهددة

لحد ما اتقدملها انسان كويس .. طلع طيب أوي وبقى جوزها

بقى دنيتها كلها .. عوضها عن الأب اللي هرب

وعن الأم اللي ماتت

وحست بالأمان

وكانت الدنيا بالنسبة لها متجسدة في انسان واحد

جوزها ..

كان هو الأمل والأمان والحياة

وكمان .. أبو ابنها اللي بقى عنده سبع شهور في بطنها

....

زي كل شهر .. رجع في اجازة .. وسافر تاني علشان لقمة عيشه

فجأة .. تليفونها رن

وقالوا لها انه مات !!


فجأة كده !!


ايوة وهو بيركب القطر وقع تحته

فجأة كده بقت لوحدها

كان لسة حالاً بين ايديها وكانت بتودعه

كان لسة حالاً بيضحك لها وبيسألها مش عايزة مني حاجة ؟

فجأة كده !! فجأة كده بقت لوحدها ؟؟

من غير أمان ولا أمل .. مالهاش فعلاً أي حد في الدنيا

حتى ابنها اللي ما شافش ابوه لسة قدامه كتييييييير أوي عقبال ما يبقى سندها في الدنيا

........


احساس صعب اوي .. كأن حد شال من عليك كل هدومك وسابك في المطرة من غير غطا


_______________________


هتفهم قصدي أوي كمان لما تسمع دي



10 بوينتس أوف فيو:

محمد الوكيل يقول...

أخيراً تدوينة جديدة سارة-سان!
تدوينة بجد جميلة ومؤثرة أوي.. وعلى كلٍ نحمد ربنا على كل حال.. دي سنة الحياة ولو كان الدوام لأحد مكنتش عجلة الحياة هتدور.. ولو كان حد أولى بالدوام من البشر لكن سيدنا النبي عليه الصلاة والسلام..

شكراً يا سارة-سان على التدوينة دي بجد أحسنتِ..

محمد الوكيل

سمو الأميرة سارة يقول...

:) منورني يا محمد بجد
فعلاً الحمد لله انا بحمد ربنا اني بشر لما بشوف المشهد دا يتكرر كذا مرة مع القطط

أما بالنسبة للي زوجها مات .. فأكيد كلنا هنموت .. بس في حالتها اكيد هي كانت بتتمنى تموت قبله لأنها كده فعلاً ميتة

أبو كريم يقول...

سمو الأميرة سارة

كيفك وكيف أحوالك

تدوينه حلوه والغنوه اضافه بجد

متتأخريش علينا فى التدوينات

أبو كريم

سمو الأميرة سارة يقول...

ابو كررررررريم منووووووووووورني
يارب تكون بخير

ميرسي أوي ليك وماتقلقش انا هزهقكم بوستات بس انت ادعيلي

فؤاد العبيدي يقول...

السلام عليكم ورحمة الله وبركاته وبعد :- الذي حصل كله من تدبير الخالق عز وجل ولا يد لمخلوق فيه (ومن يتق الله يجعل له مخرجا ويرزقه من حيث لا يحتسب ) وهناك مثل جميل يقول في رب اسمو الكريم فيا كريم ارزق واستر وارحم وانت خير الراحمين

سمو الأميرة سارة يقول...

فؤاد العبيدي .. أهلاً بيك ، انا عارفة اكيد ان دا تدبير ربنا وأكيد فيه الخير
بس اللي عايزة أقوله ان حياتنا فجأة ممكن تتقلب رأساً على عقب

موناليزا يقول...

وما أصعبه من احساس

katty Dolly يقول...

:((

علي فكره فعلا :((

للاسف الدنيا ممكن تتقلب ف ثانية :((

أع ـقل مـ ج ـنـونــة يقول...

بكيت بجد !
مش حمل بوست زي دا ف الايام دي ياسارة
:((
بس بجد أحسنتِ
طول عمرك مبدعة ;)

أسرار النــدى ,,, يقول...

إحساس صعب جداااااا......
إنك كبرت فجأةوبقيت عليك المسؤولية خلاص....
-وتلاقيك كده زي ما تكون مراقب نفسك..
.
يا ترى هتنجح في مهمتك في الحياة ..؟؟
ولو مريت بفشل ...
يا ترى هيكسرك ..ولا هتتعلم منه وتعدي وتشوف الدرس اللي بعده ؟؟؟
.
.
المجهول واللي مستنيك في الدنيا بيخلي عندك إحساس بإنك مش عايز تكبر وعايز ترجع طفل تاني يعك الدنيا.. وباباه ومامته يصلحوا (^_^)...
بتبقى مخضوض إن محدش هيبقى مسئول عن أخطائك أو هيدافع عنك غير نفسك...
.
.
بالنسبة بقى للي زوجها مات...
بجد يا سارة وصفتي وأبدعتي كالعادة...

بيبقى صعب لما تحس معاني الأمان والإطمئنان ومن كتر حبك للإحساس ده ....بتبقى عايش خايف ديما وقلقان لا تروح منك.......

والأصعب بقى لما تتحقق مخاوفك وفعلا تفقدها فجأة بدون سابق إنذار.....

اللي يحصله كده...
يبقى يتولاه ربنا في كسوره االلي هتصيب روحه....
ومبيملكش لنفسه غير الدعاء بالصبر...

..............متغبيش علينا بقى بالبوستات الرائعة ديما دي يا سارة (^_^)

المتابعون

اعتبرها بيتك ♥

وِش القفص

خليك ورايا

دليفري..