لعلمك

لعلمك

إقرأ لي

دخلوا بكليك شمال :D

Blog Archive

السبت، نوفمبر 21، 2009

postheadericon لأ




لأ ..  حياتي مش ملك إيدك ، ومش من حقك تخططهالي .. حياتي دي بتاعتي أنا 

ربنا إدهاني أنا وهيحاسبني أنا عليها ..

لأ .. انت ماتعرفش مصلحتي اكتر مني ، لأني عارفة نفسي أكتر من أي حد

لأ .. مش هسكت بعد كده على حقي ، ماحدش مستاهل أتنازل علشانه عن سعادتي والحاجة اللي تبسطني 

لأ .. مش هخاف من مواجهتك .. سكتت سنين وبردو مافيش حاجة بتتغير واعتبرت سكوتي حق مكتسب

لأ .. مش همشي جنب الحيط لأني هبقى أول واحدة تموت لما الحيطة تقع

لأ .. مافيش حاجة اسمها مستحيل ، لو عايزة حاجة بجد هقدر أعملها ..  ولو فشلت مرة واتنين وتلاتة أكيد في يوم هنجح

لأ .. مافيش حاجة اسمها مافيش أمل .. طول ما ربنا موجود يبقى في أمل

لأ .. دا مش اسمه رضا بالنصيب .. دا اسمه استسلام وضعف وجبن

لأ .. أنا مش بنفخ في قربة مخرومة ، حتى لو نتيجة شغلي مش ملموسة كفاية اني حاسة اني بعمل حاجة .. والثواب عند ربنا مش هيروح 

لأ .. كله مش محصل بعضه ربنا سبحانه وتعالى قال

بسم الله الرحمن الرحيم

‏﴿ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لا يَعْلَمُونَ ﴾ ‏[‏الزمر‏:‏9‏]‏‏ 

صدق الله العظيم

لأ .. أنا مش هعمل حاجة طول ما انا مش مقتنعة بيها .. وطظ في أي حد عايزني أرضيه على حساب نفسي 

لأ .. مش هسمع أي كلام وحش عن أي حد ، لأني ما احبش اكره حد وما احبش اني اسمع كلام زيه عني

لأ .. مش عايزة أقرب من حد ، انا كده مرتاحة وحياتي فيها ناس عندي بالدنيا بحالها

لأ .. مش هتغير علشان انت عايزني اتغير .. أنا هتغير لو حسيت إني محتاجة أتغير 

لأ .. مش هنافقك علشان احسسك اني بحبك .. أنا هقولك الحقيقة لأني بحبك

لأ .. مش هخبي واداري وجهة نظري أو رأيي في أي حاجة لأن " كل الناس " رأيها غير كده 

لأ .. مش معنى ان كل الناس مقتنعة بحاجة تبقى الحاجة دي صح ، 

على أيام سيدنا ابراهيم كان كل الناس مقتنعة إن الاصنام هي آلهتهم ماعدا سيدنا إبراهيم .. 

وكانوا كلهم غلط وهو لوحده اللي صح 

لأ .. مش هسمح لأي حد إنه يعاملني بطريقة ما تناسبنيش .. اللي عايز يدخل عالمي لازم يلتزم بقوانينه 

لأ .. مش هنفذ أوامرك من غير تفكير ، لأن الحيوانات  الأسيرة بس هي اللي بتعمل كده .. وأنا ربنا خلق لي عقل علشان افكر بيه



11 بوينتس أوف فيو:

محمد أبوسنة يقول...

طبعاً كالعادة كلام جميل و أكتر حاجة عجبتني
لأ .. مش هسمح لأي حد إنه يعاملني بطريقة ما تناسبنيش .. اللي عايز يدخل عالمي لازم يلتزم بقوانينه


بجد شديدة دخلت دماغي و مش هتطلع منه :)

و أكتر واحدة معجبتنيش
لأ .. مش عايزة أقرب من حد ، انا كده مرتاحة وحياتي فيها ناس عندي بالدنيا بحالها

مش عارف يا سارة يعني بردو أنك متعرفيش ناس جديدة و تكتفي بالي تعرفيهم مش حل لازم تعرفي ناس جدبدة
أكيد في منهم الوحش و بردو أكيد فيهم الكويس

مش عايز أطول عليك من الأخر تدوينة جاااااااااامدة جداً

شباك موارب/منار يقول...

لا بتاعتك جميله جدا
خليكي قويه وقليها علطول
ومايهمكيش الناس
وخليكي برضو واقعيه
وربنا يكتبلك الخير

غير معرف يقول...

جميلة قوى ياسارة
أجمل كلمة فى الدنيا هى كلمة لأ

"لأ .. أنا مش هعمل حاجة طول ما انا مش مقتنعة بيها .. وطظ في أي حد عايزني أرضيه على حساب نفسي "

أنا شايفة إنه ممكن يكون فيه ناس كتير تستاهل إنى آجى شويه على نفسى علشان أرضيهم وأضحى علشانهم زى ما هما ممكن يضحوا علشانى

Eng Sarah يقول...


ااااااااااااااه ياساره لاه لاه لاه

جميله جدااااااا

بس
):

اقصوصه يقول...

لا لاي شيء ما نبيه :)

سمو الأميرة سارة يقول...

محمد ابو سنة منووووووورني ،

عارف يا محمد انا بعرف ناس جديدة وكل حاجة بس مش بقرب أوي منهم انا تعبت من الصدمات في الناس وما بقتش متحملة
اوقات ما بقربش من ناس رغم انهم يستاهلوا القرب لكن انا ما بقدرش يكون في حياتي ناس اكتر من كده مش هعرف اراعيهم واديهم حقهم .. نووورتني يابوسنة :)

سمو الأميرة سارة يقول...

منار نوووووووورتيني ياقمر
وانا ناوية اسمع كلامك بس يارب اقدر استمر كده

سمو الأميرة سارة يقول...


غير معرفة

اجى شوية على نفسي اوك واضحى وكل حاجة لكن ما اعملش حاجة مش مقتنعة بيها
لما اضحي علشان ناس بحبهم هبقى مقتنعة اني بعمل كده تضحية علشانهم لكن ماحبش حد يجبرني اعمل حاجة علشان ارضيه بس

نورتيني ياقمر :)

سمو الأميرة سارة يقول...



سارورتي حبيبتي منوووووووووووورة ياقمر

سمو الأميرة سارة يقول...


اقصوصة ايوووووووووة هو دا الكلام :)

فركشاوي ..ناوي يقول...

لأ ...
صح عندما نكون علي حأ.
لكن لمن نقول لأ...
ولا نقولها لمن ...
هل يمكن ان اتخيل..
أن أحد الاأت لبابا مثلاً ؟
لا تصح أي لا لبابا او ماما
إلا في حدود الأدب
وأظن أنني هنا لأتعلم منكم الأدب .

المتابعون

اعتبرها بيتك ♥

وِش القفص

خليك ورايا

دليفري..