" مش على بعضي "
دا الوصف الدقيق لحالتي
ماعرفش مالي بجد
حاسة اني فرحانة وزعلانة في نفس اللحظة
حاسة اني مش مستطعمة الدنيا
بكل حاجة فيها
لا كلمة حلوة ولا لحظة حلوة ولا اكل بحبه
باكل وبشرب لأن الناس بيعملوا كده
واحيانا لأني بحس اني هقع من طولي فبكتشف اني لازم اكل
مخنوقة اوي مش عارفة من ايه
هو في الحقيقة انا تقريباً عارفة بس مش عارفة اشمعنى دلوقتي مخنوقة اوي كده
بقفل موبايلي لأني مش عايزة حد يكلمني وارجع في نفس اللحظة افتحه وابص له وانا متضايقة لأن " ماحدش " اتصل .. ولما يتصل اي حد ما ببقاش عايزة ارد .. رغم اني وحشني اتكلم مع أي حد
اشغل اغنية بحبها وفجأة اتخنق منها ومش قادرة اكملها واجيب غيرها ويادوب دقيقة واتخنق منها
حاسة اني مستعجلة اوي ماعرفش على ايه وفي نفس الوقت مكسلة حتى افتح عيني واصحى من النوم
اكتشفت مؤخراً اني بنام مش لأني محتاجة انام لأ انا بنام لأني محتاجة " ما اكونش صاحية " ولما بنام بقيت اخرف كتير اوي في الاحلام
حاسة اني محبوسة وعايزة اهرب من ايه مش عارفة !! والله اول امبارح كنت عاملة زي النمر المحبوس عمالة امشي في اوضتي واقف وامشي لحد ما دوخت فقعدت فما طقتش فوقفت تاني
كل ما امسك الكتاب اتخنق اوي واحس اني عايزة اعيط رغم اني انا اللي اخترت الكلية دي وبحبها
وحشتني حاجات كتير اوي وناس كتير اوي واول حد وحشني هو " أنا "
خسرت ناس وحاجات كتير وكسبت بردو حاجات وناس اكتر بس حاسة اني زمان من غير الحاجات اللي كسبتها والناس اللي كسبتها كنت احسن
كنت بريئة شوية اكتر وكنت صافية وطفلة اكتر
يمكن انا كده كده كنت هبقى كده علشان كبرت شوية عن زمان
بس مش عارفة
لما بضحك او حد بيقولي خبر حلو اليومين دول بضحك ضحكة مقطومة وبفرح فرحة مقطومة كأني فجأة بفتكر ان في حمل تقييييييييييييييل اوي عليا
المفروض ان مافيش حالياً حمل بس بكرة في حمل ومش عارفة ليه شايلاة من النهاردة
مش عارفة مالي
...............
انا بجد خايفة