2009-09-27

هيييييييييييه لقيت فكرة






اكتر حاجة ممكن تخرجني من أصعب حالات الاكتئاب واليأس والاحباط

هي الفكرة .. أي فكرة المهم انها فكرة جديدة

فكرة اكتبها .. فكرة ارسمها .. فكرة مفاجأة حلوة لأصحابي او لحد بحبه

فكرة مجنونة اعملها حتى في شعري في لبسي في اوضتي

أي حاجة .. المهم اني احس اني اقتنصت فكرة

وهنفذها قبل أي حد تاني ،
 
والمهم ان الفكرة دي لما هتطلع للنور هتحسسني اني انجزت حاجة

فبمجرد ما الاقي الفكرة ممكن اقوم اتنطط

ممكن اسقف بإيدي اووووووي واصوت صويتة فرحة

وغالباً الفكرة دي بتسرق مني النوم .. يوم يومين تلاتة ممكن شهور

لحد ما انفذها او احس انها مش قد كده

ولما يكون مثلاً لازم استنى وقت معين علشان انفذها

بحس ان الفكرة هتشق قلبي وعايزة تخرج

بحس اني انا نفسي عايزة اخرج برة جسمي

برة حدود الوقت والزمن والمكان

علشان انفذ الفكرة وارتاح

ولما تجي لي الفكرة بالليل ، ما بعرفش انام الا لما افكر كويس اوي في الفكرة

وممكن انام بقى .. بعد ما الفكرة تتظبط في دماغي وتبقى تمام

وانام واقنع نفسي اني لازم انام علشان اصحى

فبنام من باب استعجال الصبح :)

ممكن اوي لما اصحى من النوم احس قد ايه الفكرة سخيفة واني مش هنفذها

بس المهم في كل الحدوتة

اني خرجت من شرنقة اكتائبي وزهقي

فكسبت روحي من تاني

واحياناً بكسب روحي ، وفكرة جديدة

2009-09-25

نفسي في حاجات

 
نفسي أركب عجلة



نفسي أركب عجلة بالليل وأمشي في طريق مالوش نهاية

واكون بسمع منير وفيروز وأشم هوا نضيف

وأحاول شوية انسى الهم

وما اكونش قلقانة ولا ورايا مواعيد


  

نفسي الدنيا تمطر



نفسي اوي الدنيا تمطر وأمشي ادوس في الماية زي البنوتة دي

لا يهمني هدومي تتوسخ ولا نظرة الناس ليا

نفسي أحس المطرة بتغسل كل الدنيا

بحب أوووووي الناس لحظة المطرة

الكل بيبقى بيجري وسايب الناس في حالها وبيبص لنفسه بس

الكل محتاج يحس بأمان ..

محتاج يستخبي في حد أو حاجة

مش أنا لوحدي


            

نفسي في قطة




نفسي في قطة شقية كده وصغننة شوية

اشوفها وهي بتكبر يوم عن التاني

اخد بالي من أكلها وشربها ونومها 

وتضحكني كل شوية بحركة بريئة تعملها

لما تلاقيني ساكتة تقعد تلاعبني

ولما تلاقيني بعيط تيجي تتمسح فيا بحنية وتبص في عنيا بحزن

فاحضنها واضحك زي زمان 

نفسي في قطة تقعد تعمل كل شوية حاجة جديدة واحكي عنها حكايات للصبح

نفسي بجد في حاجة تخليني اشتاق لرجوعي للبيت 
 
 
 
                  

نفسي في بيت 





نفسي في بيت صغير أوي .. مافيهوش اوض كتير

يكون بتاعي لوحدي .. انا اللي عملته 

وكل ما يبقى معايا فلوس اجيب فيه حاجة صغيرة جديدة 

وانا اللي ارتب كل حاجة فيه 

ويكون في مكان بعيد عن الناس .. بس مش اوي

اشوفهم من بعيد ، واحس بيهم حواليا

لكن في نفس الوقت انا عايشة في هدوء 

والبيت دا يبقى حقيقي الحاجة الحلوة اللي بتصبرني على الدنيا

كل ما حاجة تضايقني برة .. اتصبر بإني لما هرجع البيت هرتاح

يكون في كتب كتير و يكون فيه قطة واحدة

وبلكونة صغيرة فيها ريحان 

و اقعد كل يوم ساعة الفجر فيه اقرا .. اقرا قرآن الأول وبعدين اروح اعمل كوباية نسكافيه

واقرا في كتاب بحبه 

ومن وقت للتاني اعزم واحدة من اصحابي اللي بحبهم أوي 

ونقعد طول اليوم سوا نعمل اكل وناكل ونتفرج على التليفزيون 

ونقعد نرغي مع بعض ونضحك 

صحيح لما تمشي تروح هحس اني وحيدة أوي

بس هتيجي القطة تلاعبني وتسليني وتفكرني اني مش لوحدي

 
 


2009-09-19

بأي حال عدت يا عيد ؟؟ ماتروح احسن يا شيخ :D





بتفررس من العالم الكئيبة اللي اول ما العيد يقرب

تلاقيها تقعد بقى ليل ونهار

على الماسنجر وعلى الفيس وكل ما تشوف خلقة حد تقول

" عيد ؟؟ بأي حالٍ عدت يا عيد "

وتقعد بقى تفكرك بمآسي المسلمين من أيام قريش

وازااااااااااااااااي تعيد وهم زعلانين ؟؟


وازااااي تفرح وتاكل وتشرب وتنبسط وهم تعبانين ؟؟

ياسلاااااااااااااام !!

يعني انتوا ما بتفتكروش انهم تعبانين الا في العيد ؟؟

العيد اللي ربنا أمرنا نفرح بيه وننبسط ؟

ونهى عن الكآبة في العيد وعن زيارة المقاابر !!

حاجة تفرس بجد

دا انا كمان بفترض .. بفترض يعني انهم ناس بعملوا باللي بيقولوه

وفعلاً شايلين هم المسلمين

كتير اوي بحس انهم ماشيين بنظام .. خالف تعرف مش اكتر

مش الناس كلها فرحانة ؟؟ احنا بقى زعلانين ومقهورين وهنقهركم معانا

اوك ماشي شيل هم اخواتك في الاسلام

وافتكرهم وادعي لهم

لكن ما تحاولش تقنعني اني لما افتكرهم يوم العيد وانكد على نفسي

وانساهم طول السنة كده هم هيرتاحوا او يستفيدوا

ما علييناااااااااااااااا

ربنا يهديهم يارب


انا بقى عايزة اقولكم كلكم نفر نفر كل سنة وانتم طيبين

يارب يبقى عيد سعيد عليكم كلكم

وعلى كل احبابكم

ويارب يبقى بداية لصفحة جديدة في حياتكم

و يارب حياتكم كلها تبقى زي السكر بتاع الكحك

طعمها مسكر .. وريحتها حلوة .. ونااااااااعمة :)



2009-09-18

أميرة اللاحرب

برغم انها لو دخلت كل حروب الدنيا هتنتصر ..

هتنتصر بالذكاء .. وبالحب .. وبقوة الارادة

إلا انها .. اميرة اللا حرب

***

أول واحدة احس بجد اني نفسي اوي اكون زيها

وفي نفس الوقت خايفة اكون زيها ..

مش علشان عيب فيها .. لكن علشان الدنيا قسيت اوي عليها

ورغم كل دا .. هي اميرة بجد

عمري في حياتي ما شوفت حد بقوة ارادتها

بذكائها .. طيبتها ورقتها

ورغم كل الحزن اللي فيها ضحكتها بتنور الدنيا بحالها

***

ماحدش بيديني دفعة لقدام وثقة في بكرة قدها

وماحدش بيحسسني اني اقدر اعمل كل حاجة في الدنيا طالما انا عايزة الا هي

***





عفاف .. بحبك اوي في الله

وبحب الدنيا الصغيرة اللي جمعتنا

بحب الصدف اللي حطينا في طريق بعض

ونفسي بجد اشوفك مرتاحة البال



2009-09-17

البعض يفضلونها .. حمقاء

البعض يفضلونها قطة مغُمضة ، حتى يستطيعون استلاب ما يريدونه منها دون أن تشعر
يفضلونها حمقاء حتى لا تعلم شيئاً عن خداعهم وغشهم
يفضلونها حمقاء حتى يجدوا دائماً سبباً للومها واستعراض قوتهم عليها
يفضلونها حمقاء حتى يجدوا سبباً كي يتركوها حين يملون منها 
يفضلونها حمقاء .. كي تتحمل ما لا يطاق لأنها تظن أنها بدونهم ستموت جوعاً وعطشاً
وأنها لن تقو على حماية نفسها
يفضلونها حمقاء .. لأن الحمقاء وحدها ستطيعهم طاعة عمياء ..
يفضلونها حمقاء حتى لا تحيرهم .. ولا تشغلهم .. 
كي يتركونها في المنزل كأي آلة دون ان يلقون لها بالاً
ويتفرغون لأخرى تعرف كيف تتلاعب بالرجال
في يلادنا .. المرأة الذكية .. للاعجاب فقط لا للزواج
في بلادنا المرأة الذكية .. مخيفة  لأنها تفهم 
ومن ثم .. فإنها تتمرد
في بلادنا .. الرجال يفضلون المرأة الحمقاء

2009-09-03

أنا إنفيزابل .. إذن اعتبرني مش موجود

كام مرة كنت كاتب على الماسنجر انك مشغول ويدخل حد يستخف دمه ويقولك
" ماشي يا عم المشغول .. ازيك بقى وعامل ايه
وشوفت مش عارف مين حصل له مش عارف ليه
وديييييييييينج انت ما بتردش ليه ؟؟
ترد عليه يقولك تااااااااااني كذا حصل وفلان عمل واسمها ايه بقى قالت حتة نكتة و................ رغي متواصل وما يفكرش لحظة انك كاتب مشغول "
ولو قولت عندي شغل يقولك اللي اداك يدينا ياعم و........... يكمل نفس الحوار
اوك انت صاحبي وانا بحبك وبحب اتكلم معاك والدنيا فللي ، بس انا دلوقتي مشغول
انا مش حاطة الاستيتس دي مثلاً حباً في شكلها !!
ولو دخلت اونلاين لكل البشر اللي ع الماسنجر ودخلوا كلهم كلموك ما بتبقاش ملاحق على حد فيهم
فتعالى بقى قول لحد منهم انا اسف معايا ناس .. يالهوووووووووووووي يعني هم الناس دول احسن مني ؟؟
يعني هو انا مش قد المقام ؟؟
وناس تانية بتزعل لو دخلت الماسنجر اونلاين وما دخلتش تسلم عليهم
وناس وناس وناس ..... وعلشان كده
الحل الوحيد انك تكون
Invisable
أنا بكون انفيزابل للاسباب دي :
1 - ماليش نفس اكلم حد لأي سبب خاص بيا
2 - مشغولة وبخلص شغل مش هينفع اكون بكلم حد وانا بعمله
3 - بكلم حد واحد في موضوع مهم ، او بكلم واحدة عزيزة عليا ومش بحب اكلم حد معاها
4 - قاعدة اقرا ع الجهاز ومش هعرف اركز في القراية والكلام
5 - عندي ناس كتير اونلاين ولو فتحت مش هعرف اكلم حد منهم من كتر الناس
وغيرها وغيرها من الاسباب
لكن تفتكروا اتعتقت ؟؟
لأ الناس بتستخدم البادي تشيك وتروح داخلة تقولك انت موجود
انا عارف انك موجود
اتكلم بقى
وناس تزعل وتقول لي لما مش بتكلمينا ضيفتينا ليه ؟؟
وناس ما بتتكلمش من اساسه وتروح حذفاني على طول
ياااااااااااااااااااااااريت يا جماعة لما حد يشوفني انفيزابل يعتبرني مش موجودة
إلا اذا طبعاً روحت انا اكلمهم :)
وانا والله لو شوفتكم موجودين وانفيزابل ولا بيزي مش هكلمكم
اكيد كلامي دا لا ينطبق على ناس معينة
هي عارفاني كويس وعارفة اني مهما كان حالي بكلمها لأنها ناس قريبة مني وعارفة تقريباً كل حاجة عني
فلو متضايقة من مشكلة هي بتبقى حاسة انا متضايقة من ايه
وحتى لو ما قولتلهاش بتحس بيا فبالتالى الكلام معاها مش هيكون معاناة فوق تعبي