ملحوظة : البوست دا فضفضة بحتة .. ما اظنش حد هيستفاد منه حاجة
بس انا ارتحت لما كتبته ..
عندي صندوق صغير كده مسمياه صندوق الدنيا
فيه الكروت اللي اصحابي كانوا بيدوهاني من اعدادي لحد دلوقتي
فيه كمان هدايا عيد ميلادي الصغيرة
وفيها بقى صندوق تاني صغير كده فيه جواباتي اللي كنت بكتبها وانا صغيرة للقطط بتاعتي اللي ماتت
نسمة وكاميلا وبيشو وسيمبا
عمري ما كنت بكتب لهم وهم عايشين .. لأني كنت دايماً بتكلم معاهم
كنت أربعة وعشرين ساعة مع القطط
وانا صاحية معاهم ووانا نايمة بحلم بيهم :)
المهم بقى اني كل ما اتخنق كنت بكتب لهم
لحد ما كبرت ودخلت كلية تقريباً .. بطلت اكتب لهم
بس كنت كل ما اتخنق اقرا اللي كنت كاتباه ليهم
وأعيط لما اقرأ جواباتي ليهم فارتاح نفسياً بقى
ونظراً لإني مخنوقة اليومين دول ومش طايقاني
فتحت امبارح صندوق الدنيا
أول ورقة لقيتها كان مكتوب فيها
" كاميلا ولدت وجابت أربع قطط شبهها
3 اولاد : 1 بنت
يوم السبت 15/5/2004
ساعة ما قريت الورقة افتكرت كل حاجة عن كاميلا
افتكرت لعبنا سوا
وافتكرت لما كنت اقعد ع الكمبيوتر واطنشها وتروح ناطة وتضرب الشاشة
افتكرت لما كانت تقعد تتفرج معانا ع التليفزيون وتتابع المسلسل بانفعال :)
افتكرتها لما كانت حامل وكنت حاسة كأن بنتي حامل
وكل يوم الصبح ابوس ولادها ف بطنها وهم بيلعبوا كده وشكلهم حلو اوي
وافتكرت يوم ما ولدت ويوم ما عملت لولادها سبوع اول ما فتحوا ورشيت عليهم ريحان
افتكرت ابنها ابو حسنة " سيمبا " اللي كان بيحبني اكتر من مامته
ويسيبها ويجي لي من قبل ما يفتح عينه
وكنت بقول لماما اكيد دا اللي كنت ببوسه وهم ف بطنها علشان كده بيحبني
افتكرت بردو انها للأسف اختفت فجأة وولادها لسة بيرضعوا :(
وانها جات لي ف الحلم ودعتني ووصتني أأكل ولادها
وكنت برضعهم بإزازة قطرة :)
افتكرت حاجات كتيييييييييييييييييير حلوة اوي عشتها معاهم
وافتكرت قد ايه قلبي كان ابيض اوي وانا معاهم
وكنت حنينة اوي
ساعات بحس اني بقيت قاسية ومش زي زمان :(
***
.. مش عارفة علشان كبرت ولا علشان ما بقوش في حياتي
كاميلا .. وحشتيييييييني أوي بجد ومحتاجاكي اوووووي اليومين دول اكتر من اي حاجة
بيشو وسيمبا .. مفتقدة شقاوتكم اووووي .. نفسي ارجع العب معاكم
لعبكم لسة موجودة عندي :)
نسمة .. من يوم ما موتتي والخير مشي من بيتنا وحاجات كتير حلوة :(
اكتشفت اني كنت بحبك اوي وانا مش عارفة :(
***
من بعدكم ما قدرتش احب اي قطة تانية
حسيت اني هخونكم لو حبيت قطة زي ما حبيتكم
****
وانا صغيرة كنت بكتب لكم وانا متأكدة انكم حاسين بيا
بس دلوقتي مش عارفة :( يارب لو حاسين بيا تدعوا لي
زي ما زمان كنتوا بتدعوا لي وانا رايحة الإمتحان
بحبكم بجد .. وحشتوني اوي
حرام عليكي يا سارة
ردحذفده انا هعيط
اصلي للاسف من النوع اللي بيتأثر بسرعة
بس بجد كلامك حلو قوي
وواضح فعلا انه طالع من القلب
وانا مع اني مليش في القطط قوي يعني
بس حبيتهم عشان خاطرك
ربنا يوفقك
شكراااااااا
هو مع اني مش بحب القطط
ردحذفو ض تربيه القطط و خصوصا للبنات عشان الحمل و الخلفه و المشاكل الي بتعملها تربيه القطط
بس صعبوا عليا :(
بتتكلمي عنهم كانهم ولادك :)
القطط دى كائنات غريبة فعلا
ردحذفi never thought you are the cat type of person. i hate pets, all of'em. but you almost made me cry with that post
ردحذفmemories suck, and thats why i dont want anyon to remember me after i die, because it is painful to remember. you need to move on with your life and let them go
علي فكرة ده من احسن المواضيع اللي انا قرتها
ردحذفو مش زي ما انتي فاكرة اننا لازم نكتب عن المجتمع و الاخلاق و الجواز
لا بيبقي مهم اوي اننا نفضفض من غير ما نجرح حد
بجد تسلم ايدك
حلو اووووى ان الواحد يلاقى حد يفضفض له ويحكى له اللى مضايقه ويرتاح معاه
ردحذفتكون قطط تكون الكتابة المهم الواحد يرتاح
جربى تجيبى عصافير مثلا
ربنا يرزقك بزوج صالح واولاد بجد تحني عليهم وتربيهم كويس
ردحذفمش عارفة اقول ايه بجد
ردحذفاحساسك وصلني
كلامك بيدل على رقة مشاعرك
تعرفي انحنا كان عندنا قطط و مكنتش بهتم بيهم اوي و لما راحوا وقتها حاسيت قد ايه هم مخلوقات جميلة
تحياتي
فكرتيني بصديقة كانت هتموت نفسها من الحزن علي القطة بتاعتها لما ماتت... وفضلت مكتئبة بسبب القطة لمدة سنة كاملة...
ردحذفيلا شدي حيلك وهاتي قط جديد... بس يكون شيرازي وتسميه "فخري".... ههههه... فرفشي بلاش حزن...
تحياتي ياسارة
طيب ليه كده حرام عليكى
ردحذفكان عندى قطه زمان وكنت لسه بفكر فيها اوى امبارح واد ايه كنت مشتاقه جدا امبارح انى اخدها فى حضنى
يااااااااه رجعتينى تانى
انسان عادي بما انك من الناس اللي بتتأثر بسرعة يبقى اكيد لو ربيت قطة هتتعلق بيها جامد اوي خاصة وهم ماحدش يقدر يقاوم حبهم :)
ردحذفنورتني جداً والله
سبايدر مان يااااه ف البيت لأ ف البيت ايه ف العيلة كلها سمعوني المحاضرة بتاعة القطط والبنات والحمل والكلام دا مليون مرة
ردحذفاللي مكتوب ع الجبين لازم تشوفه العين
ايش ضمنني اني اعيش لحد ما اتجوز يعني ؟ :)
سيبك انت حبهم ودفاهم بالدنيا يا سبايدر والله
وبجد انا كنت معتبراهم ولادي وكان سيمبا دا اسمه الحركي ف البيت " ابن سارة " وهو كان بيطمن معايا كأني مامته بالظبط
يلا الله يرحمه :(
هراء لا داعي له
ردحذفكائنات غريبة بس بجد كائنات رائعة
فيهم قسوة وحنية غدر ووفاء طيبة ومكر فيهم كل حاجة بجد اكتر حيوان بحبه ف الدنيا دي كلها
احمد عبد الرحيم انا بحس اني بقيت زي القطط اساساً من كتر عشرتي وحبي ليهم :)
ردحذفانا متفهمة وجهة نظرك يا احمد
بس بردو شايفة ان الذكريات حياة
يعني ع قد ما عيطت وزعلت علشان افتكرت الايام الحلوة اللي مش راجعة ابتسمت وانا شايفة بعين الخيال اللعب اللي كنت بلعبه معاهم وتصرفاتهم وحركاتهم وكل حاجة فيهم :)
كاميلا لما افتكرتها واتكلمت عنها كأنها عاشت تاني ... علشان كده عايزة ما اتنسيش لما اموت .. علشان اعيش تاني
حصان المرجيحة لأ انا مش فكرتي كده
ردحذفانا فكرتي اني لما احكي خبرة شخصية علشان يبقى في مبرر لاني احكيها لازم حد يتعلم منها حاجة او يستفيد حاجة تفهمه الدنيا
مجرد كلامي عن ذكريات ممكن ناس كتير بعد ما تقراه تقول وانا مالي ايه علاقتي بالموضوع دا
زي ما بيقول دكتور احمد خالد توفيق كده
الذكريات بضاعة لا قيمة لها إلا في خزانة أصحابها :)
نوووووووورتني يا حصان المرجحية
ستار ان زا سكاي عارفة كمان خاصة امتى ؟ لما تكوني واثقة انه عمره ما هيخون ثقتك وعمر سرك ما هيطلع برة
ردحذفانا مش هجرب عصافير بصراحة انا بحب حاجة العب معاها وتكون شقية كده تجري ف الشقة وتبهدل الدنيا :)
نتمرجح سوا الصبحية :)
حاجات كتير القطط بتدي لها طعم
محمد اسامة ياااااااااارب اللهم اميييييين يا محمد
ردحذفعارفة يا زوزو انا بجد كنت بحب ارجع البيت بسرعة علشان القطط فيه
ردحذفاول ما ضاعوا كلهم وماتوا ما بقتش متخيلة البيت بجد من غيرهم ميت :(
ابو علي
ردحذفانا فضلت اكتر من سنة زعلانة على بيشو
وكل يوم عياط بالليل قبل ما انام لما افتكره
ولما قطة عندي تموت بلبس اسود عليها
ما بحبش الشيرازي بس شكلي هقتني قطة شيرازي قريب :) بس مش فخري
هتبقى اسمها هنادي ان شاء الله :)
سكرة توراد نكد قططي :)
ردحذففعلاً يا سكرة وحشني حضنهم اووووووووووي :(
نورتيني يا بنوتة
انتى بقى فكرتنى بالسلاحف بتاعتى وحشووونى اوى
ردحذفميمي انتي اللي وحشتييييييييييييني اوي
ردحذفبمناسبة السلاحف اخويا كان نفسه اوي يربي سلحفة بس انا ممكن اموت بالشلل لو ربيت سلحفة انا عايزة حاجة شقية :)