لعلمك

لعلمك

إقرأ لي

دخلوا بكليك شمال :D

Blog Archive

الخميس، يونيو 10، 2010

postheadericon هو امتى دا حصل ؟

 خالد محمد سعيد
شاب مصري عنده 28 سنه من منطقة كليوباترا بالاسكندريه
و صاحب مكتب استيراد و تصدير
كان قاعد في سايبر في وقت متاخر بالليل
و دخل بتوع المباحث بيفتشو كل اللي قاعدين باستخدام قانون الطوارئ
خالد اعترض و قال احنا بنتفتش ليه
كان تمن السؤال البرئ ده ان اتنين مخبرين مسكوه و نزلو في ضرب في المحل و في الشارع و في مدخل عماره جنب السايبر قعدو يرزعو وشه في الرخام بتاع السلم و في مدخل العماره الحديد
و خدو جثته و حطوها في البوكس و بعد 15 دقيقه رجعو رموها ف الشارع و مشيو
المصدر : أنا اسمي خالد محمد سعيد

هو من امتى دا حصل ؟
من امتى اعتبروا نفسهم فوق الناس ؟

اعتبروا نفسهم مش مننا .. نسيوا ان فيهم ابونا واخونا وابننا ؟؟

من امتى الكلام دا حصل ؟؟ وليه ؟؟

ايه الشر الفظيع الرهيب اللي عملناه فيهم يعني علشان يبقى بيننا وبينهم العداوة دي ؟؟

ايه الجبروت دا اللي يخلوهم يعملوا في شاب زي الورد كده ؟ بالوحشية دي !!

للدرجة دي مش خايفين من حاجة ولا من حد ؟؟

للدرجة دي مش خايفين من ربنا ؟ 

طب بلاش يخافوا .. هم فعلاً مش لازم يخافوا ماهم في بلدنا دي مالهمش كبير

وناسيين ان ربنا اكبر من الكل

مافيش في قلبهم ذرة رحمة ؟؟ ذرة رحمة وشفقة ببني آدم فشفشوا وشه كده وجمجمته ؟؟


قلبي موجوع اوي .. ومرعوبة أوي

حاطة نفسي مكانه ، وخايفة على اخويا اللي عارفه انه زيه مش هيقبل على كرامته الاهانة :(

بجد مش عارفة احنا رايحين على فين :( ومش فاهمة كل دا بيحصل ليه ؟؟؟؟؟؟

الولد ياعيني شكله ابن ناس لا سوابق ولا قليل الأدب :(

ربنا يرحمه ويصبر أهله يارب

12 بوينتس أوف فيو:

samy يقول...

اولا ربنا يرحمة ويصبر اهله

ويرحمنا من اللى بيحصل

طبعا دة سفالة الشرطة بتاعتنا دة اللى بيحصل

يمكن هما زودو العيار على الشاب المسكين دة

بجد سفلة

أنا بشوف كل فترة موقف بيحصل او حد من زميلى بيحكيلى بيحصل حاجات زى
السفالة دى

بس دة زيادة زيادة بجد و عوزين الناس تحب البلد طب أزاى

حراااااام اللى بيحصل مفيش حقوق مفيش ضمير

سفلة

انا اسف لان شتمت كتير بس مش قادر

samy يقول...

دة حقيقى أحنا شعب مات من اللى بيحصل فينا

ماتت احاسيسة ماتت نخوتة

عاشقه الرومانسيه يقول...

وجعتى قلبى
حسبى الله ونعم الوكيل
ربنا يحمى اخوكى واخويا وكل شباب المسلمين يارب

أبو كريم يقول...

يا سمو الأميره عامله ايه ومتألقه اليومين دول كتاب ولقاءات على النيل الثقافيه.. اللهم لا حسد × ههههههههههههه

على فكره فى صوره بشعه ليه بعد الضرب ياريت ما تشوفيهاش لانك مش هتنامى


ربنا معانا

وكما قال فاروق جويده

هذى بلاد لم تعد كبلادى

بنـوتــــة يقول...

أنا بجد و فعلاً مرعوبة جداااا
أول مرة في حياتي أحس بالخوف ده كله من الوجود في مصر
حاسة إني لما كنت برد عن اللي يقول مصر فيها و فيها و فيها كأني كنت باتكلم عن بلد تانية
مش دي
مش دول
حسبي الله و نعم الوكيل فيهم
و ربنا ينتقم منهم و يشفي غليل كل مطلوم و مقهور و مهدور حقه و دمه و كرامته

سمع هوص (Abo 3li) يقول...

والله ياسارة انا ماعارف ولا قادر اعلق ولا اتكلم في الموضوع ده....

ربنا يرحمه...
حسبنا الله ونعم الوكيل...

قلم رصاص يقول...

لنا الله من قبل ومن بعد

حقه ان ضاع في الدنيا مش هيضيع يوم الحساب ان شاء الله

قلــ"بـــلال"ــــــب فارس يقول...

ربنا يرحمه برحمته وينتقم من كل ظالم

عندما تكون ميمى وحاجات كتير مع بعضها كده يقول...

سااارة انا قلبىىى اتووووجع اووووى علية حسييت انه اخويا الى ممكن يحصله كده هو احنا ليهه مبقناش حسينا بالامان كده ربنا يصبر اهله ويرحمه

عالم ماريونت يقول...

بصي

انا بجد فقدت القدرة على التعليق على اي حاجة من الكلام الفارغ الي بيحصل ده

بس انصحك تقري مقال د- احمد خالد توفيق الوحش داخل الانسان هتلاقيني منزلاه عندي و هيجاوب ليكي على كل الاسئلة الي انتي طارحاها دي

انا بعد الحادثة دي مكنتش قادرة اكتب اي حاجة قررت انزل مقال الدكتور زي ما هو لانه فعلا جايب من الاخر

ربنا يعدينا منها على خير
و تحياتي ليكي

رنا

فركشاوي ..ناوي يقول...

لسعه جامده المره ادي
لو عرف السبب بطل العجب ...
ايه فرعنك يا فرعون ؟؟؟؟
و من انفسنا سُلط علينا...

Lyssandra يقول...

حسبنا الله ونعم الوكيل

...

ربنا يرحمه ويصبر أهله علي فقده والبهدلة اللي حصلت له
بس كمان بعد كل ده طلع هو اللي وحش وهو اللي بيتاجر في المخدرات وهربان من الجيش وبيتعرض لبنات في الشارع وبيشيل سلاح أبيض وهربان من حكمين بالسجن
شوفي ازاي ؟؟
لأ والأحلي هو اللي مات من نفسه من غير ما حد ييجي جنبه ولا يبهدله رزع في الرخام

مفيش غير حسبنا الله ونعم الوكيل

المتابعون

اعتبرها بيتك ♥

وِش القفص

خليك ورايا

دليفري..