لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، أغسطس 10، 2010

postheadericon كل سنة وانتم أبطال :D




وانا صغيرة خالص يمكن خمس سنين ستة سبعة كده كان عندي مفهوم غرييييييب عن الصوم واللي بيصوموا

كان لما رمضان يجي والبيت كله يصوم أبص لهم بإعجااااااب كده ايه الأبطال دول ؟؟

ازااي بيقدروا يصوموا كده ويكملوا تلاتين يوم على نفس النظام ؟؟

وكنت بصراحة بحمد ربنا اني لسة صغيرة ومش اجباري أصوم

باين دا اللي كان بيخليني افرح برمضان اوي ولا ايه هههههههههههه

المهم بقى نرجع للأبطال ..

حضرتي كنت متخيلة إن مبطلات الصوم هي ذات نفسها مبطلات الوضوء :D

زائد طبعاً الأكل والشرب 

يعني اللي يصوم دا لا ياكل ولا يشرب ولا يدخل الحمام :D  م الآخر كده

وانا عادي ممكن ما اكلش ولا اشرب بس ما اقدرش ما البيش نداء الطبيعة :D

الغريبة بقى اني لحد ما فهمت الصوم صح عمري ما صدف وشوفت حد في بيتنا صايم دخل الحمام :D

فالموضوع رِكب في دماغي شمال واتخليت عن الفكرة دي بمعجزة أصلاً .

وحسيت اني ماليش حجة بقى وبقيت اصوم :D 

بس بعد كده اكتشفت ان البطولة الحقيقية ان الواحد " يصوم بجد "

يعني مثلاً الأصعب من إنك " تمسك نفسك " وما تلبيش نداء الطبيعة

هي إنك " تمسك لسانك " وما تتنرفزش وما تقولش حاجة تخسرك صيامك 

*****

كل سنة وانتوا طيبين ..

كل سنة وانتوا صايمين ..

كل سنة وانتوا أبـــــــــــطال :D 


18 بوينتس أوف فيو:

موناليزا يقول...

كل عام وانتم الى الله اقرب وعلى طاعته ادوم

محمد سعيد يقول...

هاها.. هو صيام ولا تعذيب يا بنتي! D:

كل سنة وأنتِ طيبة يا بطلة D:

Silver Eyes يقول...

صباح الخير يا سارة :)

ههههههههههه
خلاص كبرنا بقى وبقينا ابطال

المهم ربنا يتقبل منا صيامنا :)

كل سنة وانتى طيبة وبخير يارب
رمضان كريم عليكى
ويارب يكون احلى من كل سنة ..

تحياتى :):)

мαησηα يقول...

كل سنة وانتى تاج راس الاميرات يا سمو الاميرة الجميلة سارة

ههههههههههههههههههههه يظهر ان البيت كله كان فاكر ان الصيام يعنى لا تلبى نداء الطبيعة ههههههههه

بس احلى جملة بجد قولتيها ولخصتى فيها الصوم بجد

بس بعد كده اكتشفت ان البطولة الحقيقية ان الواحد " يصوم بجد "
يعني مثلاً الأصعب من إنك " تمسك نفسك " وما تلبيش نداء الطبيعة
هي إنك " تمسك لسانك " وما تتنرفزش وما تقولش حاجة تخسرك صيامك
صح لسانك يا ست البنات

FAW يقول...

أكيدهما كانوا متفقين مع بعض علشان يقنعوكي بكده
شوفي بقي إنتي كنتي بتعملي فيهم ايه و إنتي صغيره D:
كل سنة و إنتي طيبه . .

محمد التركى يقول...

سمو الاميرة
كل سنه وانتى طيبه وبألأف صحه وخير
ورمضان كريم عليكى وعلى اسرتك وعلى كل احبابك
وعلى امه محمد اجمعين يارب

(دعوه خاصه ليكى)
سيبك بقى من نداء الطبيعه
وخليكى بقى فى تلبيه ندائى وتمرى على مدونتى
نفسى اعرف رأيك فى المدونه وفى اللى بكتبه

تقبلى مرورى سمو الاميرة
ورمضااااااااااان كريييييييييييم

تحياتى لسموك
محمد التركى

أع ـقل مـ ج ـنـونــة يقول...

هههههههههههههه
الا نداء الطبيعة :D :D

كل سنة وانتي طيبة يا سمو الأميرة ..
رمضان مبارك وابقي ادعيلنا بئة ^_^

مدونة حمودة يقول...

طيب كويس انك فوقتي من الموضوع دا بدري انا بقا شوفت واحد في الثانوية مستحيل ينقض وضوءه حتي لو مش بدخوله الحمام طول ماهو صايم وكان هيعيط من الصدمة لم عرف الحقيقة لم اكتشف انه حمار

P A S H A يقول...

كل سنة وحضرتك طيبة وبألف خير وصحة وسلامة إن شاء الله
:)
رمضان كريم

قلم رصاص يقول...

كل سنه وانتي طيبه ياأستاااااااااذه
ورمضان كريم

يعني هتصومي يعني هتصومي لامفر
ههههههههههههههه

ربنا يتقبل منا ومنكم الصيام والقيام

romansy يقول...

كل عام وانت الى الله أقرب
ولفعل الطاعات أسبق
وإلى الجنة أرغب
رمضان كريم

romansy يقول...

كل عام وانت الى الله أقرب
ولفعل الطاعات أسبق
وإلى الجنة أرغب
رمضان كريم

ريحانة الاسلام يقول...

كل سنة وانتى طيبة يا سارة
ورمضان كريم..^_^
انا متابعاكى على الفيس توك على فكرة
go on

Timo.. يقول...

كل سنة..وانت اميرة التدوين..
كل سنة وانا ديما مبدعة..
كل سنة وانت بينا ومعانا..
كل سنة..
وكل رمضان..
وانت بكل الخير والسعادة :)

طالبة مقهورة ..درجة أولى يقول...

هههههههههههه

بجد يا سارة كنتي فاكرة كده ازاي

ده تعذيب بقى مش صيام

واصعب حاجة فعلا اننا نتحكم ف غضبنا لأني بشوف العجايب وانا نفسي اعترف اني اتعصبت حبة كده ^_^ او حبات

رمضان كريم

كيــــــــــــارا يقول...

كل سنة وانتي بطلة وتشوفي بنوتك بطلة :)

TaMer GaD يقول...

سمو الاميره ساره

اولا كل سنه وانتى احسن واطيب واجمل

ثانيا بئه عاوز اقولك انى لحد دلوقتى اصلا لما باجى البى نداء الطبيعه يجى فى دماغى لمدة جزء من الثانيه انى صايم ومينفعش اعمل كدا... فانتى خلينى افكر والله لتكون دى عقده من الطفوله بردو مع انى مفتكرش ان لقصه دى كانت موجوده فى دماغى وانا صغير ّ!

غير معرف يقول...

يا ريت بس السنه دي اننا مش نصوم بس لا نراجع كل حسابتنا نشوف نفسنا ولاقتنا بالله وهل احنا واصلين رحمناوبراين والدينا ولا لا وهل كل افعالنا و تصرفاتنا وردرود فعلنا هل كلها بنردها لانها هل ترضي الله ورسوله ام لا
ربنا يتقبل منا ومنكم الصيام ويهدينا واياكم

المتابعون

اعتبرها بيتك ♥

وِش القفص

خليك ورايا

دليفري..