لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يونيو 30، 2010

postheadericon زوجي مازال حبيبي أكشن تاني مرة :)



يوم الثلاثاء الموافق 6 يوليو 2010  ان شاء الله هتكون حفلة توقيع كتابي

زوجي مازال حبيبي في المنصورة

اخيرااااااااااااااااااً هشوف المنصورة يا جدعاااااااان :)) 

واخيراً اخيراً هشوف مكتبة بوكس آند بينز :))

الحفل مشترك ، هيكون فيه كمان توقيع كتاب موس حلاقة لــ شريف شقارية :)

العنوان لمن لا يرتاد الفيس بوك :

7 ش جزيرة الورد - المنصورة

الساعة سبعة مساءً 

هستناااااااااااااااااااااكوا هناك :)

في كمان حاجة بقى بخصوص الكتاب كنت ضيفة لبرنامج الثقافية كافية على قناة النيل الثقافية

احتمال يكون ممكن تشوفوا الفيديو من هنا 


آخر حاجة بقى

الزميل العزيز الجميل حسن الحلوجي عمل معايا حوار خفيف ولذيذ وسيح لي فيه هههههههههه في مجلة وشوشة

دا الحوار
اضغطوا ع الصورة علشان تكبر 

اتنشر من كام اسبوع كده بس انا كنت ناسية اقول
السبت، يونيو 26، 2010

postheadericon Cat's spirit



انا بعشق القطط .. بعشقهم بجد

مش بس القطة الأمورة بنت الناس النضيفة .. لأ 

بعشق القطط حتى لو كانت متشردة ومتبهدلة في الشارع من قبل ما تتولد 

بعشقها حتى لو كانت متوسخة وحتى لو كان لونها اسود زي الفحم

ودا اللي أكد لي بجد اني بعشقهم لأنهم قطط مش لأنهم كائنات لطيفة أو لأن كل البنات الرقيقات بيحبوا القطط والشيكولاتة 

- بالمناسبة .. أنا ما بحبش الشيكولاتة -

*****

في مقولة لــ د / أحمد خالد توفيق بتقول
تحبين الأطفال ؟.. برافو .. لكنھم طبعًا ھؤلاء الأطفال الذين يظھرون على علب الألبان الصناعية .. لو استطعت أن تحبي طفلاً قذرًا فقيرًا مبلل الثياب يتزاحم الذباب والمخاط حول وجھه فأنا أقر لك بأنك أنثى كاملة..”
 هو دا بالظبط وضعي مع القطط ..

وحاسة ان الموضوع أكبر من الحب ، انا  بمجرد ما اشوف قطة بحس ان في روح قطة بتتحرك جوايا

ببقى هتجنن ومش على بعضي عايزة العب معاها ، عايزاها تخربشني ، تعضني تجري ورايا

وممكن اتدحرج معاها ع الأرض عادي ، ممكن احضنها والف بيها :)

وكنت متعودة العب مع قططي استغماية :)

بعشق فيهم كل حاجة .. كل صفاتهم وحاسة ان فيا كتير منهم

شقاوتهم وفي نفس الوقت عقلهم ، حنيتهم وفي نفس الوقت قسوتهم

وفائهم وغدرهم اللي في لحظة .. أيون انا  غدارة لو حد غدر بيا ما بسميش عليه ، وللأسف بنسى له كل حاجة حلوة مدام غدر بيا

وغيرتهم اللي زيادة عن اللزوم ، قطتي كان بتغير عليا من ولادها ، وانا حاسة اني ممكن اغير على جوزي من بناتي !

وعاملة زيهم كسولة بس نشيطة .. بمزاج كده

وبكون بهزر وبضحك وآخر فرفشة وفجأة الاقي نفسي  قفلت كده وقلبت آخر نكد

****

زيادة على كل دا مافيش حاجة في الدنيا بتخليني اضحك وانسى نفسي مهما كان فيا زي القطط

انا مش من النوع اللي بيحب الأطفال اوي ويتهبل عليهم واقعد اجمع صورهم وكده .. بس ممكن دا يحصل لي مع القطط

كنت من كام يوم تعبانة واغمن عليا قبل الامتحان وبموت خالص

وانا نازلة شوفت قطط صغيرين كده محتلين البيت بتاعنا من تحت 

بمجرد ما شوفت منظرهم وهم كل واحد بيبص لي بفضول كده وشوفت عينيهم نسيت نفسي وبقيت زي الفل 

وكان هاين عليا اسيب الامتحان واقعد جنبهم :)

بجد كائنات مش معقولة :)

بيدوني طاقة تفاؤل  رهيبة 

وبيحسسوني اني حنينة اوي ، وانا كنت بدأت احس اني قاسية ومتبلدة المشاعر 

****

كل اللي بيحبوا القطط بقى ومهوسين بيهم يدخلوا هنا ، صفحة عاملاها رشا صديقتي الصدوقة :)

بس جميلة اوي .. كل ما اتزهقن واكتئب بدخل هناك الاقي نفسي :)

بالمناسبة الصورة اللي فوق دي صورة قطة من القطط اللي محتلين البيت :)

بالزمة حد يشوف العسل دا ويقدر ما يحبوش ؟
الخميس، يونيو 24، 2010

postheadericon خلاص عم عربي مش هيغلس علينا تاني ؟



يوم 22 /6/2010 ودعت الكلية خلاص 


ودعت الدور الرابع علوي اللي نفسي كان بيتقطع على ما اوصله

ودعت مدرج اتناشر و16 وقاعة سبعة 

ودعت مدرج سبعة اللي كنا بناخد فيه محاضرات د/ علي الله يرحمه 

ودعت عم أيمن وعم زيزو والفراشين كلهم ، اللي كشريين واللي طيبين

ودعت الممرات اللي اخدت مني انا ورودي راقات من كتر اللف فيها 

مكاتب الدكاترة ، كولديرات المية اللي مش شغالة

حرس البوابة الثقلا والمهضومين على رأي زياد رحباني

ودعت دفعتي اللي بجد اكتشفت انها دفعة حلوة اوي ، والعيال اللي فيها دماااااااااااااغ اوي 

واصحابي .. احلى اصحاب في الدنيا

اللي قضيت معاهم اوقات حلوة اووووووي ما تتنسيش .. الاسئلة والاعترافات والهزار واللعب ، والقرنين اللي دايماً نعملهم للماضة في الصور :)

سلالم الكلية اللي كنت بحب اووووووي يكون عندي محاضرة متأخرة علشان اتزحلق عليها :)

بجد حبيت الكلية دي اووووووووي ، حبيت الدكاترة - المحترمين بس - اللي كانوا بيدوني  

حبيت طريق هندسة ، وحبيت الطفطف اللي معمول علشان يقف
:)

هتوحشني اوي الكلية بكل حاجة فيها
 
حتى غلاسة عم عربي بتاع الأمن اللي عامل فيها مدير امن الغربية على رأيك علا :)


الأحد، يونيو 20، 2010

postheadericon عن هؤلاء الذين تأخذهم الحياة منا عنوة

هناك أشخاص مروا في حياتي ظننت لفترة أن حياتي لن تستمر بدونهم

ولم أتخيل أبداً أن يمر يوم دون أن أتواصل معهم

ان اكلمهم .. اداعبهم ، او حتى أتشاجر معهم

لكنهم يبقون في حياتي ..

والآن حين مروا بذاكرتي تعجبت لأنهم أصبحوا مجرد ذكرى .

واستمرت حياتي بعدهم ، استمرت وربما بشكل أفضل

فكرت كثيراً في السبب .. هل مشاعري نحوهم لم تكن صادقة ؟؟؟

هل أنسى الناس بهذه السهولة ؟؟

هل تغيرت لهذه الدرجة ؟

هل أصبحت بهذه القسوة ؟؟

لا أعلم !!

ربما لأنهم رحلوا عن حياتي بمحض إرادتي ..

رحلوا بالتدريج ، ببطء .

رحلوا بعدما تمنيت من كل قلبي أن يرحلوا

لكن عندما يرحلوا عن حياتي فجأة

قبل أن أرتوي منهم ، دون أن أتخيل للحظة عالمي دونهم .. لا أنساهم أبداً

ولن أنساهم

لازلت أذكر كل قطة عرفتها وفارقت الحياة ، لازلت أذكر كل قلم ضاع مني

لازلت أذكر هاتفي المحمول الذي سُرق مني لازلت أذكر كل من رحلوا قبل أن أقابلهم ..

ولا أذكر من خرجوا من حياتي بمحض إرادتي إلا نادراً .


****
أتمنى أن أرحل من هذا العالم قبل أن يتمنى أحد رحيلي .. أن أرحل فجأة دون أن يتوقع أحد ذلك
الخميس، يونيو 10، 2010

postheadericon هو امتى دا حصل ؟

 خالد محمد سعيد
شاب مصري عنده 28 سنه من منطقة كليوباترا بالاسكندريه
و صاحب مكتب استيراد و تصدير
كان قاعد في سايبر في وقت متاخر بالليل
و دخل بتوع المباحث بيفتشو كل اللي قاعدين باستخدام قانون الطوارئ
خالد اعترض و قال احنا بنتفتش ليه
كان تمن السؤال البرئ ده ان اتنين مخبرين مسكوه و نزلو في ضرب في المحل و في الشارع و في مدخل عماره جنب السايبر قعدو يرزعو وشه في الرخام بتاع السلم و في مدخل العماره الحديد
و خدو جثته و حطوها في البوكس و بعد 15 دقيقه رجعو رموها ف الشارع و مشيو
المصدر : أنا اسمي خالد محمد سعيد

هو من امتى دا حصل ؟
من امتى اعتبروا نفسهم فوق الناس ؟

اعتبروا نفسهم مش مننا .. نسيوا ان فيهم ابونا واخونا وابننا ؟؟

من امتى الكلام دا حصل ؟؟ وليه ؟؟

ايه الشر الفظيع الرهيب اللي عملناه فيهم يعني علشان يبقى بيننا وبينهم العداوة دي ؟؟

ايه الجبروت دا اللي يخلوهم يعملوا في شاب زي الورد كده ؟ بالوحشية دي !!

للدرجة دي مش خايفين من حاجة ولا من حد ؟؟

للدرجة دي مش خايفين من ربنا ؟ 

طب بلاش يخافوا .. هم فعلاً مش لازم يخافوا ماهم في بلدنا دي مالهمش كبير

وناسيين ان ربنا اكبر من الكل

مافيش في قلبهم ذرة رحمة ؟؟ ذرة رحمة وشفقة ببني آدم فشفشوا وشه كده وجمجمته ؟؟


قلبي موجوع اوي .. ومرعوبة أوي

حاطة نفسي مكانه ، وخايفة على اخويا اللي عارفه انه زيه مش هيقبل على كرامته الاهانة :(

بجد مش عارفة احنا رايحين على فين :( ومش فاهمة كل دا بيحصل ليه ؟؟؟؟؟؟

الولد ياعيني شكله ابن ناس لا سوابق ولا قليل الأدب :(

ربنا يرحمه ويصبر أهله يارب
الاثنين، يونيو 07، 2010

postheadericon فأط في مصر



بكره جداً إستخدام التعبير دا بس بجد دي حاجات عمرها ما حصلت غير في مصر

ولا هتحصل أساساً ..


- سؤال امتحان الشفوي لطلبة ليسانس " انت اشتريت الكتاب ولا لأ ؟ " و " إنتِ ساكنة فين ؟ " وطبعاً التشكيل دا مقصود :D
دكتور الترجمة لا يفقه شيء في الانجليزي وبيتهته وهو بيقراه ، وما يعرفش ان الجملة العربي بتكون فعلية على عكس الانجليزي بتكون اسمية .. بيترجم لنا زي جوجل بالظبط .. الكلمة مكان الكلمة لا كلمة زيادة ولا ربط ولا ظبط !!


 - نفس الدكتور مدي 3/4 الدفعة مقبول ، الناس اللي جابت جيد وجيد جداً بتحلف انها كانت بتعيد نفس الكلام تاني اكتر من مرة ولما طالبة من اوائل الدفعة راحت تسأله ليه اداها مقبول وهي حلت صح ، وجايبة في باقي المواد امتياز وجيد جداً سألها " كتبتي كام صفحة ؟ " - دي مادة ترجمة على فكرة:D  

- دكتور مناهج البحث اجبرنا نحفظ الدراسة الميدانية - اللي عملناها خلال ترم كامل كفريق عمل كل 8 مع بعض ! وسمعناها في الامتحان فيما لا يقل عن سبع صفحات والسؤال دا كان عليه حوالي 12 درجة يعني اكتر من نص المادة!


- في مادة التدريب الصحفي ، اللي المفروض بنتعلم فيها ازاي نكتب الموضوعات الصحفية بكافة انواعها .. روحنا زيارة ميدانية لــ ( مطابع أخبار اليوم ) !!



- دكتور في المحاضرة قال لنا لازم وانتوا بتجاوبوا الامتحان تجاوبوا بنفس ترتيب النقط اللي انا مليتها في المحاضرة والا هعتبر الاجابة غلط ! مع العلم الترتيب مش هيفرق اي حاجة في الإجابة بس هو كده !



- "بتضح من ذلك أن مفهوم التحية يتفق في كثير من جوانبه مع مفهوم التحديث مع فإنه رئيس يتعلق التحديد الغاية النهائية من كليهما فغرض يشير التحديث إلى غاية ملموسة تتمثل في الآخذ بالحديث من الأفكار والممارسات فإن التحية تشير إلى أكثر تجريداً تتمثل في زيادة قدرة المجتمع على توفيرها أفضل للأفراد أو الجمعيات "




دا جزء كامل من الكتاب بتاع مادة عندنا اسمها الاقناع اقسم بالله اني ما غيرت ولا حرف ولا كلمة ولا بدلت أي حاجة.



- مشروع تخرجنا اللي هو المفروض جريدة او مجلة ورقية ، انحدر من ورقية لمدونة على بلوجسبوت واسمه اليكتروني علشان مافيش امكانيات ، رغم اننا عرضنا عليهم نتحمل كل تكاليف الجريدة الورقية بس طبعاً قوبل الاقتراح بالرفض التام !


 - مشروع تخرجنا اسمه بساط الريح !! والمفروض ان دا اسم جريدة مش مجلة اطفال :D

 - دكتور في إذاعة - هو بالمناسبة رئيس القسم - أول كل محاضرة بيقولنا هاتوا البنات الأمورة قدامي مش عايز خلق تسد النفس
     **************
    ابتسم انت من منكوبي إعدام :D


    الأحد، يونيو 06، 2010

    postheadericon محضُ هراء

    احساس غريب كان بيجي لي في أوقات كتيرة

    مثلاً وانا قاعدة في الفصل .. بحس كأني فوقت فجأة من غيبوبة وعايزة اقول انا فين ؟؟


    انا ايه مقعدني مع الناس دي رغم اني ماعرفش عنهم غير اساميهم ؟؟


    ايه اللي يخليني ما اخافش منهم رغم انهم ناس غريبة ؟؟


    ايه اللي يخليني ما اخافش من قرايبي


    من اخواتي من بابا من ماما


    عبارة عن ايه يعني العلاقة اللي بينا دي علشان تخلينا مانخافش منهم ويتقفل علينا باب واحد ؟؟


    وانام ملئ جفوني وانا مطمنة وهم معايا ؟


    الاحساس دا لسة بيجي لي لحد دلوقتي ..


    وانا في الكلية


    وانا في المواصلات


    في أي مكان احس انه مقفول عليا انا ومجموعة محدودة من الناس


    *******


    أنا ايش عرفني اني " بجد "


    مش مشكلة فلسفية ولا نيلة


    لأ دا احساس بيجي لي بردو من وانا طفلة


    ايش عرفني اني عايشة فعلاً ما يمكن انا بتخيل ؟


    ايش عرفني ان دي حياتي او ان الناس شايفاني وبيتعاملوا معايا


    ما يمكن انا روح هايمة وبتتخيل انها عايشة !


    لما قريت كلمة عُمر طاهر


    وليه كل ما أبص ف المراية ببقي مـتأكد ان ده أنا؟"


    حسيتها اوي بس ما عرفتش الاقي رد


    اوقات كنت بقوم من النوم مخضوضة


    الاقي اختي جنبي ابقى خايفة .. حاسة اني مش متأكدة انها هي بجد


    !!


    اوقات كتيرة كان بابا يسافر ويرجع لما يرجع بقعد اقول ايش ضمنني انه هو هو فعلاً


    ما يمكن اتبدل ودا مش هو !


    وفضلت فترة كبيرة من حياتي متخيلة ان حياتنا دي خدعة وباابا وماما بيمثلوها علشان هدف معين مش عارفة ايه هو


    ومش هقول مثلاً افلام الرعب هي اللي لعبت في دماغي والروايات الخيالية


    لأ .. الأحاسيس دي عندي من قبل ما اعرف اقرا روايات


    ومن قبل ما اشوف افلام رعب


    يمكن انا حبيت الروايات بتاعة ما وراء الطبيعة وافلام الرعب علشان حسيتهم فاهمني ولقيت حد عنده هواجس زي اللي عندي



    ********


    قد يُتبَع

    المتابعون

    اعتبرها بيتك ♥

    وِش القفص

    خليك ورايا

    دليفري..