لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يناير 12، 2011

postheadericon كلام فاضي


كنت لفترة كبيرة مهتمة جداً بإني أقول كلامي بطريقة كل الناس تفهمه بيها
كنت مهتمة اوي إني أكون واضحة ومفهومة
حتى ملامح وشي وصوتي غصب عني كل الناس بتفهمهم وبيكشفوا مشاعري أوي
مؤخراً بقيت باتلذذ بإني أقول كلام ماحدش يفهمه غيري
يمكن لأني كنت بقول كلام مفهوم ورغم كده كانوا بيفهموني غلط
وبيتفننوا في انهم يلبسوا كلامي أكتر من معنى
وغلبت أقول والله إني فعلاً بعني اللي بقوله حرفياً ومش بعرف أستعمل التورية
ما بقاش يفرق معايا يكون كلامي واضح ولا لأ لأنهم كده كده مش هيفهموا
العيب مش فيا .. العيب في انهم أصلاً مش عايزين يفهموا إلا اللي يأكد لهم فكرة في دماغهم



رد فعلي تجاه خبر وفاة حد بيكون غريب جداً وبارد جداً رغم إني بخاف من الموت أوي

ما بعيطش وبفضل متماسكة مهما كان الشخص اللي مات دا يهمني أو أعرفه

لحد ما أقرب من مكان وفاته .. أو مكان كان موجود فيه لما كان عايش أو يحصل موقف هو كان بيتصرف فيه بشكل معين

ناس كتير بتفهم دا مني غلط .. إنه عدم اهتمام أو تقدير للموقف أو للي مات

لكن الحقيقة انه عدم استيعاب .. باخد وقت طويل أوي عقبال ما استوعب ان الشخص دا فعلاً مات

واستوعب الحاجات المترتبة على موته .. زي إني مش هشوفه تاني ، إني مش هسمعه تاني

إني بدل ما اكلمه .. هتكلم عنه وأقول الله يرحمه

بستوعب الوجع ببطء لكن بتوجع أوي ..

لحد دلوقتي لسة بستوعب وجع فقدان حد اتوفى في شهر نوفمبر 2009




الأيام اللي فاتت أثبتت لي إن الصبر جميييييييييل أوي



برغم كراهيتي للروتين إلا إني اكتشفت إني بدخل نفسي كتييييير اوي في دايرة الروتين

واكتشفت ان في شعرة رفيعة جداً بين الروتين والنظام وانا كتييييييييير أوي ما بعرفش أحافظ على الشعرة دي


لسة الناس مش عارفة تفرق بين الانسان المغرور والإنسان اللي بيحب الوحدة والعزلة !


في ناس كتير جداً ما بيهمهش راحتك قد ما يهمهم إحساسهم بإنهم مرتاحين لأنهم شايفينك زي ما انت !

رغم إن كونك " زي ما انت " مش دايماً معناه انك مرتاح ، وكونك " متغير " مش دايماً معناه إنك تعبان أو في حاجة مضايقاك !




طول عمري خايفة اوي إني أفقد حد من اللي بحبهم بالموت ، علشان كده بتمنى دايماً إني أموت قبلهم

رغم إن دي أمنية أنانية جداً .. لأني متأكدة إن موتي هيوجعهم أوي !


أحياناً بناخد قرارات تبان شجاعة أوي .. لكن الحقيقة إننا أخدناها لأننا ضعفاء أوي قدام حاجة تانية

زي مثلاً إنك تكون بتجري على إزاز مكسر ومسامير لأنك بتهرب من حد هيقتلك

دي مش شجاعة .. دي غريزة البقاء !



نداء ..

إلى كل من نصبوا أنفسهم حكماء وفلاسفة وخرجوا بنظريات عبقرية عني ..

إتلهوا والنبي .. ماحدش فيكم عارف أي حاجة




5 بوينتس أوف فيو:

Reem Wageeh يقول...

روعة يا سارة بجد
تسلم إيديكى
كالعادة بتدخلى فى صلب الموضوع
وعشان من قلبك...وبجد بيعبر عنك وعن غيرك كتير ...لأننا كلنا فى الوجع بشر :)
تسلمى ياسارة :)

عمرو يسرى يقول...

نداء ..
إلى كل من نصبوا أنفسهم حكماء وفلاسفة وخرجوا بنظريات عبقرية عني ..
إتلهوا والنبي .. ماحدش فيكم عارف أي حاجة

جمله فى الجون
اسلوبك جميل جدا
تسلم الايادى

غير معرف يقول...

bgd gamed awy awyyyyyyyyyyyyyyyyy

إسلام عزب يقول...

جميل أوي الكلام وبيلمس حاجات كتير في الواحد

أكتر حتة عجبتني
"طول عمري خايفة اوي إني أفقد حد من اللي بحبهم بالموت ، علشان كده بتمنى دايماً إني أموت قبلهم
رغم إن دي أمنية أنانية جداً .. لأني متأكدة إن موتي هيوجعهم أوي !"

فكرتني بإني أناني لأني فكرت كدة


خليها "بالله عليك\م" بدل "والنبي"

غير معرف يقول...

fazeee3a :))

المتابعون

اعتبرها بيتك ♥

وِش القفص

خليك ورايا

دليفري..