لعلمك

لعلمك

إقرأ لي

دخلوا بكليك شمال :D

Blog Archive

الأحد، يناير 16، 2011

postheadericon لو سمحت .. احترم نفسك


كلنا عارفين المقولة اللي بتقول

" عامل الناس كما تحب أن يعاملوك
 
ومعظمنا بننفذها

وبنستنى من الناس انهم يعاملونا زي ما احنا بنعاملهم 

لكن كتير أوي بنتصدم من طريقة معاملة الناس لينا

وبنشك ساعتها في صحة المقولة ..

وساعتها ناس بتتغير في معاملتها للناس ، وناس تانية بتقول الناس مش زي بعضها 

وتستمر في معاملتها الكويسة

لكن غالباً بنكون احنا السبب في دا 

لأننا كمان المفروض " نعامل أنفسنا كما نحب أن يعاملنا الآخرين "

يعني المفروض احنا نعامل نفسنا كويس علشان الناس تعاملنا كويس

نحترم نفسنا بالمعنى الحرفي للكلمة ،

وتكون فكرتنا عن نفسنا إيجابية علشان ننقل الانطباع دا للناس

لازم نكون واثقين في قدراتنا وإن ربنا أكيد ميزنا بحاجة

ويبقى أحسن كمان لو درسنا نفسنا واكتشفنا ربنا ميزنا بإيه وحافظنا عليه وطورناه

ساعتها الناس هتحترمنا ، وهيكونوا عننا فكرة إيجابية

تخيل إنت واحد عمال يقول على نفسه انه غبي مثلاً أو مهمل أو مستهتر

والناس شايفاه ليل ونهار بيقول كده .. أول حاجة الكلمتين دول هيرتبطوا في ذهنهم بالشخص دا

هيبدأوا يراقبوا تصرفاته وهيركزوا أوي على سلبياته دي ومش هياخدوا بالهم من إيجابياته 

وهو السبب

واحد ما بيحترمش نفسه اللي هو أكتر واحد عارفها يبقى الناس تحترمه ازاي ؟


أرجوك ..


حب نفسك ، دلعها ، قولها شكراً على حاجة حلوة عملتها 

كافئها بحاجة بتحبها ، ما تنامش في يوم وانتوا زعلانين من بعض 

أيوة .. إنت ونفسك 

إعمل كل حاجة شايف انها تستحقها 

وما تعملش الحاجات اللي ممكن تهينها 

بس خلي بالك ..

إوعى  تحب نفسك زيادة عن اللزوم

واحساسك بنفسك يبقى مُبالغ فيه وبالتالي تتحول لإنسان نرجسي أو مغرور

 علشان ما تقعش في المشكلة دي لازم تكون صريح مع نفسك

إبرز مميزاتك وحس بيها لكن بينك وبين نفسك واجه نفسك بنواقصك وعيوبك

واشتغل عليها وطورها

جربوا الحكاية دي وصدقوني هتعمل فرق

ممكن ما تعملش فرق سريع لكن هتعمل فرق طويل المدى

7 بوينتس أوف فيو:

MR.PRESIDENT يقول...

كلامك بفيفكرني بكلام التنمية البشرية أو الأصح التنمية الذاتية .
ولكن نصحيتي مش هتكون عليك الكلامك الزين

نصحتي للي مكتشفش ميزته .. زي ما أنا اتنصحت قبل كده " جربواااااا حجات كتير . عشان تكتشفوا أنفسكم .. "
بس خلاص .. وادعو لي بعد ما تكتشفوها ..

بالمناسبة عايز اغلس عليكي واطلب مشاركتك لينا في مدونة تمرة " تقدري تعتبرية كدا زي نادي للقرآة خاص بالمدونين " تحياتي الرئاسية ليكي

أحمد يقول...

أنا ما أعرف صاحبة البوست إيش تبغى بالضبط؟ يعني هي حاجة تعويضية ولا إيش؟ أتمنى إنك تحتفظي بكل الكلام لنفسك، لأنك لو طبقتي 1% بس من كل الكلام اللي تكتبيه، راح تصيري إنسانة رائعة بمعنى الكلمة.

سمو الأميرة سارة يقول...

@ سيادة الرئيس :)

تسلم افكارك

المدونة حلوة

بس اسمح لي اشارك معاكم لما يكون في كتاب قريته مثلاً أو حاجة لأني القراءة بالنسبة لي مزاج رخم يعني مش كل الكتب في كل وقت اقدر اقراها

لو صادف وكان الكتاب اللي بتناقشوه قدرت اقراه او قرأته قبل كده هشارك معاكم

وهعمل فولو للمدونة علشان اكون متابعة اوك ؟

MR.PRESIDENT يقول...

بصي براحتك .. دي أولا .. ثانيا هيا فكرة المدونة أصلا نابعة من عدم حب القراية ، أنا مش بطيق أقعد قدام كتاب .. لكن لما أغلس علي نفسي واقعد بوقت وأخلص يبقي أنجزت تقدري تقولي زي العابد اللي قال فيما معناه
" غصبت هوي نفسي علي قيام صلاة الليل 20 عاما ، وأستمتعت بها عشرين عاما أخر "
وتشرفي في أي وقت .
تحياتي ليكي

سمو الأميرة سارة يقول...

لأ انا مش قصدي اني مش بحب القراءة بالعكس انا بعشقها
بس مش في أي وقت أقدر اقرا أي حاجة
يعني مثلاً النهاردة ممكن مايكونش ليا مزاج اقرا ثلاثية غرناطة رغم إني امبارح كنت مستمتعة بيها
فاهمني ؟

مش في أي وقت بكون قادرة اقرا روايات

ومش في أي وقت بيكون ليا مزاج اقرا شعر

القراءة ما ينفعش تيجي غصب لأنها كده مش هتدخل في الدماغ

محمد محمود عمارة يقول...

حاضر هحترم نفسي ، بس أنا والله معملتش حاجة....!!!

وجع البنفسج يقول...

اكثر حاجة عجباني انه الواحد لازم يعامل نفسه زي ما يحب غيره انه يعامله ،، والله الواحد مقصر كثير في حق نفسه ، لازم ندلعها شوية والله حرام ..
تقبلي مرروي ..

المتابعون

اعتبرها بيتك ♥

وِش القفص

خليك ورايا

دليفري..