لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يناير 19، 2011

postheadericon الكتب العاتيشفية هناك يا أبلة



كل ما اجي اشتري كتب من الناس اللي بيبيعوا كتب مستعملة

الاقي البياع يقول لي "الكتب العاتيشفية هناك يا أبلة "

"روايات عبير ع الشمال "- "كتب نيزار آباني هناك آهي "

وكأن البنات مش ممكن أبداً تقرأ حاجة غير كده !!

ولما امسك أي كتاب تاني يبص لي كأني كائن فضائي !

هو ليه الفكرة دي عن البنات يعني ؟

ليه الناس بتستغرب أوي لما تلاقي بنت مهتمة بأي حاجة تانية غير اللبس الميك آب والدباديب ؟؟

عارفة ان السبب في كده بنات كتير هي دي فعلاً إهتماماهم

بس ماهو بردو في شباب تافهين مالهمش غير ف البنات واللبس والكورة 

ليه الناس ما بتحكمش على كل الشباب انهم زيهم !!

وليه رغم ان الناس - بتقول - انهم مش عاجبهم البنت السطحية
اللي كل اهتمامتها المظاهر وبس نظرتهم للبنت المثقفة مش حلوة بردو

وبيعتبروها معقدة ومكلكعة ؟؟

 الأسئلة دي بتنقح عليا كل ما اجي اشتري كتب علشان كده قولت اعمل البوست دا

يمكن حد يجاوب عليا ويريحني 

فهل من مُجيب ؟

بالمناسبة دا تحقيق حلو عن نفس الموضوع 

عامله أحمد الفقي 





11 بوينتس أوف فيو:

Ahmed Adel El-Feky يقول...

هييييييييييييييه انا أسمى مكتوب
:D

غير معرف يقول...

للاسف رد الفعل ده موجود اوي وبشده
وعلى فكره للقراء بجنسيهم وتزيد حبتين للجنس الناعم

المفروض في اذهان معظم الناس ان البنت اموره لطيفه بتستنى العريس
وبعد الجواز
البيت والببي والزوج

انا فاكره مره سالت عن مجله العربي الكويتيه فرد عليا هو لسه في حد بيقرا الكلام ده
قلت له شكرا وجيت ماشيه قال لي استني موجوده!!!!!!!!!!!

MR.PRESIDENT يقول...

بعد السلام والتحية
أما بعد
من رئيس الجمهورية
لأن مفيش إعتقاد إن فيه بنت بتقرا الكلام ده عند البياع ، ومع احترامي لاخوات البنات ، لكن البياع عارف إن سوق الكتب ده أقرب مكسب له ، بالإضافة لو أنا فكرت بخباثة ، احتمال ياخد الشكل العام للمشتري ، ودا من الخواء الفكري حلوا الخواء دي صح .
علي العموم المجتمع كله محجتاجين نربط مسامير فكره ونحطله شحم رجاله وستات .
وتلاقي برضوا البياع بيبص لشكل الواحدة وبيعتقد إن اللي لبسه نضارة مقعرة ومقوم أسنان ، هي اللي تقرا الحجات التانية العلمية لأن شكلها كدا ، أما البنات المدلعات فدي مش بتقرا غير لنضار وعبير .
ومن هذا المزنق أقوووووول
وليه تقري من أصلا ، خلي المجتمع كدا جاهل متخلف أحسن ..
وعلي الرأي المثل المتخلف .. هيا البت ليها ايه غير الجواز .

طبعا أنا مش فاهم ولا كلمة من اللي بكبتها حاليا .

بس هقول حاجة ليكي
بما إن مش عايز آتفي ولومنسي .. خليكي في الرعب والبوليسي ( بغلس بس )

تحياتي

re7ab.sale7 يقول...

علي فكرة يا سارة
انا كمان ملاحظة دي
بس انا بشتري كل الكتب بوجة عام بس الادبية والروائية بشكل خاص يمكن لاني بكتب قصص....او رومانسية بطبعي
بس اكتشفت في فترة متقدمة من حياتي ان الرجل لا يحب ذكاء المرأة...ابداااا
يمكن حد يعجب بشكلك بجمالك بأناقتك لكن او ما يتكلم معاك ويكتشف ذكائك وثقافتك فإنسي انه يحبك او يعني يعجب بيك خالص
واذا دخلنا في منطقة الحب والجواز فإنسي خالص ان ممكن حد يكون عايزك مثقفة او ذكية ....إسأليني أنا
أنا اكبر منك وجربت ده كتيييييير ههههه
قلبتي المواجع والله
بس حلو كتير البوست
احييكي عليه

dr.mimo يقول...

اولا السلام عليكم
دى اول مرة ادخل على مدونتك الجميلة دى وعجبتنى خالص.
وتعليقى على الموضوع بتاعك ان دى مش نظرة للبنات بس يمكن عشان انتى بنت مابتسمعيش غير كده.
لكن انا اعتقد ان الولاد برضو لما بيروحو هناك اكيد بينصحوهم بالحاجات اللى ماشية مع الولادزى الكورة والاكشن.
فى الاول والآخر اللى بيبيع الكتب دا تاجر وعاوز يبيع ويكسب فبيشوف ايه اكتر حاجة مسمعة معاه وبيدل الزبون عليها والله
لو كنتى عاوزاها من الاول بتاخديها وتوفرى عليه متابعتك وانتى بتفرى فالكتب ،ولو حتى كنتى مش عاوزاه فى احتمال انه يعجبك زى ماعجب غيرك وبرضو هاتاخديه وفى الحالتين دول هو كسب ولو ما اخدتيهوش وبتدورى على حاجة تانية هاتردى عليه ويجيبهالك وينجز ويدور على غيرك.
من الآخر ماتاخديش كلامهم على انهم واخدين فكرة عن البنات اوالولاد.
وبعدين مش عيب ان البنات تهتم بالحاجات دى،ومش لازم تتضايقى لانك اكيد ولو مرة اشتريتى كتاب طبيخ او بيتكلم عن الموضة او عن تربية الاطفال لو عندك بيبى او حتى كتاب عاطفى ربنا خلقنا كده وبرضو فينا كتير ليهم اهتمامات تانية.عديها بقى

محمد محمود عمارة يقول...

يا سمو البرنسيسة ، بقى إنت مستغربة عشان هو مستغرب انك بتدوري على كتب تانية ؟ و سبتي كلمة ( العاتشيفية )اللي أنا من ساعتها عمال أجيبها يمين شمال فوق تحت عشان أعرف دي تطلع إيه و معرفتش ، بس هجيبها هجيبها

محمد محمود عمارة يقول...

سمو الأميرة سارة بعد جهد و لأي و اكتشاف إني ضعيف في علوم اللغويات اكتشفت إن الكلمة طلعت (عاطفية) بس بعد إضافة السين الشمسية اللي اتسلقت من الحر يا عيني ف "تشت " فتحولت الطاء إلى " تشاء " حسب كتاب خالتي سنية المفترية في الصوتيات ، فصل الصوت الحياني ، تقبلي تـ"شـ"ـحياتي

إسلام عزب يقول...

دة عادي من الناس عشان إتعودوا علي حاجة ف بيستغربوا لما يشوفوا غيرها

وبعديين أنا بحس إنه جهل من الناس أصلا
هو العادي إن الواحد يكون أساسا مثقف بيقرا وبيتعلم مش "بطيخة" عاشة وخلاص :D

ALLELIO-عليــــلـــيـــــــــــــــــو يقول...

وبالنسبة لكتب البروفيسيرة ام نياظى الاقيها فين

عفوا أنا أميرة يقول...

ممممممم، معقول الفكرة دى لسه موجوده أعتقد أنها موجوده عند طبقة معينة من الشباب أو الناس اللى أصلا دماغهم فاضية..لكن فى ناس كتير مثقفه وواعية ومقتنعه تماما بوجود البنت المثقفة بل ومؤمنه بيها كمان : )

روان الأحــــمد يقول...

اممم اولا شو يعني "العاتيسفيه"

ثانيا : ردا على سؤالك هما ليه ما بحكوش عن الشباب كده؟
اتوقع لأنه الشباب ما بتقراش خالص :D

المتابعون

اعتبرها بيتك ♥

وِش القفص

خليك ورايا

دليفري..