لعلمك

لعلمك

إقرأ لي

دخلوا بكليك شمال :D

Blog Archive

الاثنين، يناير 24، 2011

postheadericon شوية أفكار


د/ مصطفى محمود قال في اكتر من 

كتاب وأكتر من مقال إن المفروض اما 

حد يحب  حد ما يعتذرلوش ولا يشكره 

ولا الحاجات دي والعلاقة بينهم تكون أوثق

من كده .. كل ما أقرا الفكرة دي 

احس اني مش مقتنعة .. 

يعني إيه لما احب حد وأكون مهتمة بيه 

وبحافظ على مشاعره واغلط ما اعتذرلوش !! 

دي عقوبة اني بحبه مثلاً ؟

لحد ما الفكرة وضحت في دماغي أوي

على سبيل المثال .. 

علاقتنا بربنا : احنا بنحب ربنا رغم كده ،

بنشكر ربنا وربنا بيزيد اللي بيشكره ، و  بنعتذر لربنا ونستغفره لما نغلط ونعصيه

يبقى ازاي بقى لما حد يحب حد مش المفروض يعتذر له ولا يشكره ؟؟؟

*******

" الحب الحقيقي "

أو

" الحب "

قيمة معنوية هي الأكثر ندرة ، والأكثر تعريفاً !

وانا بقول عنه قيمة معنوية اساساً وقفت شوية ..

هو الحب حاجة معنوية أوي كده ولا معنوية / مادية

يعني الحب دا احساس معنوي بس علشان يكون موجود

لازم يتوقف على أفعال محسوسة زي تصرفات ، تعاملات ، كلام 

ومش قصدي بمادية يعني مالية او براجماتية 

لكن قصدي ليها وجود مادي مجسد في الحياة يعني 

ما علينا ، الحب اكتر حاجة في الدنيا الناس قالت عنها تعريفات  ،

الكتاب ، الشعراء ، المفكرين ، الناس العادية ، المتشددين دينياً والوسطيين و إلخ إلخ

كل الناس قاعدة تحاول تعرف الحب ،

واللي بيحبوا نفسهم بيحاولوا يفهموا ايه هو التعريف المحدد للحب 

علشان يعرفوا هم بيحبوا ولا لأ

ودا كله كلام فاضي .. مش معقولة أما أجي احب امشي على كتالوج

لو حصل واحد اتنين تلاتة يبقى بيحبني لو حصل واحد بس يبقى ايه ؟؟ 

طب لو حصل اتنين وتلاتة وماحصلش واحد يبقى ايه ؟؟

كل الدنيا نسيت حاجة بسيطة أوي

هي جزء من آية قرآنية فجأة كده حسيت ان هو دا الحب

" فألف بين قلوبهم "

بس .. ربنا بيألف بين قلبين أو تلاتة او أربعة أيا كان شكل الحب

فبيحسوا انهم بيحبوا .. كل على طريقته وعلى حد فهمه للحب


********

إمبارح في مناقشة ما إكتشفت إن اكبر غلطة الست بتغلطها 

هي إنها بتهتم بشكلها - إن اهتمت - علشان ترضي زوجها

بالتالي لما ينشغل عنها شوية تهمل شكلها ، 

وإن زعلت منه او اتخانقت معاه بتهمل شكلها  و و و و حاجات كتير

اكتشفت اننا لازم نهتم بنفسنا علشان نبقى راضيين عن نفسنا 

مش علشان نرضي زوجنا

لازم نعمل أي حاجة في الدنيا علشان نبقى احنا كويسين

مش علشان هم يشوفونا كويسين

******

كنت بفكر مع نفسي واكتشفت اني بحب الدنيا أووووووووي ، 

خايفة جداً أموت بدري
واكتشفت كمان إن كل المؤشرات بتقول

اني عاملة زي الناس اللي بيموتوا بدري
بحب الدنيا ، حاسة اني مستعجلة دايماً كأن حد بيجري ورايا ،

مش عايشة سني ودماغي أكبر من سني
 حاجات كتير أوي محسساني اني هموت بدري
المشكلة بقى اني مش عايشة مبسوطة أو على الأقل مش عايشة زي ما بتمنى 

ورغم كده متمسكة جداً بالحياة !
مستغرباني أوي


*******

في ناس حواليا نفسي امسكها من كتفها كده وارجها جامد أوي

واقولهم فوقواااااااا العمر بيتسرسب منكم

وانتوا ساجنين نفسكم في حاجات معينة مش هتقدم ولا هتأخر

*******
إكتشفت إننا بنضيع وقت ومجهود كبير في التفكير في حاجات مالهاش لازمة
زي اننا نفكر في أسباب حاجة لو عرفنا أسبابها ممكن نتضايق 

وفي نفس الوقت مش هنغير من الواقع حاجة
في انسان قال لي مرة حاجة فيما معناها
ان احياناً الجهل بالحقيقة بيبقى ممتع جداً ،

كان كاتب قصة فيما معناها ان واحد اكتشف 

ان حبيبته مش بتحبه وواجها بالحقيقة دي فاضطر يبعد عنها
بعد كده ندم .. اكتشف انه كان مرتاح وهو مخدوع وجنبها
حاجة ما ترضيش كرامة بعض الناس بس في أوقات كتيرة

أوي بتكون هي الحل الوحيد

5 بوينتس أوف فيو:

Ramy يقول...

يااااااااااااااا

أفكارك (:

بس عادى على فكرة نكون مستعجلين

و منمتش بدرى (:

ربنا يوفقك دايماً

الشاب الصح يقول...

معانى قيمه
جزاك الله خيرا
هذه اول زياره لى لمدونتك ان شاء الله ستتابع الزيارات

MR.PRESIDENT يقول...

تلك أفراد برمجاتية ولا ايه .. سؤال بس هي برماجيتية يعني ايه ؟!
أعتقد انني افضل أن أكون في النور خير من أكون في الظلام وأي حد بيحب الدنيا وبيكره الموت بس حب الله أجمد فعشان كدا ممكن نستنغي عن الحياة .
أما الحب مادي ولا معنوي ولا ايه بس ، ففي اعتقادي رغم عدم معرفتي مهية الحب / هو أن تعطي دون أن تنتظر مقابل سواء مادة أو معني .
أما كلام الدكتور الجليل مصطفي محمود صح وكلامك صح ، وكلامك اللي هقوله صح
هوا مكنش قصده علي حب الواحد ، وإنتي جبتي حاله خاصة بحب الواحد ( الله ) ، خلاصتي اللي عايز أقوله كل حب له طريقته وله ظروفه ، فحب الرجل لزوجته والعكس ليه طريقه ، وحب الأب والأم للأبناء له طريقة وحب الصديق وحب الأم والأب ، وحب المصلحة ، وحب التفضيل وحب النبي .
كل حب له طريقة مش واحد اثنين ثلاثة زي ما قلتي بالضبط .
فحب الله مثلا أن تأتي ما أمر وتنتهي عما نهي .
وحب النبي أن تسير بهديه واخلاقه بين الناس .
وحب الأم للوالد : كحب الروح للبدن .
أنا مش عارف أوصل اللي عايز أقوله .
بس أرجو إنك تكوني فهمتني .

أنا دورت علينك وعجبني يمكن يعجبك ، في إن المشكلة مشكلة تفكير بين معرفة فكر الرجل والمرأة

http://74.220.207.124/~jidhafsc/jidorg/vb/showthread.php?t=64359

شوفي اللينك

محمد محمود عمارة يقول...

سمو البرنسيسة
الحب الحقيقي معناه الاحترام المتبادل بين الطرفين ، و لن تجدي حبيباً يسئ إلى محبوبه ، لأنه يكون حريصاً على مشاعره ، هذه الحالة تتطور عند الأزواج بمرور الزمن و بحسن العشرة.

محمد محمود عمارة يقول...

سمو البرنسيسة
الحب الحقيقي معناه الاحترام المتبادل بين الطرفين ، و لن تجدي حبيباً يسئ إلى محبوبه ، لأنه يكون حريصاً على مشاعره ، هذه الحالة تتطور عند الأزواج بمرور الزمن و بحسن العشرة.

المتابعون

اعتبرها بيتك ♥

وِش القفص

خليك ورايا

دليفري..