2011-10-06

حاجة مُفرِحَة


بقالي شهور كتاباتي تميل للكآبة  ، والحقيقة إن دا مش لسبب شخصي فقط ، لكن الطقس العام كئيب ، ومش باسطني 
المهم إن ناس كتير قالت لي كفاية بقى نِفسنا نقرأ حاجات مُفرِحَة .. يمكن مش شهر مايو الناس طلبت كده
وأنا من وقتها بدور .. وادور وأدور عن حاجة مُفرِحة أقول عنها حاجة ! بس مش لاقية !
كل الحاجات المُفرِحَة مِش بتكمل ! أو ما بتبقاش بجد
يعني يا دوب الواحد يقول هيييييه لقيت حاجة مُفرِحَة .. يكتشف انها المفروض تكون مُحزِنة !!

بس أنا لا بكل ولا بمل ، وطالما حطيتها في دماغي بجيبها ، النهاردة بقى كبرت في دماغي .. ولازم الاقي حاجات مفرحة :)

فكرت ودعبست كويس واكتشفت إن فعلاَ في حاجات مُفرِحَة زي مثلاً .. 

- إن خالو يكلمني وفي عز ما أنا محتاجة أتلصم ألاقيه بيقول لي " عارفة يا سارة روضة - حفيدته - هتطلع زيك ، بتحب تقرا وترسم وتكتب ، يارب تطلع زيك يا سارة " 

- إن اختي تقول لي " عارفة لما ماما قررت تسميكي سارة .. كان نفسها تكوني زي السيدة سارة زوجة سيدنا ابراهيم ، لأنها وقتها كانت بتقرأ قصتهم ، كان نفسها تكوني في جمالها .. لكن انتي أخدتي من قوتها .. زي ما سارة فرعون ما قدرش عليها إنتي ماحدش هيقدر عليكي

- أو زي إني أفتح إيميلي ، والاقي رسالة من قارئ بيقول لي " سواء كانت عيلتك درويش ، أو الليثي .. انتِ اضافة لأي عيلة " ! 

- أو إني أكتشف إني شاطرة أوي في حاجات كتير :)

- أو إني أكتشف إني حظيت بأفضل أصدقاء في الكون كله ، في الخمس سنين الأخيرة .. بينما أنا لحد أولى كلية ما كانش عندي ولا صديقة واحدة !

- أو إني أكون زهقانة واقرر أروق الكوميدينو فأعتر في اوتوجرافاتي واكتشف إن أقرب شخصيتين لقلبي كاتبين في صفحتين قصاد بعض كلام يخليني أرفرف في السما من الفرحة :)

أو ................... حاجات كتيرة أوي ، ماكانتش في بالي لما بدأت اكتب البوست دا وافتكرتها لما قررت أفتكر الحاجات المفرحة :)

الحمد لله بجد أنا حياتي فيها حاجات مفرحة .. رغم كل حاجة :)

هناك 11 تعليقًا:

  1. جميل يا سارة لما تكون مضايقة وتفتكري الحاجات الجميلة اللي ممكن تخرجك من حالتك لان محدش هيقدر يسعدك غيرك
    انا فاكرة كلامك ليا كويس اوي لما قلتلك ان مكتئبة قولتيلي جربي كده تقعدي مع نفسك وتفكري في الحاجات اللي انجزتيها في خلال السنة دي مثلاً هتلاقي معنوياتك اترفعت جداً
    انا بقا الحاجة المفرحة دلوقتي عندي هو ان انتي صديقة عزيزة جداااا يا سارة
    شكرا يا سارة

    ردحذف
  2. زَهو :) تعليقك دخل قائمة الحاجات المفرحة :)

    ربنا يخليكي يا حبيبتي :)

    ردحذف
  3. جميل أننا نفكر بالحاجات المفرحة بحياتنا واكيد هي كتير زي الحاجات اللي بتزعلنا ،

    أكتر شي بيسعدني ويبكيني بنفس الوقت لما بقرا الذكريات الباقية من صحاباتي ،

    لأنه بيبقى نفسي ارجع للوقت ده ،
    او اني ألسع مرة واحدة ويبقى نفسي أشوفهم ناو بأي طريقة ..

    وأفوق على دموعي وهي بتقولي أننا بالدنيا والدنيا تلاهِ يا منة ،

    أسعدني شوفتك سعيدة ومبسوطة ،
    ويارب دوم السعادة والضحكة ..

    دمتِ مبسـوطة ،
    واعذري رغيي الكتيير ..

    ردحذف
  4. ربنا يفرحك زيااااااااااااادة يا جميلة الجميلات :) :*

    ردحذف
  5. البوست حلو اوي يا ساره
    عارفه انا نفسي افكر في الحاجات اللي تخليني افرح علشان اخرج من الحزن والكابه اللي انا فيها على طول بس مش عرفه دايما افضل مخنوقه واول ما حاجه نخليني افرح افتكر بسرعه الحاجه اللي مضيقاني
    تسلمي على البوست
    وهحاول ذيك

    ردحذف
  6. رفعلي معنوياتي البوست دا !! لما قريته افتكرت كل الحاجات المفرحة اللي حصلتلي كمان !! :) الله يخليكي ياسارة وتفرحينا دايما :)
    *على فكرة لا أستطيع وصف الأمل الذي بعثته الجملة .. عندي أفضل أصدقاء في الكون رغم إني لما كنت سنة أولى جامعة ماكانش عندي ولا صديقة ..
    أنا أولى جامعة وماعنديش ولا صديقة قريبة :| ..بس نستنى ! يارب يحصلي زيك تمام ;)

    ردحذف
  7. تعرفي ياسارة ...
    انا لما اكون منزعجة يكون كتابك احد الكتب التي تستطيع تغيير مزاجي ايجابيا
    انت جميلة وكتاباتك اجمل
    اتوقع ان تكوني جزء من سعادة الاخرين هي السعادة بحد ذاتها
    اشكر روعتك

    ردحذف
  8. عزيزتي سرورة الامورة
    انا عن نفسي عندما اكون منزعجة تكون كتاباتك احد الاشياء التي تستطيع تغيير مزاجي ايجابيا
    اعتقد ان تكوني جزء من سعادة الاخرين هي السعادة بحد ذاتها
    اشكر ابداعك

    ردحذف
  9. البوست من جماله أجبرنى اعمل لايك وانا ف نصه :)

    ربن يفرح قلبك يا سمو الاميرة ويزيدك كمان وكمان

    ردحذف
  10. البوست من جماله أجبرنى اعمل لايك وانا ف نصه :)

    ربن يفرح قلبك يا سمو الاميرة ويزيدك كمان وكمان

    ردحذف
  11. البوست من جماله أجبرنى اعمل لايك وانا ف نصه :)

    ربن يفرح قلبك يا سمو الاميرة ويزيدك كمان وكمان

    ردحذف

Say something...