لعلمك

لعلمك

إقرأ لي

دخلوا بكليك شمال :D

Blog Archive

السبت، يوليو 30، 2011

postheadericon رمضان مش بس كريم


رمضان مِش بس كريم ! رمضان .. لمة وعيلة ووَنس ودفا وحب وصفا :)

رمضان بحسه بيعمل غلاف جوي من الفرحة والرضا والروحانية حوالين الدنيا 

رمضان تسامح ، عفو ، تعاون ، تسابق للخير 

فرحة أطفال ، وكبار بزينة وفوانيس وعزايم

الحقيقة إني عمري ما عشت رمضان بالطعم دا ! بس نِفسي أوي أعيشه 

بشوفه كده عند الناس ، وبحسه وبسمعه في دوشة لمتهم ! 

وبكون واثقة إني إن شاء الله في يوم من الأيام هعيشه كده :) 


كل سنة وانتم طيبين

الجمعة، يوليو 22، 2011

postheadericon أنا عندي ,, انت عندك؟


أكيد كلنا متفقين إن ربنا سبحانه وتعالى لم يخلق شيئاً عبثاً .. يعني كل حاجة ربنا خلقها ليها فايدة ، حتى لو احنا مش قادرين ندرك فايدتها

تمام ؟؟

متفقين .. 

طيب .. كلنا بردو متفقين ان كل انسان عنده راس .. مهما كان الانسان عنده اعاقة واتحرم من عضو من أعضاء جسمه ما بينفعش يتحرم من الرأس وإلا يموت .

تمام ؟؟

متفقين 

كل راس جواها " مخ "  اللي من ضمن محتوياته العقل .. بتتفاوت قدرات العقل  دا وآداؤه لكن هو موجود 

إذن .. بما إن كل واحد له عقله الخاص بيه يبقى دا معناه ان ربنا عايز كل انسان يفكر بعقله الخاص بيه ، وإلا كان ربنا اصطفى ناس معينة ورزقها لوحدها بمخ علشان تفكر بيه لنفسها ولغيرها .. وبما ان الناس التانية مش مطلوب منهم يفكروا يبقى مش لازم يبقى عندهم مخ !!


طيب ليه بقى في ناس معتقدة كده ؟؟؟؟ ليه في ناس متخيلة انها هي لوحدها اللي عندها عقل  ومن حقها تفكر لنفسها ولغيرها وتفرض اللي تتوصل له على غيرها ؟؟

ليه في ناس تانية متخيلة انها ما ينفعش تفكر بعقلها ولازم تعتمد على عقول ناس تانية وتعيش بناءً على ما توصلوا إليه ؟؟

ليه في المدرسة بيعملوا فينا كده دايماً ما ينفعش نطلع بالألوان برة  الحدود اللي حددوها هم ؟؟ 

ليه بعد كل درس يطلعوا هم الدروس المستفادة رغم ان دا من حقنا احنا .. من حقنا اننا اللي نحدد استفدنا ايه وفكرنا في ايه ؟

ليه دايماً السؤال بتاع ما رأيك ليه اجابة نموذجية واللي يطلع برة حدودها ما ياخدش درجة ؟؟

ليه  في بعض رجال السياسة   بيفترضوا ان مالكش مخ وبيفرضوا عليك اختيارات معينة ؟
ليه الأهالي هم اللي بيملوا استمارة التنسيق بتاعة ولادهم ؟؟

ليه رغم إن القرآن الكريم فيه 16 آية تحمل أمر صريح بالتفكير ، وآيات كتيرة أخرى بتتكلم عن العقل والتفكير والتدبر .. معظم رجال الدين بيعتبروا ان التفكير حرام ؟؟

ليه كل أولي الأمر مش بيقولوا لنا الحقائق بأمانة ويسيبوا لنا احنا حق التفكير في القرار وتنفيذه !!

ليه وليه وليه وليه .. مليون مظهر لانتهاك حق الانسان في " التفكير " 

أرجوك .. ارفض كل المظاهر دي .. واستخدم عقلك
الثلاثاء، يوليو 12، 2011

postheadericon يا مصر ...

ليه يا مصر ؟؟ 


علـِّـيتى ولـْـد الهفِـيَّـة

ركـْـبوا حصان الإدارة

جُـوا .. يؤمروا وينـْـهو فيّـا

آه يا زمان المرارة



و يا مصري ...

ما يعرف الفـْرح مظلوم

ولا يعرف الأمن ظالـِـم

ع اللى ما عُـمْـره اتـّـعظ لوّم

وانـْـهضْ و .. ردّ المظالـِـم



قول للخسيس المدارى

اللى زرعْـتـُـه ح تِـجْـنيه

وعليك تد ِّرى المدارى

تجازيك باللى ح تِـجْـنيه

****

سيبك من النـْدل والشين

دا الخـُـونة فى النـْدل عاهَـة

صورة الخيانة بوشـِّـين

والشاطر اللى وعاها




الندل لو باسْ لك الإيد

لا تمكـِّـنه من نوالك

حتى ان قطفْ لك عناقيد

ع الشـّر قلبه نـَوى لك


يا مصري .... 


لا تشترى الحب بالمال

ولا فى الكرامة تفاصِـل

خـَـلـِّـيك على الشـِّـدَّة حمَّـال

مهما يكون اللى حاصِـل


يا مصري ..

اوفِـى بشرطك ووعْـدك

إن كنت – بالصُّـح – إبْـنى

إرفع معايا بسواعدك

وبْـدال ما تِـهْـدمها .. إبنى

****

ياوْ لاد بلدنا يا كـُـمّـل ..

الليل مايسْـتـْرش سارق

ما تقولـْـشى حـَّوشت كوم مال

بُـكرة لِـمالك تفارق


******

عارفِـك وعارف جوابـِـك

هاتقولى إنى يسارى

يا سِـتـِّـى عودِى لصوابـِـك

قـَـّربنا نـُـبـْـقو جوارى


******


واللى محـيِّـْرنى صمْـتِـك

ولا ّ عشان الفلايس ؟

بسّ القضيّـة كرامـتِـك

جرحوها ولـْـد الخسايس


_________________________________

الأبيات من شعر عبد الستار سليم ، من قصائد متنوعة
الأحد، يوليو 10، 2011

postheadericon ثورة ساعة ولا كل ساعة


بقالي كتير بتفرج وساكتة ، وبقالي كتير أعصابي تعبانة من اللي بيحصل ومحبطة جداً
أولاً /  كنت متوقعة ان حكومة عصام شرف هيكون آدائها رائع ، وكنت متوقعة منها الكتير ، وفجأة بدأت اشوف عكس اللي متوقعاه تماماً ، وعرفت من ورا الكواليس حاجات غير الحاجات الظاهرة انها كويسة !

ثانياً / احساس ناس كتير بإن " الثورة ما عملتش حاجة " على مستويات مختلفة ، وفي أماكن مختلفة 

ثالثاً / اني فعلاً كانت مشاعري تجاه المجلس العسكري متضاربة ، قرأت من زمااااااااان حاجات كتير بتقول ان المجلس العسكري مش زي ما الناس فاكرة ، وكلام كان منطقي ومقنع جداً ، وبدأت تظهر بوادر لدا .. حاجات صغيرة اغلبية الناس قالت لأ نعديها علشان البلد حالها يمشي والمجلس العسكري اصلاً مع الثورة بس في تخبط في الآداء 

وقلة قليلة جداً كانت بتقول لأ ، مش لازم نعدي أي حاجة لأن الحاجات الصغيرة دي هتخليهم يعملوا حاجات كبيرة ،  لكن للأسف كل الناس اتهمت الفئة القليلة دي بإنها بتصعد الأمور وانها عايزة البلد تولع وخلاص وعايزة احكام عرفية ومش عايزة استقرار في البلد !

بعد كده بفترة طويلة  نسبياً معظم الناس أدركت ان في حاجة مش مظبوطة بتحصل ، والمجلس العسكري بيعمل حاجة مش تمام
فـ كان يوم التدوين ضد المجلس العسكري .

يعني الناس دي كان عندها حق ! طب في ايه بقى ؟؟ ليه بنعمل زي الأول ونسد وداننا عن أي كلام مش عايزين نسمعه او خايفين نسمعه رغم انه منطقي وبالدلائل ؟؟ ليه بنحكم بعواطفنا اللي موديانا ورا الشمس ؟؟؟؟؟

تخيلوا لو الناس كانت صدقت الناس اللي حذرت من المجلس العسكري من البداية ووقفوا ايد واحدة لكل تصرف مش صح 

ماكانش الوضع وصل لـ اللي احنا فيه دلوقتي !

حاجات كتير اوي قسمت ضهرنا من يوم 12 فبراير ، وناس حذرت منها واحنا طنشنا وعملنا مش واخدين بالنا

الاستفتاء ، اللي خلانا نقطع في بعضنا بعد ما كنا ايد واحدة

وبعديه موضوع اقتحام امن الدولة ، وتحويل الجهاز لاسم تاني ! وفرحنا وعديناها رغم ان في ورق اكد ان دي خطتهم بالظبط 

إنهم يعلنوا حل الجهاز في الاعلام وبعد كده يسموه بإسم تاني ويمارس نفس نشاطه في سرية !

نفس فكرة فيلم لا تراجع ولا استسلام  بالظبط " الفكرة اتهرست في 100 الف فيلم قبل كده ، علشان كده ماحدش هيصدق اننا بنعملها "! !!!

بعدها حوارات كتير ، وانشغال كل طرف بتقطيع وتشويه الطرف التاني علشان عينهم على الانتخابات ، المحاكمات والأخبار اللي هدفها فقط انها تحسسنا اننا شمتانين في اللي اتبهدلوا واتهانوا وهم اصلاً لا اتبهدلوا و لا اتهانوا ولا أي حاجة

اخبار كل يوم عن قبض عن فلان  وفضايح فلان وعدد زوجات فلان وممتلكات فلان وعلاقة فلان بالفنانة الشهيرة او المعتزلة مش عارفة مين

كلها حاجات مالهاش أي هدف غير إنها تنسينا نفسنا وتشبع فضولنا واحساسنا بالتشفي في الناس دي وخلاص

وكل ما حد ينبهنا يقولوا عليهم دول فاضيين واستحلوا القعدة في الشارع والخ الخ الخ

وبعديييييييييييييين ؟؟؟؟؟؟

بدأوا يتسرسبوا برة السجن واحد ورا التاني وماحدش بيقول بم .. التليفزيون والجرائد القومية مستمرين في التطبيل للنظام - اللي هو بقى المجلس العسكري دلوقتي

مع محاولات من تحت لتحت لاستجداء شفقتنا وقلوبنا الرحيمة على مبارك الراجل المسكين اللي عنده 80 سنة واحنا - قلبنا قاسي أوي أوي - عايزين - يا حرااااام - نبهدله وندخله السجن !

ودلوقتي ؟؟؟

الوضع رجع أنيل من الأول بالنسبة للثوار .. اكتشفوا فجأة ان الثورة اتسرقت فعلاً ، الشارع مش متعاطف معاهم تماماً 
الشعب كله بقى متفرق ، اللي متفرق علشان الدين واللي متفرق علشان الحزب واللي متفرق علشان اشخاص معينة  والخ الخ الخ

دلوقتي .. المجلس العسكري هيقعد ويأنتخ والشعب نفسه هو اللي هيطرد الناس اللي في التحرير لأنه لعبها صح

كل دا كان ليييييه ؟؟

علشان احنا رضينا بالقليل ، واستسهلنا ، وقعدنا نقول لأ لازم نهدي لازم نهدي عشان نستقر 

البلد هتبوظ وهتجوع وهتولع لو فضلوا في التحرير 

رغم انهم لو كانوا فضلوا في التحرير بمطالب واضحة وبإصرار ومن غير ما نتفرق كان زمان البلد استقرت من شهور وبدأنا بجد على نضافة

لكن - سوري في الكلمة يعني - وساخة الجرح عملت غرغرينا وبدأت تسمم الجسم كله :| 

انا فعلاً دلوقتي مش عارفة اي حاجة علشان كده ساكتة 

مش فاهمة اي حاجة لأن الكذب أكتر بكتيييييييير من الصدق ، وللأسف الكدب مساوي أوي


المتابعون

اعتبرها بيتك ♥

وِش القفص

خليك ورايا

دليفري..