لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، أبريل 29، 2008

postheadericon نعم اخونك

نعم اخونك ..
افكر به ليل نهار ..
وطالما تمنيت ان اكمل معه حياتى ...
احب كل ما فيه ..
رومانسيته .. حنانه ..
رفقه وطيبة قلبه ..
اهتمامه بى وحتى خلافه معى ...
واشتاق ان يعود لى مرة اخرى وان يغمرنى بحنانه من جديد

اتعرف من هو ؟؟
انه انت الذي كان ..
انت قبل ان يثقلك هم جمع المال واحراز الاوسمة

وتحصين نفسك ضد تقلبات الزمن ..
انت قبل ان تنسى وجودى ...
انت قبل ان تطمئن انى معك للابد فتركت حبنا يضمر ويتضاءل
دون ان ترويه بعطفك وحنانك ....
لماذا يا حب العمر نسيت كلماتك العذبة ؟؟ !!
لماذا تنسى حتى ان تتمنى لى يوما جميلا او احلاما
هانئة ؟؟!!
لماذا جف نبع حنانك الذي تخيلت انه لن ينضب ابداً
؟؟
لماذا تفنى نهارك وليلك محاولا ان تصبح اغن واعظم
رجال العالم ؟؟!!
لماذا وانا قد رضيت بك كما كنت ...
ارجوك دع هذا الغريب يرحل عنا ...
وعد لى كما كنت ..صافيا .. صادقا .. محبا عطوفا
عد لى حتى لا اضطر ان اخونك معك وان اشتاق اليك
وانت معى ...
____________________________
قضية ارجو ان يهتم بها الرجال
الأحد، أبريل 27، 2008

postheadericon اعطنى الناى واياك تفتح بؤك ..

زمان السيدة فيروز غنت اعطنى الناى وغنى فالغنا سر الوجود
ايام ماكان بجد الغنى سر الوجود ...

ايام ماكان ناس بتنجح علشان كان صوت

ام كلثوم بيصبرها على المذاكرة ..

لكن دلوقتى السيدة فيروز لو تملك اعادة توزيع

وتاليف الاغنية لخلتها .. اعطنى الناى واياك تفتح بقك ..

ما بنكرش ان زمان كان

فى ناس بتنشز على غرار " الطشت قاللى والكلام الفاضى دا "

لكن دلوقتى اتنسوا

واتمسحوا باستيكة ..

السبب مش ان الجمهور عايز كده زى ما كلهم بيقولوا
السبب هو انهم عايزين كده

الجمهور مفتقد الصوت الحلو ومفتقد الاغانى

الكويسة بس هم بيستسهلوا وبيسترخصوا ..

زمان كانت الاذاعة ما بتذيعش عبد الحليم

نفسه بجلالة قدره لأنها مش معتبراه مطرب ..

دلوقتى ما بقتش بتذيعه علشان بتذيع

سعد الصغير وودانة والذى منه ..

العيب مش فى المستمع اللى اختار انه يكون متلقى

العيب فى اللى بيذيع ومش عامل حساب ان الناس دى عايزة تستمتع مش تنقهر وتتعذب
الجمعة، أبريل 25، 2008

postheadericon ايوة انا اللى هغير الكون (2 ) عامل الناس كما تحب ان يعاملوك ..

كتير مننا بيكونوا ولاد ناس ومحترمين اوى فى كلامهم
ويخرجوا يتعاملوا مع العالم الخارجى يلاقوا الوضع مختلف كتير ..
فى ناس
بتفضل مصدومة .. وناس بتتغير للاسوأ ..
لكن بجد اللى بحترمهم اوى اللى بيغيروا
اللى حواليهم للافضل ..
الموضوع وببساطة قالوه اللى سبقونا فى كلمتين " عامل
الناس كما تحب ان يعاملوك " ..
انا عن نفسى فضلت فترة مصدومة من طريقة الناس فى
المعاملة وفى الكلام ..
وبعدين قلت لنفسى يا ابقى زيهم يا يبقوا زيي .. واصريت
انى ادخل التحدى دا ..
بقيت اعاملهم بالذوق والادب ، واصر انى استعمل كلمات
البعض
بيعتبرها انقرضت زى " لو سمحت " ، " اتفضل " ، " آسفة " ، بعد اذنك ..
الخ
فى الاول قابلت ناس كتير تتريق عليا ، بس بعد كده بقت الناس تعاملنى بالمثل
..
زى ما بقول للسواق اتفضل الاجرة بيقولى اتفضلى الباقى ،
وزى مابقول
للبياع لو سمحت بيقولى اتفضلى وغيره وغيره وغيره ...
حتى عندنا فى البيت كنت
اتضايق جدا لو عملت حاجة وفى البيت
عدت عليهم عادى من غير ما حد يقولى تسلم ايدك
ولا حاجة ..
بقيت انا اقول لماما ولاختى ولاخويا ولبابا تسلم ايدك على كذا لو
حتى حاجة بسيطة ..
لقيتهم مع الوقت اتعودوا عليها وبيقلولى تسلم ايدك على اى
حاجة ولو بسيطة ..
كمان انا مش من النوع اللى بيحب يأخد اوامر من حد ،
فعودتهم لما اطلب طلب ما اصيغهوش فى صورة امر ..
بقيت اقول معلش لو سمحت او
ممكن اطلب طلب رخم ،.... الخ ..
بردو نفس الموضوع انعكس عليا
بجد التجربة دى
من اكتر التجارب اللى حسيت انى بجد غيرت حاجة
و زادتنى اصرار على مواصلة محاولة
تغيير الكون ..
الأحد، أبريل 20، 2008

postheadericon مدونات مصرية للجيب

المصرى اليوم 19 ابريل 2008
كتب : هيثم دبور
«مدونات مصرية للجيب» سلسلة
كتب تستثمر نجاح عالم المدونين يحاول أصحابها أحمد مهنا وأحمد البوهي استثمار هذا
النجاح في الخروج بأفكار المدونين عن الإطار الضيق للإنترنت لتصبح في متناول رجل
الشارع الذي لا يستطيع الدخول علي «الإنترنت».
مهنا والبوهي خريجا تجارة خارجية،
أحدهما يعمل في التجارة والآخر يضارب في البورصة، ويصفان مشروعهما، بأنه حزب
متكامل، وإذا كان عدد المدونين في مصر حوالي ٣٤ ألفاً، فمن حق رجل الشارع أن يتعرف
علي أفكارهم.
مهنا والبوهي يحاولان توصيل الكتاب إلي كل مواطن يستطيع «فك الخط»
من خلال كتيب يصدر أول يونيو المقبل ويضم ٣٠ مدونا تتنوع موضوعاتهم بين السياسة
والأدب والخواطر والمواقف الشخصية، ويباع بسعر لا يزيد علي خمسة جنيهات، وسيتم
طباعة خمسة آلاف نسخة منه يخصص ثلث أرباحها للمدونين المشاركين.
ويعلق مهنا
والبوهي علي تجربة دار الشروق التي سبقتهما في المجال: فكرتنا تختلف عن مدونات
الشروق لأنها تنقل عالم المدونين بما يحمله من تنوع وثراء إلي رجل الشارع البسيط
وليس نقلا للمدونات التي تحمل بعدا أدبيا فقط، كما أنها تضم أسماء مشاهير عالم
التدوين في السياسة.
__________________
اللى عايز يشارك يا جماعة يدخل
على اللينك اللى انا حطاه تحت الصورة فى الجنب
السبت، أبريل 19، 2008

postheadericon من اسوأ ما ابتلى به الشرفاء ..

من عادتىألا أُسَلِمْ بكل ما يقوله المشاهير من الكتاب والادباء والفلاسفة بلا تفكير
 و اعتدت دوماً أن أرفض أن أصدق كل ما يقولونه لمجرد أنهم عظماء ..
  لذلك بطبيعة الحال توقفت كثيراً امام عبارة "فولتير"
   "من اسوأ ما ابتلى به الشرفاء انهم فى العادة جبناء "
    ، فوجدتها - للأسف - حقيقية الى حد بعيد ..
   للأسف دائماً ما أجدُ الشرفاء ضعفاء ومتخاذلين وسلبيين
  بالرغم من أنهم يقفون على ارض صلبة ،
   يقفون في جانب الحق الذي تعلمنا دوماً أنه لابد أن ينتصر في النهاية مهما طال الأمد ..
للأسف الكثير من الشرفاء في أوطاننا يفضلون السير بجوار الحائط ،
بل وداخله لو لزم الأمر ، فيصبحون شركاء في كل جريمة تحدث فى المجتمع بصمتهم وتخاذلهم ..
وعندما تأملت أكثر في عبارة فولتير اكشفت مصيبة أكبر ،
وهي  أن كثير من الشرفاء .. شرفاء لأنهم جبناء ..
 يمتنعون عن مخالفة القانون والعرٌف والتقاليد لمجرد أنهم خائفون من العقاب
 وليس إقتناعاً منهم بالصواب .. وبالتالى هم لا يرون أن غير الشرفاء مخطئين ،
  بالعكس هم فى نظرهم أٌناس شجعان وأقوياء ،
  يتمتعون بقدر أكبر من الجرأة مما مكنهم من العصيان وارتكاب الرزائل والجرائم ..
الكارثة لا تتوقف عند هذا الحد ،
 بل عندما يصل أمثال هؤلاء من "الجبناء الشرفاء " إلى مواقع السلطة والتحكم ،
حين يسقط عنهم الخوف من العقاب ويعتقدوا أنه لا رادع لهم ،
حينها ينكشف النقاب عن وحش كاسر لا يتورع عن قتل أبيه لو أن هذا يفيده ..
ربما يزيل هذا التفسير الحيرة التى تنتابنا عندما نجد الانسان تغير 180 درجة
 حين يجلس على كرسى السلطة في أي مكان ،
  ونظن أن السر فى لعنة السلطة بينما السر أصلا ًيكمن فى نفوسهم
الخميس، أبريل 17، 2008

postheadericon تاج اتنين × واحد

التاج اللذيذ الممتع الصعب جدا دا

جالى من كفراااااااااااااوى & دودو

بصراحة فى الاول كنت بحسبه سهل وتمام وشغال

بس بجد اخدت وقت كبير اوى عقبال ما جاوبته

1- اذكر 10 اشياء عن نفسك

امممممممممممممم المفروض اقول حاجات ماحدش يعرفها عنى اوك


نمبر وان : انى رغم
كل الضحك اللى بضحكه دا بس بحس جوايا حزن الدنيا ، ورغم ان ناس كتير بتقول انى
متفائلة احيانا بحس انى متشائمة جدا وكئيبة جدا


نمبر تو : انى جبااااااااااااااااااااااااااانة اوى رغم
ان ناس كتير بتقول عنى جريئة ..

نمبر ثرى : نفسى اووووووووووى الاقى حد يسمع كل حاجة نفسى اقولها من غير ما يزهق
ومن غير ما اخاف انه يكرهنى او نظرته ليا تتغير ومن غير ما يقول عنى مجنونة ،
واخيراً ودى الاهم انه يفهمنى ..
نمبر فور : اول مرة احس ان 10 حاجات عنى كتير هههههههه
نمبر 5 : انى قلقانة اوووووووووووى من بكرة بجد ..
نمبر 6 : نفسى اعرف رأى الناس فيا بجد من غير مجاملة ومن غير تحيز ضدى ..


نمبر 7 : خايفة اوى لحسن يكون راى الناس فيا وحش
نمبر 8 : امممممممممممممممم انى دلوقتى صدقت دودو (كلمتى ) لما كانت بتقول ان التاج
صعب
نمبر 9 : انى هبلة اوى وبصدق اى حاجة تتقالى ، رغم انى ببقى متأكدة ان اللى قدامى
بيبالغ بس غصب عنى بصدق ..
نمبر 10 : انى كائن غريب اوى بيجمع كل تناقضات الدنيا ..

2- اختر 5 اشخاص تهدى لهم التاج

دا بلوووووووووووة هبليهم بيها ((( سااااااااااااااااامحنى ياااااااااااااااااااااارب )))


اممممممممممم
اهديه ل د / احمد فريج ( مدونة حدوتة )


و عمو احمد ( مدونة منحنيات )


وكمان ليكوريكا ( عنده مدونات كتير هههههه )


و دودو ( مدونة حياة شكل تانى )


واخيراااااااااا


اممممممممممممممممم


الجميلة منمن ختامه مسك بقى ( مدونة My hopes )


3- اترك لهم لينك تخبرهم فية بالتاج


اووووووووكيشين علم وجارى التنفيذ


4- لا تهدى التاج لمن اهداك اياه

تماموز


5- اترك لصديقك الذى اهداك التاج اخبارية بان التاج نزل و تعالى شوفه...


تم التنفييييييييييذ

الأحد، أبريل 13، 2008

postheadericon علشان خاطرى قلب كويس

كتير اوى مش بقلب الشاى كويس ، واجى اشربه الاقيه مش مسكر ومش مظبوط ، وبكسل اجيب سكر تانى
فبضطر اشربه كده .. اللى بيضايقنى بقى انى بعد ما اخلص شرب الشاى بلاقى السكر مركون تحت
يعنى لو كنت قلبت شوية كان زمانى شربت شاى مظبوط ..
تعالى كده نفصص المشكلة دى
اول حاجة المشكلة ايه :
( انى ما عرفتش اشرب شاى مظبوط )
طيب وايه السبب ؟!
( 1 ) انى ما قلبتش الشاى كويس وانا بعمله ..
(( يعنى استهترت وانا بعمل الحاجة ))
(2) انى كسلت اجيب سكر تانى
(( يعنى اتكاسلت عن حل المشكلة رغم انها فى ايدى ))
طيب والنتيجة ايه (( نتيجة المشكلة والاسباب اللى ادت ليها ))
- النتيجة انى ما استمتعتش بالشاى ..
- وانى ضيعت مجهودى وما وصلتش للنتيجة اللى عايزاها
_____________________________
عارفين ان كلنا بنعمل الحركة دى بطرق مختلفة ؟؟
كتيييييييييييييييييير اوى بنستهتر واحنا بنعمل شغلنا ..
وكتيييييييييييييييييير اوى بنكسل نحل المشاكل رغم ان حلها فى ايدينا
وبعد دا كله نندم وندور على حلول صعبة ومتعبة رغم ان الحل اصلا فى ايدينا وجوا الكوباية
علشان كده علشان خااااااااااااااااااطرى اضغط على نفسك وابقى قلب كويس
قلب كويس واعمل كل حاجة كويس
حتى لو تعبت فى الاول بس صدقنى النتيجة هتفرق كتير
الأربعاء، أبريل 09، 2008

postheadericon عربية خبطت كلب !!!

كنت فاتحة البوست الجديد وناوية اعمل موضوع والله نسيت حتى هو عن ايه من الخضة ..
ناس كتير هتقول عادى ماهو بيحصل كل يوم عربية تخبط كلب ، بس بجد اللى كان يسمع صرخته
واللى يقعد يتخيل كم الالم اللى اكيد دلوقتى بيعانيه قلبه يتوجع عليه
والله الموضوع ماتافه ، ولا الكلب دا حاجة نكرة المفروض ما نهتمش باللى حصله
اولا سيدنا محمد - صلى الله عليه وسلم - امرنا نرفق بالحيوان
ثانيا : اللى خبطه دا بالجنون اللى كان ماشى بيه ممكن اوى لو ماحدش عاقبه يخبط ولادنا بكرة وممكن يخبطنا ويموتنا احنا نفسنا
بجد استهتارنا فى الحاجات الصغيرة هو اللى بيخلى الحاجات الكبيرة تحصل
ولو كان فى عقوبة ولو كان فى ضبط للمرور ماكانش حد اتألم ولا حصله حاجة
العيب فين وعلى مين ماعرفش ..
عارفة ان ناس كتير اوى هتقول طب ما كل يوم فى بنى ادمين بتموت من استهتار الناس دى
وهقولهم عارفة والله ، بس بجد صرخته فوقتنى من الاعتياد على الجمود والاستهتار بموت الروح والكائن الحى
اللى حاصل فى بلدنا ..
الاثنين، أبريل 07، 2008

postheadericon المقروضة دى هتكمل 19 سنة بكرة .. انا مش مصدقة


المقروضة اللى انتوا شايفنها فى الصورة دى تبقى وبكل فخر
(( أنــــــــــــــــــــــــــا ))
وانا عندى لسة سنة ، انا لحد دلوقتى مش متخيلة
ان نفس البنت الصغنونة اللى ضحكتها كانت ملعلعة دى تبقى انا
ولا مصدقة بردو انى كبرت وعجزت وهتم بكرة 19 سنة
ياااااااااااااااااااااااه مش متخيلة انى عشت 19 سنة بحالهم ...
يمكن 16 سنة منهم عدوا وانا لسة عبيطة وطفلة وماعرفش حاجة فى الدنيا
لكن بجد بجد اكتر سنتين بدأت فيهم افهم الدنيا السنتين اللى فاتوا
19 سنة بحلوهم ومرهم .. عملوا سارة
ياترى المقروضة اللى فى الصورة اللى فوق دى كانت متخيلة انها هتبقى انا ؟؟
متخيلة الفرح والجرح اللى هتشوفه فى الدنيا دى ؟؟
مش عارفة
يلا كل سنة وانا طيبة
كل سنة وانا لاسعة
كل سنة وانا غزال الرافدين
ويا جماعة كلكم معزومين على عيد ميلادى بكرة
هعمله فى الكلية جايبة بلالين ومصاصة بالهبولى
اللى مش هيجي هو الخسران
ههههههههههههه
السبت، أبريل 05، 2008

postheadericon وداعاً يا شتائى الحبيب

برغم انك لا تحمل الروائح العطرية الرائعة التى يسحرنى بها الربيع الا اننى سافتقدك جداً ..
سأفتقد تقلباتك التى تجعلنى اطمئن بأنى لست المجنونة الوحيدة فى هذا العالم ..
سأفتقد امطارك التى تغسل روحى من الهموم ،
امطارك التى تعيدنى كل قطرة منها عام الى الوراء حتى اعود الى طفولتى الحبيبة ..
سأفتقد لسعاتك الباردة التى تنعش روحى وتعيدها الى الحياة ..
ومعطفى الحبيب ، الذى يشعرنى انى فى حصن حصين ..
سأفتقد ملمسه الدافئ الذى يذكرنى بفراء قطى الراحل ..
سأفتقد كل هذه الاشياء التى تندمج معاُ لتجعل حياتى رائعة ..
وداعاً شتائى الحبيب ، سأنتظرك بكل الشوق ،
ساتحمل الصيف والخريف برحابة صدر ماداموا الضريبة التى يجب ان ادفعها حتى القاك ثانية ....
الجمعة، أبريل 04، 2008

postheadericon موقف مستفز ..

وانا رايحة الكلية الصبح ، اما صدقنا لقينا ميكروباص
رحنا ركبنا فيه قدام جنب السواق ، لأن كان في رجالة كتييييييير اوى بتتزاحم على الباب الكبير
المهم بعد ما ركبنا اكتشفنا انه ملتحى ، وانه متضايق اننا بنات وقعدنا جنبه
رغم اننا روفيعين وكنا بعيييييييييد خالص عنه
المهم يادوبك ركبنا من هنا وراح مشغل شريط بتاع داعية
بيقول فيما معناه (( ان خروج البنات للتعليم والشغل مهزلة ، بهدلة واختلاط وقلة احترام
واننا كنا في بيوتنا معززين مكرمين بس احنا اللى هدمنا عرشنا بايدينا ))
انا قولت اصطبحنا واصطبح الملك لله ..
لأنى من اكتر الناس اللى بتعارض ان البنات والستات يقعدوا فى البيت
وانهم ما يخرجوش يتعلموا طالما التعليم مختلط والكلام دا
المهم عمال يتكلم يتكلم وانا دمى محروق وعمالة اركز فى الكلام واتنقط اكتر
حضرته بيقول (( خلى بالك على بناتك مش بقولك شك فيهم ،
ماشى هما محترمين وكل حاجة بس ايه المانع تاخد جدول محاضرات بنتك
وتنزلها فى يوم تقولها دلوقتى عندك محاضرة واقفة برة ليه !! ))
كل دا ويقوله ما تشكش فيهم .. الانقح انه بيقول (( راعى غنمك كويس )) بص الاستفزاز ..
تخيل لو واحدة بنت مش مسلمة راكبة او سمعت الشريط دا فى اى مكان .. كانت هتقول ايه ؟؟!!
هتقول المسلمين بيعتبروا بناتهم وستتاهتم غنم !!
حاجة هو مش واخد باله منها ، ان البنت لو حضرت المحاضرات والتزمت علشان خايفة من ابوها دى مش تربية صح
عمرى ما بابا سألنى جدول محاضراتى ايه ، وعمره ماجالى الكلية رغم كده انا عمرى ما بفوت محاضرة واقف فى الشارع ولا قدام الكلية علشان ضميرى ما يسمحليش اعمل كده مش اكتر ..
نسى ان المفروض يربى البنت صح و الولد كمان ويعلمهم يخافوا من ربنا وبس ويخافوا على مستقبلهم لأن ماحدش ضامن عمره
والاب اللى بيعمل كده ممكن اوى لما يموت ولاده يبقوا فاشلين وفاسدين ..
حاجة كمان ، بيقول لما بتصل بواحد صديقى وزوجته ترد عليا ، تقولى مش موجود وتقفل السكة .. ببقى عايز اقولها حاجة تقولهاله بس هى مش يتستنى بتقفل السكة .. بفرح بيها اوى والله واقول عرف يختار ..
مع كامل احترامى ليها ، ايه المانع لما حد يتصل يكون عايز زوجى فى حاجة اسمع منه واقول لزوجى لما يرجع ..
هل ذوقياً انى اقفل السكة فى وش حد بيكلمنى ؟!! هل دى الصورة الحلوة اللى المفروض نرسمها .. مش بقول اهزر معاه وادردش ونرغى لكن ايه المانع فى المكالمة دى مثلا
اى حد : السلام عليكم
انا : عليكم السلام ورحمة الله ، مين معايا ؟؟!!
اى حد : انا فلان لو سمحت ممكن اكلم ابو يوسف ؟؟
انا : اسفة ، هو مش موجود .. لو حضرتك عايزه فى حاجة مهمة قولى اقولهاله ، او مثلا كلمه على تليفون كذا
اى حد : ياريت تقوليله كذا كذا ضرورى ..
انا : حاضر ان شاء الله السلام عليكم
تيك تيك خلصت المكالمة ..
فين المشكلة فى كده ؟؟
ياريت يا جماعة لو انا فاهمة غلط توضحولى ..
حاجة كمان ، بيقول واحدة اتصلت بيه تشتكيله من عمايل ابنها فيها اللى وصلتها لدرجة ان جالها السرطان والعياذ بالله
بيقول قطعت قلبى وخلتنى هعيط ، بس انتوا اللى بتعملوا كده فى ولادكم
لما يجي ابنك عايز يحفظ قرآن تمنعوه ولما يكون عايز يلتحى تمنعوه
ولما بنتك تبقى عايزة تلبس نقاب تمنعيها ، بيقول الام اول يوم قبل
ما بنتها تنزل الكلية تقولها : اتصاحبيلك على واحد جدع علشان تعرفى تتجوزى !!
انا دخلت الكلية واختى دخلت قبلى وعمرى ما امى قالتلى كده وعمرى
ما ابويا قالى ما تكلميش زمايلك فى الكلية .. لكن عمرى ما كلمت واحد زميلى من غير داعى
ولا سالته فى اكتر من المدرج فين ولما مش بلاقى بنات خالص .. ليه الصورة البشعة دى عن البنات ؟!!
ليه تحسس الناس ان البنات اللى فى الكلية دى كلها مش بتفكر فى حاجة الا العريس والجواز وبس ؟؟
ليه ترسم صورة وحشة كده لبنات مسلمات ؟؟
ليه لازم اكون منتقبة علشان تحس انى محترمة ؟؟
بيفكرونى ببتاع انت من ديشنا ؟؟
لأ
تبقى من ديش العدو ، وطااااااااااااخ ..
بجد حقيقى حزنت .. حزنت لأنى بنت جامعية ، خرجت من بيتها زى ما بيقول ، بتعب فعلا لكن بقدر كويس اوى احافظ على كرامتى
حزنت لأنى بنت لو سمعت كلام الداعية دا ، مش هحقق اى حاجة لأن العصر غير العصر
لو قعدت فى بيتنا هبقى مجرد غسالة وشغالة لما اتجوز بعد كده
وزوجى يوم ما يحتاج يتكلم مع انسانة تفهمه وتفهم مشاكله فى شغله وتفهم الدنيا هيبص برا لواحدة متعلمة
واتحداه لو جابلى واحدة اليومين دول قعدت فى بيتها واتعلمت واتثقفت زى اللى بتتعلم
ومين اصلا هيعلمها والدنيا بقت زى الطاحونة والناس ماعندهاش وقت لأى حاجة ؟؟!!
الأربعاء، أبريل 02، 2008

postheadericon لحد امتى ؟!!

شفت النهاردة منظر وجع قلبى بجد ، هو مش جديد ، ولا اول مرة اسمع عنه
بس بجد اول مرة اشوفه .. كنت واقفة على موقف الميكروباصات مستنية اركب علشان اروح الكلية
وبعدين كان فى لجنة مرور ، ماسكين فى مواطن ماعرفش هو سواق ولا مواطن عادى ونازلين بهدلة فيه ..
بيهينوه ويضربوه وهو ياعينى بجد شكله غلبان ، مش فقر او كده بس مالوش ضهر ، وواقف معاه واحد عجوز
يهينوه وخلاص كرامته وجعاه ومش قادر يرد عليهم ، يبص بذل ومش قادر يتكلم
ليه وليه مش معاه بطاقة ، ايه المشكلة افرض نسيها ياعم ..
يقولهم اروح القسم يقولوا له وانت فاكر انك هتروح القسم من غير بطاقة دا بعدك ..
وضربوه ..
انا ماعرفش ايه الحكاية بالظبط ، بس كل اللى اعرفه ان دا انسان ، حتى لو غلط من حقه يتعامل معاملة محترمة وانسانية
دا برا بيبقى قاتل قتيل وبيفضلوا يعاملوه حلو لحد ما يعدموه !!
على حد علمى دا مواطن ما ثبتش انه اذنب ، وما ثبتش انه ارتكب جريمة ، ليه تعاملوه كده ؟؟!!
لحد امتى الناس هتبص بانكسار وذل وما تقدرش تعمل حاجة ؟؟!!
لحد امتى بتوع الشرطة هيفضلوا يتعاملوا معانا على اساس اننا من جنس وهما من جنس تانى ؟؟!!
لحد امتى هنفضل نكرههم ويذلونا ؟؟!!
مش عارفة ليه بجد العلاقة بينا وبين الشرطة وصلت لحد كده ؟
ليه بقوا متخيلين انهم ماحدش يقدر عليهم وانهم حقهم الطبيعى وواجبهم الرسمى ذل واهانة الناس مش حمايتهم وحماية امنهم ؟؟!!
لحد امتى هيفضلوا يعملوا كده ونكرههم بعد ما كنا بنحترمهم ؟!! بعد ماكنا نفرح بولادنا لما يقولوا عايزين يطلعوا
ضباط ..
الحدوتة كلها على بعضها باسبابها ونتايجها توجع بجد ..
ملحوظة : انا وقتها اترعبت ، انا لحد دلوقتى ماعملتش بطاقة ،
وكمان كارنية الكلية ضاع ، والكارنية الوحيد اللى فى حوزتى بتاع الجريدة ومش مختوم ،
وكمان كنت ناسياه فى البيت ، وقتها قلت بقى ، على كده ينزلونى من الميكروباص
يهينونى ويبهدلونى لأنى مش معايا بطاقة ؟!!!!
الثلاثاء، أبريل 01، 2008

postheadericon خبر عاجل منقول مباشرة من وكالة مهرة حرة للصحافة والاعلام

طنطا - واحد فرحان

ارسل الرئيس العراقى برقية للرئيس المصرى مهنئا اياه بنجاح ابنة الرافدين والنيل

سارورة الشهيرة بغزال الرافدين ، متمنياً لها دوام التفوق والنجاح ..

هذا وقد شهدت جميع شركات الاتصلات حركة غريبة من الاتصالات

الكثيرة والمتوالية مما ادى الى ارباك حركة الاتصالات الهاتفية ،

وقد ارجع الخبراء السبب الى كثرة المهنئين والمهنئات ...

اضافة الى الكثير من الوفود من جميع انحاء دول العالم حضرت لتحضر مراسم الاحتفال بنجاح سارورة ...

ـــــــــــــــــــــــــــــــــــــــــــــــــــــــــــــــــــــــــــــــــ

خبر آخر من صفحة صدق او لا تصدق

(( اخيرا وبعد طول انتظار وترقب لنتيجة الفرقة الثانية قسم الاعدام بكلية الآداب (( تربية واصلاح وتهذيب ))

خرجت الى النور النتيجة المرتقبة ، بعد ان تحلل الطلاب فى انتظار النتيجة (( الجملى )) كما اطلق عليها البعض ..

الجدير بالذكر ان الطالبة سارة درويش قد اجتازت هذه المحنة ونجحت بتقدير ايضاً ، هى وكل زميلاتها من البنوتات الحلوات ))
صورة ارشيفية للطلبة والطالبات اثناء انتظارهم للنتيجة


المتابعون

اعتبرها بيتك ♥

وِش القفص

خليك ورايا

دليفري..