لعلمك

لعلمك

إقرأ لي

دخلوا بكليك شمال :D

Blog Archive

الأحد، أغسطس 30، 2009

postheadericon هي معرفة الناس كنوز ولا البعد عنهم غنيمة ؟؟

في سؤالين محيرني:
هي فعلاً معرفة الناس كنوز ؟؟
طيب .. لو الكلام دا صحيح
ليه قالوا :
البعد عن الناس غيمة ؟؟
لما قعدت فكرت لقيت ان الاتنين صح 
معرفة الناس كنوز فعلاً .. بس مش أي ناس 
الانسان الصادق الصالح .. الخدوم اللي يبقى سند ليك في وقت الشدة دا كنز
والانسان اللي بيفيدك بعلمه او خبرته في الدنيا دا كنز
والانسان اللي يفتح لك صدره  وترمي همومك بين ايديه ويواسيك وينصحك دا كنز
أما بقى الانسان المنافق ، الغشاش .. الحسود ، الحقود واللي ما بيكتمش السر فدا مصيبة 
والبعد عنه غنيمة بجد 
والانسان اللي قلبه اسود اللي بيملى قلوب اللي حواليه سواد زيه 
الانسان المتشائم اللي يحسسك ان مافيش امل في اي حاجة
والانسان اللي يعمل حبيبك وصاحبك لحد ما يلاقي فرصة ويطعنك في ضهرك 
دا مصيبة .. والبعد عنه غنيمة فعلاً
وبيني وبينكم .. حتى معرفة الناس اللي زي دي بتفيد بردو
زي ما بيقولوا كده 
" بضددها تتمايز الأشياء "
وكل غلطة بنتعلم منها اكيد 
فاضل بقى سؤال أخير محيرني :
ياترى هو احنا لازم نعمق علاقتنا اوي بالناس ونلغي الحدود بيننا ولا لأ ؟؟
في حد قال لي طول ما علاقتك بالناس سطحية هتبقي انسانة سطحية 
ومش هتفهمي الدنيا ..
بس انا مرتاحة كده ، مرتاحة اوي بإني عاملة حدود بين الناس 
علشان كل ما كانوا ابعد كل ما كان الضرر من ضربتهم او طعنتهم اقل ..
وبحس كمان اني كل ما كنت بتكلم اقل وبتفرج على الناس وبراقبهم اكتر

كل ما اتعلمت اكتر واستفدت من الدنيا وكمان اخطائي تبقى اقل
كمان لاحظت اوي ان الاختلاط بالناس اوي .. بيخليني اعيش في حياتهم اكتر ما بعيش في حياتي
وبيخليني ما عنديش وقت اشتغل ولا افكر بروقان
بصراحة بقى وبجد
انا حاسة اني مقتنعة بان معرفة الناس كنوز ، والبعد عنهم " بمسافة كافية " غنيمة 

postheadericon هم بيتكلموا عن مصر يا ولاد ؟؟


امبارح اتهفيت وفتحت التليفزيون

واتفرجت على حلقة من كل مسلسل من بتوع رمضان
بغض النظر عن ان اللبس في المسلسلات بقى انيل من الافلام
وبغض النظر عن ان الشتايم بقت عاااااااااااااادي جداً ،

شكل التيييييييت عندهم بايظة تقريباً
لاحظت اني مش لاقية مصر في المسلسلات
خاااااااااالص
من اول الديكور اللي غربي اوي ، ومابيديش احساس بالبيت كده

كل الديكورات تقريباً واحدة وكلها تحسسك انه استديو مش بيت  ..

مش بيت مصري ع الأقل
مش قصدي فقر أو غنى .. لأ قصدي روح
مروراً بقى باللبس ، وبالتصرفات والمناسبات وكل حاجة

يعني في مشهد كالآتي
لوسي بنتها راجعة من برة ، نازلة من عربية واجد " صاحبها " وهي مكشرة وضاربة بوز
تقوم مامتها تشخط " ما شخطتش اوي كمان " وتقولها ايه ؟؟
مالك كده مش على بعضك وحالك متشقلب ، الصبح خرجتي مع اسماعيل وراجعة بالليل مع كريم ؟؟؟؟؟
راحت بنتها بصت لها كده ودمعت
راحت النبرة اختلفت خااااااااالص وقالت لها ايه
:
يا حبيبتي يابنتي .. اطلعي خدي حمام واهدي كده

وانا هعدي عليكي في اوضتك نتكلم شوية

!!!
يعني هي ما عندهاش اي مشكلة ان بنتها خارجة مع اسماعيل
،
ولا انها راجعة مع كريم، ولا انها طول النهار برة وانها
راجعة في عربية واحد " صاحبها " هي كل مشكلتها ان بنتها ... راجعة مكلضمة
دول عايشين في مصر !!
:D

آه والله في مصر
وغيرها وغيرها .. دا هي حلقة يتيمة اللي اتفرجت عليها من كل مسلسل واتشليت بجد
وختمت بقى بالبرنامج السخيف الثقيل الوقح بجد اللي اسمه ستار بلس
  
بتاع محسن جابر وعلا رامي وواحد كده من اللي كانوا بيطلعوا في اديني عقلك

3
حشرات قاعدين جنب بعض واسمهم لجنة تحكيم

انا كنت بحب علا رامي لحد امبارح
لما شوفت قلة ذوقها ووقاحتها ما بقتش طايقاها
 ما انكرش ان اللي متقدمين للمسابقة عاهات اساساً وماعندهمش ريحة الموهبة
 
لكن هم اساساً عاملين البرنامج علشان يتيرأوا عليهم
 ويستغلوا انهم حلمهم يبقوا ممثلين او مغنين ويسخروا منهم
بجد حاجة " مقززة " جداً وبعد ما كنت قرفانة من الراديو اكتشفت انه احسن بمراااااااااااااااااااااحل والله
السبت، أغسطس 29، 2009

postheadericon يابكرة بستناك .. ليك العيون حنوا




ناس كتير أوي بتقعد تقول انها بتحن لزمان

وانها نفسها ايام زمان ترجع تاني ،

وانهم نفسهم يرجعوا صغيرين من تاني ..
لكن انا عمري ما حنيت لزمان ..

مش بفتكر أيام زمان وعنيا بتدمع من الحنين

ولا عمري اتمنيت ارجع طفلة تاني أبداً ..

دا انا يمكن مستعجلة اوووووي على بكرة علشان انا بهرب من امبارح

امبارح ما كانش وحش .. بس بكرة هيبقى أحلى

امبارح كنت طفلة .. قراري مش بإيدي .. حريتي مش في إيدي

لكن كل ما اكبر كل ما امسك خيوط حياتي بقوة أكبر

امبارح ما كنتش انت في حياتي ..

تفتكر دا مش سبب كفاية علشان ما اتمناش أبداً اني ارجع لامبارح ؟؟


وبكرة .. بكرة عندي أمل كبيييييير أوي انه يبقى معاك

يبقى ليك وبين ايديك ..


ودا كفاية اووووووي علشان استنى بكرة بشوق ..



وحشتني أووووووي ... يا بكرة


يابكرة بستناك ..

ليك العيون حنوا






الخميس، أغسطس 27، 2009

postheadericon لما تطلع م البيضة يا حبيبي ابقى اتكلم




كنت بقلب في مجلة الهلال .. في اعداد قديمة من ايام السبعينيات وكده

لقيت مقال عنوانه " فلان الفلاني أستاذ جيل .. ربما ، ولكن جيلنا لا يرى فيه شيئاً "

بغض النظر عن كلامهم صح ولا غلط بس عجبني الموضوع بجد

حسيت فيه حاجة مفقودة عندنا دلوقتي .. ويمكن من زمان كمان

يمكن الدنيا اتقلبت وقتها على اللي عامل المقال دا

ويمكن ما اتقلبتش .. الله اعلم

لكن النقطة اللي بتكلم فيها ، واللي لفتت نظري وعجبتني

ان كاتب المقال قال رأيه بصراحة في حاجة الناس اعتبرتها حقيقة ما فيش فيها جدال

يعني مثلاً انا واحدة عندي عشرين سنة .. لو جيت قولت مثلاً

" انا بحس ان افلام يوسف شاهين مش مفهومة ومش بحبها "

هتلاقي كمية من البشر جات تقول لي

" وانتي مين اصلاً علشان تقولي على يوسف شاهين كده ؟؟ "

" وانتي ايه اساسا ً علشان تتكلمي عنه ؟؟ "

" انتي يا مفعوصة يا للي ما طلعتيش م البيضة بتتكلمي عن يوسف شاهين ؟؟ "

" وانتي مين علشان تقولي رأيك ؟؟ لما تكبري يا حلوة ابقي قولي رأيك "

وكأن حرية الرأي حق للكبير وبس ،

وكأن كمان الانسان اللي قالوا على شغله كويس زمان خلاص لازم يبقى كويس مافيش نقاش

طب يا جماعة انا عندي وجهة نظر تانية

" انكتمي "

طيب يا جماعة لولا اختلاف الاذواق لبارت السلع

" روحي العبي يا شاطرة "

بالرغم من انه ممكن جداً يكون الانسان دا كان احسن الوحشين في وقته

وممكن يكون قال حاجة غلط لأن مافيش حد كامل

وممكن يكون الانسان اللي لسة سنه صغير دا ربنا فاتح عليه وقادر يشوف حاجة ماحدش واخد باله منها

لكن ماااااافيش .. مستحيييييييييل

لو اتكلمت عن أي حد من اللي الناس خلاص اعتبرتهم زي الأنبياء دول

هيبقى اسمك واحد قليل الأدب ، وهو دا الجيل الجديد مش متربي

و هيبقى اسمك بتعمل كده علشان مش فاهم أي حاجة

و ......... الخ الخ


الغريبة بقى ان ممكن يكون اللي محموق أوي وبيدافع عن مثلاً يوسف شاهين ما بيفهمش بردو أفلامه

لكن هو فاكر ان العيب في نفسه ، وان مش معقولة الناس دي كلها مش فاهمة يعني

بالمناسبة بقى .. انا ما بحبش افلام يوسف شاهين وكتير اوي مش بفهمها

ومش بحب نجيب محفوظ وشايفة ان حاجة زي " اصداء السيرة الذاتية "

و الكتاب اللي بيحكي فيه عن أحلامه .. حاجتين مالهمش لازمة ..

لا صياغتهم حلوة ولا فيهم فكرة جديدة






الأحد، أغسطس 23، 2009

postheadericon احساس رخم

لما تحسي انك عبء على اللي حواليك وهم متحرك

لازم علشان تتحركي من البيت حد يخرج معاكي

لازم علشان تسافري حد يسافر معاكي

لازم علشان تشتري حاجة حد يروح معاكي

والسبب ؟؟

لأنك اكيد عاجزة عن حماية نفسك

أو لأنك ناقصة العقل ولازم حد يشرف عليكي

وماحدش يقول لي بتحسي انك جوهرة

حتى لو جوهرة .. الجوهرة " شيء " مش انسان

والجوهرة حاجة ضعيفة ما تقدرش تدافع عن نفسها

والجوهرة مالهاش عقل

واللي اعرفه اني عندي عقل ، وان اللي بيحمي هو ربنا

واني لو عايزة اعمل غلط هعمله ولو عليا ألف رقيب

غلطة كبيرة اوي بيرتكبها المجتمع في حق البنت

وهي انها لازم تكون متعلقة برقبة راجل

ابوها واخوها وبعدهم جوزها . .. ولو لا قدر الله حصل حاجة لدول يبقى تتعلق في رقبة خالها او عمها

ولو ما عملتش كده تبقى واحدة عايزة تدور على حل شعرها او واحدة مسترجلة

وغالباً الراجل اللي هي متعلقة فيه دا بيعتبرها مصيبة وحلت عليه

ولازم يحاول يستفيد منها بأكبر قدر ممكن .. علشان ما يطلعش خسران في الحسبة دي

وللأسف .. مش بس الرجالة اللي بتعمل كده .. لأ الستات كمان

كل أم بترضع بنتها الخوف مع اللبن ، بتحسسها انها عاجزة وضايعة وتايهة لو مالهاش راجل

وتحسسها انه - استغفر الله العظيم - الراحل إله ولازم تسمع كلامه والا يطردها من رحمته


فعلاً احساس مش بس رخم .. دا قاتل كمان
الجمعة، أغسطس 21، 2009

postheadericon اعترافات مش رمضانية

كنت بقلب في مدونة اسمها هوامش على دفتر حياتي ، لأني حسيت البنت اللي بتكتبها زيي أوي

وان كنت مش عبقرية زيها .. المهم وانا بقلب شوفت البوست دا ..

وجعني اوي وكأنها المرة دي بتكتب عني أوي وكأن الكلام موجه ليا انا ..


أكيد اللي دخل وقرا البوست هيفهم كلامي اوي ، اما اللي مكسل يروح هناك (( بكسل كتير على فكرة ما تتكسفش يعني ههههههههه )) فالموضوع بيدور حوالين واحدة صاحبتها هي بتكلمها وقررت تخرجها من حياتها .. البنت دي ما بتهتمش بأصحابها ودايماً بيضيعوا منها رغم انهم كانوا بيحبوها بجد لكن هي ما بتقدرش تحافظ عليهم ..

قالت لها كام جملة بجد وجعوني اوووووي :

" عايزة أقلك على حاجة
صحابك اللي عمالة تضيعيهم واحدة ورا واحدة وأعتقد إن خلاص ما باقيلكيش حد.. بجد مش هتعرفي تعوضيهم تاني
مش عشان أنا واحدة منهم.. لا.. بس عشان الناس دي فعلا كانت بتحبك بجد "



وقالت لها كمان :

"

نصيحة أخيرة
ما تتحججيش تاني لحد إن إنتي مشغولة وماعندكيش وقت
عشان انتي عارفة كويس وكلنا عارفين إن أي حد (عايز) يعمل حاجة بيعرف يلاقي لها وقت
ولما تعرفي حد بعد كده وتقرري تصاحبيه.. عرفيه إن الصداقة دي ليها مدة صلاحية وبعد مدة بتنفذ "




انا بعترف اني زيها .. ضاع مني اصحاب كتير اوي وكانوا بيحبوني بجد

لأني ما بقدرش احافظ على اصحابي

انا واخدة الدنيا كأني في سباق .. بعمل مليون حاجة في وقت واحد

وحتى لما بيكون متبقى وقت لأصحابي .. ما ببقاش قادرة اتواصل مع حد

مش تعب بدني لأ .. ببقى محتاجة اقعد مع نفسي اراجع حساباتي

ومحتاجة ارتب حياتي والاقي وقت آخد نَفسي فيه


من فترة في انسان قال لي انتي اتغيرتي يا سارة اوي

وانا عارفة اني اتغيرت

انا ما بقتش اتكلم مع حد تقريباً غير

4 أشخاص .. هم اللي دايماً بكلمهم ودايماً معاهم

وهم بجد تعبوا معايا أوي علشان يحافظوا على علاقتنا

استحملوني اوي ولو ما سألتش هم يسألوا

خلوني بالتدريج اتعلم ازاي اسأل على الناس واهتم بيهم


انا بجد ساعات بحس اني انسانة مش طبيعية لأني بهرب من الناس بشكل رهيب

انا طول عمري كده ... لكن زمان كنت بهرب من اللي ما اعرفهمش

دلوقتي بهرب اكتر من اللي اعرفهم

بفضل اكون ساكتة او بشتغل عن اني اكون وسط الناس


مش عارفة ليه .. ومش عارفة لحد امتى هفضل كده

بس والله العظيم انا بحب كل اصحابي .. وحتى لو ما سألتش عنهم ببقى مشغولة بيهم

و بيوحشوني اووووووي وببقى نفسي اتكلم معاهم واشوفهم

لكن كل دا جوايا مش بحوله لواقع

خايفة اوي ما اتعلمش غير لما اخسر ناس عزيزة اوي عليا

ونفسي اتعلم قبل ما اخسرهم



الثلاثاء، أغسطس 11، 2009

postheadericon شارعنا دخلته رقاصة ؟!!!




شارعنا حبيبي انضف شارع في مدينتنا المصونة

انضف شارع ، واهدى شارع ، واوسع شارع

وكل سكان الشارع نفس الطباع .. ما بنحبش الدوشة
ما بنحبش قلة الأدب .. ما بنحبش الزحمة

يوم ما حد بيتجوز في الشارع بنبقى مستحملين الزيطة على فص عيننا

ونقول معلش جيراننا بقى وكده

ومن حقهم يفرحوا

لكن اللي حصل امبارح دا لا يطااااااااااااااق

اقولكم ايه اللي حصل ..

اول امبارح على المغرب كده لقينا عربية داخلة الشارع وشايلة خشب وقماش

بتاع الصوان بتاع الفرح او العزا

فكلنا استغربنا قولنا مين دا اللي هيتجوز في شارعنا وما عزمش حد او مين اللي مات واحنا ما نعرفش كده ؟؟


المهم استنينا وقولنا يا خبر بفلوس بكرة يبقى ببلاش

وجه بكرة ابو بلاش وياريته ما جاااااااااااااااااش


وبدأوا ينصبوا الصوان ، ومن غير استئذان علقوا فروع نور في كل بلكونات الشارع


اكتشفنا ان دا فرح ، بتاع ناس مش من شارعنا ولا من منطقتنا اساساً

هم استنضفوا الشارع .. راحم جم عملوا الفرح فيه من غير لا احم ولا دستور

مش دي المشكلة .. المشكلة ان العيلة دي معروفة ان افراحها بتقعد للفجر

و على عينك يا تااااااااجر .. شوفنا البيرة وهي داخلة من ضمن استعدادت الفرح

والفرح اشتغل .. واشتغل بقى معاه .. ضرب نار ، بانجو ، بيرة ، رقاصة

لأ والأنيل بقى اييييييييه ؟؟

البهوات معازيم الفرح .. قلبوا كل حتة ارض فاضية في شارعنا لــ " مراحيض عامة "

احنا مثلاً .. بيتنا في اول الشارع ، جنب بيتنا في ارض بتاعتنا كانت جنينه بعدين قولنا هنبنيها

فشلنا الزرع وشيلنا السور بتاع الجنينة تمهيداً لاننا نبنيها ، هم دخلوا فيها وقلبوها .............

مش احنا بس ، دا كل حد في الشارع جنبه جنينة او ارض لسة بتتبني حصل عنده كده

وعلى الساعة واحدة بالليل كانت السحابة البيضا وصلت للسما ومغطية الشارع كله

دا غير الميكروفونات اللي جابت لنا صمم

والفرح استمر لحد بعد صلاة الفجر ، ختموها بخناقة كبيرة .. كرسي فـ الكلوب

فـ الفرح خلص .. يعني لو ما كانوش اتخانقوا ما كانش الفرح خلص

طبعاً طول ما الفرح شغال في ناس اشكال والوان داخلة وخارجة م الشارع

وناس تسند في اي جنب وتقف تحشش

وكل اللي في الشارع مرعوب من اللي ممكن يحصل لو حد من دول اتهجم على بيته

كمان بعد ما خلصوا الفرح ما هانش عليهم ينضفوا الشارع لأ ...

راميين بواقي الأكل في الشارع والقطط والكلاب جات تاكل منها

قمة البلطجة بجد .. حسبي الله ونعم الوكيل


الأربعاء، أغسطس 05، 2009

postheadericon للأســف ....




يحب معظم الشعب المصري " الكوسة " حين " تُشبعه " ...

ويلعنها فقط ...

حين تُشبِع غيره و يجوع هو !!

المتابعون

اعتبرها بيتك ♥

وِش القفص

خليك ورايا

دليفري..