لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، مارس 02، 2010

postheadericon مش عايزة ابقى ورقة خريف

في مقولة بتقول 
معظم الناس يتخيلون أن الانسان حين يتقدم في السن
يجب أن يتخلى عن أشياء كثيرة ..
لكن الحقيقة هي انه يشيخ لأنه تخلى عن هذه الأشياء
شاغلني أوي الموضوع دا .. نفسي ما ابقاش زي معظم كبار السن اللي شوفتهم

في مصر وفي الشرق عامة .. الانسان بمجرد ما يجَوّز أولاده بيعتبر ان رسالته في الحياة انتهت

وبيقعد في بيته يستنى الموت 

ما بيفكرش يعمل حاجة جديدة في حياته 
ما بيفكرش حتى يمارس هواياته اللي كان بيحبها 

ولا يفكر يشتري لنفسه لبس جديد مثلاً ولا يعمل في حياته حاجة مختلفة

وان كلمته يقولك

إيييييييييييه مسك الختام بقى يا بني 

بستغرب لهم اوي ، ليه بيموتوا نفسهم قبل ما يموتوا ؟؟

نفسي ما ابقاش كده بجد .. نفسي ما ابقاش ورقة خريف الكل متوقع انها هتقع في أي لحظة

و إن وجدوها في الشجرة زي عدمه

نفسي أفضل بتحرك وبشتغل وبعمل انشطة واشارك ف المجتمع لحد ما اموت

نفسي افضل اروش نفسي وأدلعها لحد ما اموت 

- دا بفرض اني بروش نفسي وادلعها حالياً يعني - ما علينا عدووووووها :D

نفسي ما ابقاش عبء على حد ولا الناس تبقى مستنياني اموت من كتر إملالي
على فكرة الموضوع مش مستحيل ومالوش علاقة بالصحة والمرض

قد ما هو ليه علاقة برسالة البني آدم اللي راسمها لنفسه

 يعني لو البني آدم متخيل ان كل مهمته في الحياة -بس- انه يربي عياله ويكبرهم

لحد ما يتجوزوا وخلاص كده هيحقق الهدف دا وبعد كده يحس ان حياته مالهاش لازمة بقى

لكن لو البني آدم حط لنفسه هدف متجدد .. ما بينتهيش أبداً زي انه مثلاً يتعلم حاجات جديدة

أو انه يخدم الناس ويشارك في حل مشاكلهم ويساعدهم

عمره ما هيحس ان حياته مالهاش قيمة 

****
في انسان بجد نفسي احكي لكم عليه بمناسبة الموضوع دا 


عامل بسيط بيشتغل حمّال .. اسمه " عم كمال "  بيشيل الطوب والأسمنت والرمل وكده يطلعهم للمباني 

لما يكون في حد بيبني مثلاً في الدور التاني او التالت

وعايز يطَّلع الطوب والأسمنت والرمل علشان البنايين هو بيطلعهم مقابل فلوس طبعاً

هي دي مهنته .. 

الراجل دا عجوز وشكله عنده تمانين سنة من أيام ما انا كنت طفلة

من قبل ما ادخل ابتدائي وهو اللي طلع الطوب والأسمنت لبيتنا كله

من أول دور لآخر دور

الراجل دا ماشاء الله عليه .. بيشيل احمال رهيبة 

وبيطلع كتير اوي .. ورغم إنه سنه كبير إلا انه بيشتغل بكل حيوية ونشاط

الجميل بقى ..

إنه دلوقتي عنده احفاد .. ويمكن أحفاده خلفوا كمان

ومعاه فلوس الحمد لله حلوة يعني تعيشه مبسوط

وولاده كلهم بيشتغلوا .. وعنده بيت كبير 

ورغم كل دا .. مش راضي يبطل شغل

ولاده يقولوا له ارتاح يقول لأ .. لو بطلت شغل هموت !

فعلاً هو كده .. لو بطل شغل هيعيا وهيموت

لو ما ماتش علشان عمره لسة فيه بقية .. هيموت معنوياً ونفسياً 

انا كان زمان بيصعب عليّا وكنت بحسبه غلبان علشان كده بيشتغل

لكن لما عرفت الحقيقية دي .. احترمته اوي وكبر في نظري أوي

رغم انه انسان بسيط جداً بس بيدي مليون درس لينا كلنا

مش لازم نبطل شغل وتفاعل وحيوية إلا لما نموت

طالما ربنا لسة مدينا عمر يبقى احنا لسة في حاجة ممكن نعملها

لأن لو مالناش لازمة ولا فايدة ومهمتنا في الحياة انتهت ربنا هياخدنا 

لأنه - سبحانه وتعالى -  " لم يخلق شيئاً عبثاً ولم يترك خلقه سدى



- الصورة من موقع الفنانة سوزان عليوان  -



12 بوينتس أوف فيو:

P A S H A يقول...

البوست ده عسل قوووووي بجد .. أسلوبك بعد الهايل بشويتين .. ربنا يوفقك ويكرمك يا رب .

تحياااااااااااتي

بقى أنتِ ساره ؟؟ .. ممممممم .. قولي لمنونه إني عرفت أوصل لوحدي أهه !!

- الصورة كمان لذيذة جداً على فكرة !

مبسوط بإني مريت من هنا حقيقي .

اتشرفت جداً وآسف للإطالة

:)))))

سلام

غير معرف يقول...

على فكرة الموضوع دة مهم جدا وتقريبا كل الناس مش بتفكر انها تجدد نشاطها شايفين ان حياتهم بتقف عند حد معين وغالبا بيكون مرتين مرة بعد سن المعاش والتانية لما يجوزو اولادهم انا معاكى لازم كلنا منفكرش كدة لازم نفضل روشين على طووووول

احاسيس آيوشه يقول...

بوست حلو جدا وعندك حق احنا يمكن شباب ومفيش هدف ولا رسالة فى الحياة
مابالك لما نكبر نعمل ايه

NeVeN يقول...

بوست حلو اوى
انتى بجد مش هتبقى ورقة خريف لانك فكرتى بالاسلوب دة

بصى بنبقا ورقة خريف لان الناس بتعتبر زى ما انتى قولتى اقصى طموحها انها تجوز العيال وشكرا وييجى بعد كدة احنا بنستعد عشان نقابل وجه كريم طيب ما احنا كدة كدة كلنا هنقابله مش شرط بقا تحديدا بعد ما نجوزهم ونطلع على المعاش الفكرة دى لوحدها تقصر العمر
دة احنا ياللى لسة شباب من واحنا صغيرين عاوزين نتجوز عشان يبقا عندنا نونو نلعب بيه ونربيه ويبقا احسن واحد فى الدنيا وبس

اسفة بجد على الاطالة بس الموضوع شدنى اوى

تحياتى

انسان عادي يقول...

احم
ازيك يا سارة
الموضوع حلو وفعلا موجود كتير
وانا بالنسبة لي لو حسيت ان مفيش حاجة في الدنيا اعملها اعتقد وقتها ابقي مت
بس احنا لو بصينا لحياتنا من الناحية الدينية هنلاقي ربنا خلقنا في الدنيا عشان نعبده
ومن ضمن العبادة دي اعمار الارض
لو حطينا ده في دماغنا اعتقد ان احنا مش هنمل ابدا من الحياة ومش هيجي يوم نلاقي نفسنا مش لاقيين حاجة نعملها
انا كده .... سبرايت
ههههههههه
سلام

star in the sky يقول...

الاول عجبنى البوست

بس تعرفى انا مش عاوزة اكبر عشان حاجة تانى عشان الناس عندنا لما بتكبر بتتعب اوى ومش بتعمل اى حاجة ومش بتلاقى حد معاها بمرور الوقت يمكن لانها زى ما قلتى مش اتعودت تهتم بيحاتها فمبقاش عندها ااى حاجة تربطها بالناس بعد ما بتكبر

البوست عجبنى اووى بجد والراجل ده بجد حاجة محترمة جداا وفاهمة الحياة بطريقة مختلفة وبطريقة فيها روح وحياة ونجاح
خلانى افكر بطريقة تانية

هراء لا داعى له ..... يقول...

الفكرة فى نوعية تربية الشعب المصرى

إحنا عندنا بنربى البنت من صغرها معتمدين على زرع فكرة واحدة فى دماغها و هى إنها لازم تبقى عروسة و تتجوز و تخلف و تربى عيال

كذلك الولد ....هيكبر و يبقى راجل و يخلف عيال و يشيل مسئولية بيت


طيب يا جماعة هو إحنا خلقنا علشان نكون أسر و نربى عيال ــ دا لو بنربى أساسا ...دلوقتى التلفزيون هو إللى بيربى العيال مش أهاليهم بس دا موضوع تانى ــ

لأ.....

المفروض إننا مخلوقين علشان نعبد ربنا و نعمر أرضه

الهدف دا لو حطيناه فى كل حاجة قدامنا

أكيد هتبقى حياتنا أفضل و كمان ليها هدف و ليها برنامج من لحظة التكليف و البلوغ للحظة الموت


فى حديث شريف بيقول فيما معناه

(( إذا قامت الساعة و فى يد أحدكم فسيلة فليغرسها ))

طيب و إيه الفايدة من غرس نخلة صغيرة و القيامة أصلا بتقوم و الأرض كلها هتتقلب رأسا على عقب

ملكش دعوة ...لإن فى حكم كتير إنت مش هتقدر تتدركها لإن عقلك قاصر و محدود الحكمة


إغرسها و خلاص


بنفس المبدأ ....

إشتغل بأى حاجة مفيدة طول ما فيك صحة و عقل



و الناس برا بعد ما ولادهم بيكبروا و يسيبوهم بيبدأوا يستمتعوا بحياتهم من جديد

إنما حاجات زى خلاص معادش فاضل فى العمر قد إللى راح و حسن الختام و هذه الدعوات المثبطة غريبة المنطق ...دا كله هراء


الحياة لا تنتهى إلا بخروج الروح

بنـوتــــة يقول...

سلامي لعم كمال يا سارة
بحب أنا الناس دي أوي
بحب الإنسان اللي عنده طموح و رسالة
حتى لو وصل لغاية طموحاته رسالته بتخليه يكمل
بحبهم جداً و بحترمهم أكتر
و في مجتمعنا ده اللي بينقطع أمله و عمله عند الجواز و الخلفة و التربية و التجويز - عدوها مش لازم فصيح المرة دي يعني
^ـ^
زي ما " هراء لا داعي له " ما قال - و أنا أؤيده إلى حد كبير
فالناس دي - زي عم كمال - بتدبنب جفعة جامة أوي لفوق و أدام كمان
بحس فعلاً إني أقدر أدي و أكمل
مش فترة فوران و انتهينا
تسلم إيديكي يا سارة
فكرتيني بعم محمود - ربنا يحفظه و يشفيه

تقبلي مروري على قاعة العرش مولاتي
^ـ^

Cute Kitty **sookra يقول...

والله عندك حق جدا

انا احيانا كتير بفكر ه ياترى لما اتجوز واخلف هيكون كل همى ان اربى عيالى واجوزهم وساعتها ابقى خلاص موش عاوزه اعمل حاجه ولاانا زى مابفكر انى اتعلم واتغير

موضوع بجد تسلمى عليه

kafrawy يقول...

تقريبا

شوفت الفيلم دة قبل كدة بالاماره كان فيه امينه رزق الله يرحمها

ابعادك الخياليه محتاجه تصحيح مسار ..؟

تعالى زورينى وبلاش نداله اكتر من كدة

سمع هوص (Abo 3li) يقول...

وانا كمان
بس

حصان المرجيحة يقول...

نفسي ما ابقاش عبء على حد
اجمل كلمة كتبتيها
شكرا ليكي

المتابعون

اعتبرها بيتك ♥

وِش القفص

خليك ورايا

دليفري..