المحبة القاسية AKA لغز الصندوق الورق

 في محادثة عميقة مع توت، كانت بتتكلم عن حاجة مهمة وقالت: "انتي عارفة إن فيه محبة قاسية ساعات بيكون الشخص، محتاج اوي يتحب بطريقة معينة بس بياخد كل المحبة بالصور العكسية، للي هو محتاجه، زي لما تكوني محتاجة حد يخرج معاكي دلوقتي فحد يجيبلك كيكة. ده فعل جميل اويييي وكله حنية بس انا كنت عاوزاك تخرج معايا بس فيه اسباب كتيرة مانعة ده".

دا فكرني جدًا جدًا بكم الميمز والكوميكس اللي بتتعمل عن القطط، عن إزاي بنجيب لها بيت تحفة وشجرة للخربشة، ولوح للخربشة، وهي تسيب كل دا وتروح تقعد في الصندوق الورق. واصحابها يبقوا هيتجننوا. الحقيقة أنا مش عارفة الميمز والكوميكس دي بتتريق على غرابة القطط ولا غباء البشر اللي مصرين إنهم يمتعوا القطة ويدلعوها بطريقة هي لا طلبتها ولا بتحبها، وهي طلباتها أبسط من كده بكتير! 

نفس الموضوع في لغات الحب، والهدايا، طول الوقت بلاحظ الناس بتقدم الحب بالطريقة اللي تتمنى تاخد بيها الحب، والطريقة اللي تخليهم راضيين عن نفسهم وحاسين إنهم كويسين عشان بيقدموا الحب دا، من غير ما تسأل نفسها أبدًا اللي قدامها دا محتاج حب طبيعته ايه. أتمنى يومًا ما لما احب حد يبقى بيننا المساحة دي، إننا نتكلم إحنا بنحب نتحب إزاي ونحاول نقدم لبعض الحب بالطريقة اللي مفتقدينها ونفسنا فيها، بدل ما نغرق بعض كيك (زي مثال توت) لحد ما يجي لنا تخمة، ونفضل بردو عطشانين حب، ويفضلوا هم مستغربين إحنا مش مبسوطين ليه! ومستنكرين عدم تقديرنا لمجهودهم. 

نفس الفكرة مع الهدايا، الناس بتقدم الهدايا اللي نفسها تيجي لها، وبالطريقة اللي نفسها تيجي لها وما بتفكرش أبدًا هل دا هيسعد الطرف التاني ولا لأ.

اكتر حاجة بكرهها في عيد ميلادي إن حد يسألني انتي عايزة هدية ايه. (خاصة لو حد قريب مني) بحس دا استسهال وكسل. بحس اللي قدامي عايز يجيب هدية "ضامن" إنها هتعجبني من غير ما يفكر كتير ولا يركز في تفاصيلي فيسألني عن حاجة محتاجاها وخلاص. بينما أنا هنبسط بأي هدية تيجي لو حسيتها related بيا وباهتماماتي وتفاصيلي الصغيرة. من غير ما يسألوني. عشان دا اللي بحب اعمله، لما اكون هجيب لحد بحبه هدية ممكن اتتبعه لشهور واشوف كل حاجة قال نفسه فيها واجيبله اللي اقدر عليه منها. 

ودا هيوديني لنقطة مهمة، توت بردو كانت بتتكلم فيها "ساعات بحس إن البطر على الحاجات الكويسة ممكن يخليها كلها تمشي، لان الحياة قاسية، بتطلبي حاجات فتديكي حاجات تانية لو متبسطيش بيها هتاخد كله وتمشي" ودا انا فاهماه جدًا، واتعلمت مؤخرًا أقدر المجهود اللي الناس بتبذله في سبيل محبتي. بقيت اتفهم لما اصحابي يسألوني عايزة هدية ايه، عشان هم عايزين يكونوا متأكدين إني هبقى مستفيدة ومبسوطة من الهدية. وبقيت في عيد ميلادهم بعمل نفس الحاجة عشان فهمت إن دا شكل المحبة اللي مستنيينه، والطريقة اللي يتمنوا يتقدم لهم بيها هدايا. بس من جوايا حتة بتبقى نفسها جدًا حد يبذل المجهود اللي انا مستعدة أبذله عشان أعرف التفاصيل وأبين اهتمام زي بالظبط لما توت قالت في آخر كلامها في الموضوع دا "بس انا جوايا مشاعر وحاجات كتير اوي مضغوطة ومش عارفة اروح بيها فين"!