أنا مبحبش أصحى بدري. طول حياتي، وفي سنين الدراسة كان إني أصحى بدري عشان المدرسة والدروس هو الجحيم بعينه. ماعدا الأوقات اللي كان بيبقى في في حياتي قطة. ببقى مستنية أصحى من النوم بفارغ الصبر عشان هشوف القطة (اللي بدخلها الشقة تهريب) وهتقعد تلعب معايا. وهم الصبح بيبقى مزاجهم رايق. وكل خطوة في الاستعداد للمدرسة بتبقى ممتعة، أربط الكوتشي هي تفكه أجري وراها عشان خطفت الشراب.. أي حاجة بعملها بتحولها للعبة..

بحكي ليه دا دلوقتي؟ عشان بقالي فترة في موقف حصل لي في إعدادي نط قدام عيني من غير سبب وبإلحاح غريب.. ببتسم كل ما افتكره وخلاص أنسى الموضوع.. بعدين لقيت صديقة عندي بالصدفة بتفكرني امبارح بيه! استغربت إنها فاكراه.. استغربت إن حد فاكره أصلاً..

كان عندي درس الصبح بدري على بعد شارعين من بيتي. وكالعادة عشت فقرة اللعب الصباحية مع القطة وانا بجهز، بعدين مشيت عشان اروح الدرس.. في العادي القطة بتفضل ملاحقة خطواتي لحد ما اوصل للباب ولما ابعد عن البيت بتقف خلاص. لكن المرة دي القطة فضلت ماشية ورايا.. كل شوية اقول هترجع دلوقتي لما تحس إن المسافة عن البيت بعدت.. مشيت بسرعة عشان أنا متأخرة ومش هلحق أرجع اروحها والمدرس صارم ومش هينفع اتأخر على الحصة.. بصيت مرة ورايا مالقيتهاش قلت خلاص رجعت.. رحت الدرس.. كان في أوضة لوحدها في الشارع مش جوا بيت. دخلت الأوضة والباب اتقفل والحصة بدأت.. بعد 10 دقايق قطة بتنونو بإصرار قدام الباب.. عرفت صوته (كان ولد) وقلبي كلني.. قلت شوية وهيرجع تاني.. سكت.. بعدين رجع تاني يناديني بصوت عالي وبإلحاح وأنا خايفة من المدرس.. خايفة اقوله دي القطة بتاعتي يتريق عليا.. وخايفة أقوله اخرج من الحصة ومش عارفة أعمل ايه.. لحد ما هو نفسه انزعج من صوت القطة وكان عايز يخرج يطردها فمقدرتش وقلت له دي القطة بتاعتي عايزة اروح اروحها..

كل ما افتكر الحكاية ببتسم.. كل الكلام اللي بيتقال عن القطط بيقول إنها بتتمسك بالبيت أكتر من صاحبها.. وإنها ما بيفرقش معاها غير الأكل وإنها صعب تخرج من منطقة راحتها.. بس هو خرج.. وجه ورايا ورفض يمشي حتى لو مش شايفني.. كان متأكد إني هنا..