العرض مستمر..

 مافيش أطفال من سنك.. عايز تلعب؟ اخترع أطفال بخيالك. اعمل عالم كامل. العب كتير مع نفسك لحد ما تكتشف إنك ما بتعرفش تلعب غير معاها.

الناس اللي المفروض تقوم بدورها في حياتك ما بتعملوش. املا مكانهم بسرعة. العب كل الألعاب. الأماكن الفاضية بتكتر. كل ما مكان يفضى تقطع من نفسك حتة، ترقع اللوحة، تسيب المكان فاضي؟ ولا تاخد حتة من كل حتة تملى بيها المكان دا؟ مكان واضح فاضي بيتسرسب لك منه الألم واضح وصارخ زي ماية ساقعة على عصب الأسنان.. ولا إحساس بعدم الشبع في كل الأماكن الباقية؟ الاختيار ليك. الاختيار فعلاً ليك؟

بتملى كل الأماكن. بتلعب كل الألعاب. حياتك كلها شبه مسرحية الطفولة انت المؤلف والمخرج وكل الممثلين والجمهور. العرض مستمر وانت مرهق أوي بس ما ينفعش تقف.. لأن العرض مستمر، وانت كل حاجة، المسرح والمسرحية والمتفرجين، ومحدش هيملى مكانك الفاضي.