لما برجع افكر في اللي فات من حياتي. الحاجات اللي حلمت بيها وكانت بمعطيات وقتها مستحيلة ودلوقتي هي واقع. بحلوها ومرها واقع عايشة فيه فعلاً بستغرب اوي انا كنت جايبة الثقة دي منين؟ جايبة الثقة دي منين في إني هوصل للحاجات دي؟ إني عايزة الحاجات دي بالقوة دي والصدق دا! وبعمل أي حاجة وكل حاجة شايفاها في وسعي وحتى أبعد من وسعي وطاقتي لعل وعسى توصلني!
إزاي كنت مصدقة نفسي كده حتى لو مافيش أي حد تاني مصدقني..
بفكر واستغرب وازعل على نفسي دلوقتي. وانا جوايا حاجات عارفة كويس أوي إني عايزاها. عايزاها بصدق ومش عايزة اتنازل عنها أبدًا بس مش عارفة ممكن تبقى واقع ازاي؟ مش عارفة هي ممكن تبقى واقع أصلا؟ زمان لما حد كان يقولي إني خيالية واللي بحلم بيه دا مستحيل الكلام اصلاً ما كانش بيتجاوز وداني.. كنت بسمعه باستخفاف وانا متأكدة إن اللي عايزاه هيحصل. مكنش عندي ذرة شك.
دلوقتي لما بسمع الكلام دا بتوجع، وبشك، وبحس إنه ما يمكن انا غلط فعلاً. ما يمكن ببالغ، ما يمكن فعلاً لازم افكر تاني.. ما يمكن المفروض ابقى واقعية شوية..
معرفش حقيقي انا كنت جايبة الثقة دي منين.. وإزاي كنت بكمل من غير علامات.. أنا محتاجة علامة يارب!
ليست هناك تعليقات:
إرسال تعليق
Say something...