من المعلومات السحرية بالنسبة لي واللي عرفتها بدري أوي من الطفولة، ومش فاكرة حتى عرفتها منين، لكن عمري ما نسيتها، إنه القنفد لو اتطمن كفاية بيدخل شوكه. فكرتي عن الطريقة اللي بيدخل بيها شوكه ماكانتش واضحة خالص، وكانت غلط أصلاً. كنت متخيلة شوك القنفد زي ضوافر القطة بيدخل تحت جلده لو اتطمن كفاية.
رغم إني ما بفتكرش كتير عن طفولتي، بس بفتكر دايمًا إني عشت وقت طويل جدًا بتتبع قنافد وأمنية حياتي أطمنها لحد ما تدخل شوكها. كأنه تحدي لنفسي إن أقدر أطمنها.
عمري طبعا ما نجحت في دا. وعمري ما نسيت إني ما نجحتش في دا، إن مافيش قنفد اتطمن لي كفاية لدرجة إنه يدخل شوكه. معرفش كنت متوقعة أشوف ايه، لما ببص دلوقتي على فيديوهات القنافد بحس إنها شبه الفيران شوية وشكل وشها مش محبب ليا خالص. بس كنت موهومة بالفكرة، بفكرة الطمأنينة دي.
اكتشفت مؤخرًا بقى إني أنا القنفد. أنا عايشة عمري نفسي أتطمن كفاية عشان أدخل شوكي. بس عايشة عمري الاتنين في بعض. أنا القنفد اللي مطلع شوكه، وأنا الطفلة الصغيرة اللي بتراقبه من بعيد ونفسها يتطمن كفاية ويدخل شوكه.
لما قالي ببساطة إنه عشان أحس بانتماء وإني قادرة أ fit in في أي مكان كل اللي محتاجاه هو إن البيئة اللي أنا فيها تبقى آمنة وتحسسني بالتقدير والناس تكون واضحة وسالكة.. قالي دا عشان أصدق إن عدم قدرتي على الاندماج مش لعيب فيا، لكن لأن الشروط اللي بتخليني آمنة وطبيعية ومنسجمة وبطلع أحسن ما عندي مش متوفرة. ابتسمت لحظة، بس أدركت بعدين إنه طب ما الدنيا مش معمولة عشان تبقى بيئة آمنة. أنا محتاجة معجزة أو حظ عظيم عشان الاقي البيئة اللي أقدر أدخل شوكي فيها!
طول الوقت كنت بفكر إني لو عرفت أحل المشكلة اللي جوايا / أصلح العيب اللي فيا هبقى قادرة أتفاهم مع الدنيا أحسن واتعايش.. بس انا عمالة اكتشف إن الموضوع أكبر مني!
#رحلة_أليس
ليست هناك تعليقات:
إرسال تعليق
Say something...