تشاندلر مات!

 أنا ما توقعتش أزعل عليه كده، يمكن ما توقعتش خالص إنه يموت دلوقتي. أنا حزينة حقيقي وقلبي مقهور. معرفش عليه هو بس فعلاً؟ ولا على نفسي اللي بشوفها فيه كمان. 

يمكن لما مات رجعني للواقع، للنهاية الحقيقية مش النهاية السعيدة اللي حصلت في فريندز، لما هو ومونيكا قدروا يشوفوا بعض، يلاقوا بعض وما يبقوش لوحدهم غريبين وحاسين انهم مرفوضين ومحدش قادر يحبهم كفاية او يتمسك بيهم كفاية. الحقيقة بتاعة إن ماحدش كان معاه، ومش شرط يكون دا لعيب في اللي حواليه لكن لأن وحدته معقدة وصعب اختراقها. ولأن وجعه وحزنه أكبر من المشاركة. الحقيقة بتاعة إن كل النجاح اللي في الدنيا مش ممكن يملى الفراغ الأسود الكبير في قلبه 

 أنا حزينة كأني فقدت صديق عزيز. أنا فعلاً فقدت صديق عزيز فرق في حياتي وفي نظرتي لنفسي، واساني من غير حتى ما يعرف بوجودي، كنت بزعل لما اسمع انه مش بخير وانبسط لما أشوفه شكله كويس.. حزينة لدرجة مش عارفة اوصفها ومش عارفة افهمها وحاسة إنه فتح جرح كبير كنت بحاول ألصمه بالعافية!